چھبار ءِ مردمانی آدینگ ءِ شپانی لوٹ ءُ دوا

میارجل ءِ ھالرسانی بنجاہ ءِ ھالانی رد ءَ: مھمد جواد سادکی ءَ نبشت : اے ھدا پہ اے شپ ءِ دراجی ءُ مزنی ءِ ھیر برکت ءَ چھبار ءِ زِمہ داراں دْراجیں امر ءُ پہ مردماں کار کنگ ءِ توپیک ءَ بد ئے داں کہ ایشانی ساھگ اَبید چہ زندگاں پہ مردگاں ھاس شمبے آباد ءِ مانشجاھاں تالان بہ بات داں یک سپائیں مانشجاھے  ءُ دگہ کاپر ءُ ساھگے پہ آیاں جوڑ بکنت .اے ھاوند تو درگوز کنوک ءُ مھروانے ئے پھرہ  ءُ گھ ءِ مردماں درگوز بکن ءُ پہ آیاں شریں شھردارے ءُ کارکنوکیں درگیج ءُ بد ئے اے ھدا چہ وتی مزنی ءَ بچار ءُ پھرہ ءُ چھبار ءَ چہ دُز ءُ ٹیکاں چہ ھمک ھراں ، شرھرے بہ بیت یا مال ھرے ءُ چہ درستیں ھراں کہ مردمانی ایمنی ءُ آسیدگی ءَ ھراب کن اَنت ، بہ رکیں ۔ اے ھاوند پہ کپتوک جاہ ءُ چِلّگجاہ ءَ شرین ءُ زانشتی جنبوگ پیشکش اِنت بلے پھرہ ءِ اُلوم پزشکی ءِ مزن شھدربرجاہ ءَ ھمے میتگی جنبوگ بدئے داں لاپ پُریں مات ءُ آیانی نُنُک اِیمن بہ بنت .

اے ھدا نوکیں دولت ءَ چھبار ءِ مردمانی سر ءَ بزگ نہ کت بزاں آیانی پرماندار ھاجی رھمدل بامری برت اِش من پہ بزگی چہ ترا لوٹ کن آں کہ چھبار ءِ مردماں چہ وتی مھروانی ءَ مھر بہ دئے اے ھدا پہ اے شپ ءِ مزنی ءِ ھیر برکت ءَ چھبار ءِ آپ ءُ سِلّ آپ ءِ ادارہ ءَ پہ راستیں راہ ءَ رھشونی بکن ، داں آپ ءِ بدل ءَ دگہ بدل بیوکیں اِنرژی ءُ گْوات مردمانی آپ ءِ پیپانی تہ ءَ مان مکنت پرچا کہ مردم ھم بزگ اَنت کہ آپ ءِ زَرانی بدل ءَ گوات ءِ زر ءَ بدئے اَنت . اے ھدا پہ اے بلاھیں شپ ءِ ھاتر ءَ چھبار ،  کنرک ، دشتیاری ءِ تیل پمپانی تُلمبِیھاں سرجم بکن داں مردم ماں دراجیں سرپاں مھتل مہ بنت کہ پہ کار چُکانی وانگ ءِ برَگ ءَ ، دگہ سور ءُ آروس ، پُرس ءُ پاتیا ءُ پہ بِیتُّکی جَشن ءَ پَشت مہ کپ اَنت .اے ھدا مارا چہ اے مانگیشیں جاور ءَ بہ رکیں داں کہ ما پہ پیر ءُ دربیشی جاہ ءَ بہ رس اِین ءُ چو در بہ براِیں کہ اے برکانی روگ ءِ میار شرکت ءَ پِر اِنت یاکہ چہ بھر ءُ بانگ ءَ اِنت یا میار واجھیں دُزانیگ اِنت ۔

رجانک : ملا چمل