چھبار ءُ دشتیاری دمگانی ءِ نُکّ ھُشکیں مردمانی ورگی آپ ، پیر سھراب ءِ پس ءُ مالانی نسیب بوتگ
آپ ءِ نل ءُ پیپانی ٹونگی ءُ پروشگ ماں زیردان آپ بند ءِ چیر گوری ھنداں ( چھبار ءِ پیر سھراب ءُ پُلّان ءُ انچوش گنداوگ ءُ تلنگ ) ءِ آپسراں زیگ ءُ باندات ءِ کسّہ ءُ گپّے نہ انت . اے پیپ ءُ نل سالانی سال انت کہ ھر چُنت وھد ءِ سر ءَ یک رندے ما ورگی آپ ءِ زوال بیگ ءِ گوھدارین ءُ اے پڑ ءَ ھم پہ مشکلاں رھدر ءِ توجیلے گندگ نہ بیت ءُ " آبفا" کارگس ءِ جوازت بس پہ چْنت بے اجازت ءِ ھوار بوتگیں مردمانی نل ءُ پیپانی سِندگ ءُ آھانی ملام ءُ جرمانہ کنگ ءَ چنت مردمی کارندہ ءِ دارگ ءَ کارمرد بیت .
چہ اے کارگس ءِ کارپد ءَ چو پدّر انت کہ مردم آپ مہ ور انت اگاں ناں زیردان آبند ءِ آپ ، سالانی سال یک جوّ ءِ دابے ءَ ماں کاجو کور ءِ تہ ءَ شیوگ یا کہ آپ جنڈے ءِ وڑ ءَ ھرجاہ ءَ ترینزاں بہ بیت اے واجہ ھانی گوشان ءَ مورے اوں نہ وارت .
اے جنجٹ ءُ شلگرہ ءِ توجیل کنگ ءِ ایوکیں رھدر ، آبفا ءِ اسلی یا جھگیری کارگس ءِ راہ پرّینگ ءُ یک ءُ دو ملکی کارندہ ءِ کاربندگ ماں پیرسھراب ءِ شھر ءَ انت داں کہ چہ وتی زانت ءُ سرپدی ءِ ھاتر ءَ ھر کجام جاہ ءَ کہ نل ءُ پیپ ٹونگ ءُ سند ءُ سیل بیت اشتاپ ءِ سر ءَ ساچکاری ءِ گامیگیجے بہ کن انت .
واجہ پرویز پیکن پیر سھراب ءِ شھری ءُ چھبار ءِ دمگی شورجاہ ءِ باسک ءَ گوش ایت کہ ۶ ماہ انت کہ آبفا ءِ کارگس چہ یک پرشتگیں نل ءُ پیپ ءِ ساچارگ ، کلات ءِ فتحعلی پھل ءِ ھبیلی ءَ در منتگ ءُ آپ ، مردمانی وَرَگ ءِ بدل ءَ کاجو کور ءِ تہ ءَ شیوگ انت ءُ ملک ءِ پس ءُ مالان ءَ وارینگ بیت .
اے واجہ ءَ گیش کت کہ چنت ماہ انت کہ ما وتی پورہ ایں وس ءُ ساہ ءَ کارمرد کتگ دانکہ پہ زیردان آبند ءِ چیردستی کلگ ءُ اے ھند ءُ دمگانی نل ءُ پیپ ءِ دارگ ءَ یک کارندہ ئے کار گرگ بہ بیت بلے بے کٹّ بوتگ . پیرسھراب ءِ آپانی کارگس ءِ جھگیری بارو ءَ رند چہ تھرانی زمہ وارانی لبز ءِ دیگ ءَ ھم پورہ نہ بیگ انت .
رجانک:میرجلال
کارمرز کنوکانی هیال