کشاورزی ءِ زرکاری پہ بلوچستان ءِ رو اِیرُشتی پھنات ءِ دیمروی ءِ واست ءَ یک راہ ءُ درے / «کینوا » ءِ س

چہ میارجل ءِ رسانکدر ءِ بُنجاھی ھال ءِ نیمگ ءَ یکے چہ مھسولاں کہ  ھمے چنت مدت ءَ ماں بمپور ءَ کِشگ بوتگ ، کینوا اِنت : کینوا تاکت والائیں مھسولے کہ پروتئین ئِے ھم باز اِنت ءُ برنج ءُ ھمدوریں چیزانی جاہ ءَ ھم پُر کت کنت۔

استان سیستان ءُ بلوچستان ءِ یکے چہ کارزانتاں ماں کشاورزی ءِ پڑ ءُ میدان ءَ درائینت : گڈی چار ءُ بیچارے کہ پہ اِے مھسول ءِ کشت ءُ کشار ءِ چکاسکاری ءِ واست ءَ ماں بمپور ءَ گرگ بوتگ آسر ئِے شر بوتگ : کینوا ءِ کشت ءُ کشار ماں بمپور ءَ دومی سال اِنت چیر ءُ پشت ءَ کشگ بیگ اِنت ءُ رند چہ وڑ وڑیں چکاسکاریاں کہ اِیشی ءِ بارہ ءَ بوتگ کہ بمپور ءِ آپ ءُ زمین پہ اِے مھسول ءِ کشت ءُ کشار ءُ آئی ءِ برورد دیگ ءَ سکیں شریں جاگہ اِنت ۔

اِے کارزانتانی گوشگ اِنت کہ ایشی ءِ بُنجاہ ماں بولیوی ءُ پرو ءُ شیلی ءَ اِنت ءُ اِیشی ءِ کوھنی ءَ اندازگ 7000 سال بیت اِنت ءُ ماں ھاکے ءَ کشگ بیت اِنت کہ برورد بہ دنت  چہ دریا ءَ ھم 4000 متر بُرز تر بہ بیت ءُ  بازیں لوٹ ئِے ھم باید ماں آ آپ ءُ ھوا ءَ پیلو کنگ ءُ دلگوش دیگ بہ بنت ءُ آپ ھم باز لوٹ اِیت۔

میارجل ءِ ھالکار چنت کس چہ کارزانت ءُ زمہ وارانی گْور ءَ کہ کشاورزی ءِ پڑ ءُ میدان ءَ دست اِش ھست ءُ دیدانک ءُ لیکہ ءِ واھند اَنت ، شتگ ءُ گوں آیاں گپ ءُ رپ ئِے کتگ ءُ گلگدار ئِے گپتگ کہ شما ماں تامر ھال ءِ توک ءَ گند اِت اِش.