چھبار ءِ بوجیگان ءَ بُن لانچی گراز ءُ سامانانی موکل ، چوشکہ دگہ تیاب دپی ھلاکہ انی وڑ ءَ پرچا دیگ نہ

چہ میارجل ءِ بنجاھی ھالرسانی ءِ ھالانی رد ءَ : اے دگہ تیاب دپی ھلاکہ انی بگیر ءَ ، سیستان ءُ بلوچستان ءِ تیاب دپی شھراں ، بوجیگانی بن لانچی گراز ءُ سامان ءِ آرگ ( جانشوئی لر ءُ پر ) مہ کن انت ءُ اے دمگ ءِ جانشو اں چہ اے ھاتر ءَ گِلگ کن انت .

چھبار ءِ دمگ دار ءَ گوشت ; بوجیگانی بن لانچی گراز ءُ سامان ءِ آرگ ، اے دمگ ءِ جانشو انی مالی روزگار ءُ گس والینی وس ءَ ڈا تر کنت . 

واجہ سپاھی ءَ گیس کت چوشیں موکل ءُ اجازتے جانشو انی کلّ ءُ ھند ءُ دمگ ءِ تہ ءَ ، مالی بود ءُ برش ءِ دیمروی ءِ سوب بیت . 

واجہ سپاھی ءَ گوشت کہ ملک ءِ اے دگہ تیاب دپی شھراں ، بوجیکانی بن لانچی سامان ءُ لر ءُ پر ءِ آرگ ءَ ، موکل دیگ بوتگ بلے مئے ھند ءَ دنیگت ءَ اے گلّ ، وتی چوشیں ھکّ ءُ اگبالانی رندگیری ءَ نہ کتگ ءُ ما را ھم آھانی سرجمیں لڑ ءُ شمار ءِ کچّ ، دست ءَ نہ کپتگ ، بلے انیگ ءَ دمگ ءِ درستیں اگدہ دار ءُ زمہ واریں گل ءُ گروپ اے ھاتر ءَ جھد کنگ انت ءُ ما ھم آھانی لوٹ ءَ پیلو کنگ ءَ ایں ، امیت انت کہ ھمے زوتاں جانشو انی اے واھگ ءِ مراد اں پورہ بہ بیت .

دمگدار ءَ درائینت ; ما اے کار ءَ پیلو کنگ ءَ ایں دانکہ دمگ ءُ جانشو انی مالی روزگار گھتر بہ بیت .

دیوان ءِ رندگیری ءَ ، جانشو انی لھتے لوٹ ءُ واھگان گوشگ بوت انت .

حسین اسمائیل زادہ یکے چہ بوجیگ والایاں ، چہ دمگ دار ءُ اے دگہ اگدہ داران ءُ سرکاری کارگسانی پلامرزی ءُ جانشو انی اگبالانی پیلو کنگ ءِ ھاتر ءَ وتی منتواری ءَ درشان کت ءُ گوشت ; گھتر انت کہ اے گلّ ءِ بن لانچی لر ءُ پرانی چارگ ءُ ٹپّاسگ ، بوجیگ ءِ سر ءَ بہ بیت ءُ آھانی ساماناں چہ اود ءِ امن ءُ امان ءَ گوں ایر گیجگ بِہ بنت . اے واجہ وتی گپانی دگہ بھرے ءَ گیش کُت کہ جانشوانی لر ءُ پرانی آرگ ءِ ھُجّ ءُ کڈّنی ، داں دروازگ ءِ دپ ءَ گوں موٹل پہ آھاں گرانیں کارے انت .

دیوان ءِ رند گیری ءَ ( ناھدا) کیومرثی ، اے رد ءَ درّائینت کہ انگیں جاورھال ءُ درستیں گراز ءُ سامانانی گرانی ءِ ھاتر ءَ ، جانشو انی بن لانچی لر ءُ بر ءِ ونڈ ، انچو گیش ءُ گیوار کنگ بہ بیت کہ آھاں وتی گس والینی ءُ ھرچ ءُ درچ ءَ گُوَم ءُ گیگ بہ دے انت .

چھبار دمگ ءِ بوجیگ داران ءُ جانشوانی "تعاونی" ءِ کارمستر ، وتی منہ واری ءَ چہ دمگ دار ءِ پلامرزی ءَ درشان کت ءُ گوشت ; اے دمگ ءَ بازیں بوجیگ دار ءُ لانچ والا ءُ جانشو گلّانے ھست انت کہ سرکار ءَ آھانی زندمان ءِ دلگوش گوَر دیگ ھژدری انت ، 

واجہ رسولی کہ وت یک بوجیگ والائیں مردمے انت اے دیوان ءِ رندگیری ءَ گوشت کہ چھبار ءِ دمگ ءَ بازیں جانشو ءُ لانچ والائیں مردمانے بوتگ انت کہ آھانی پت ءُ پیری کار ءُ چلپگ ماھیگری ءُ جانشوئی بوتگ بلے مروچاں اِشانی بازیں بھرے چہ وتی کار ءُ بار ءِ نزّ آیگ ءُ روزگار ءِ سکّی ءُ سوری ءَ ، وتی پت ءُ پیرانی ڈیھ ءُ سرڈگار ، یلو کتگ ءُ دگہ تیاب دپانی نیمگ ءَ شتگ انت ، پمیشکا زلورت انت کہ جانشوئی کار ءُ چلوپگ ءِ سر ءَ اے رند ءَ الکاپیں رھبندے دیگ بہ بیت . اے واجہ ءَ گوشت کہ باڈر ءِ سر ءَ پہ شَرّی ءَ دلگوش گوَر دیگ بہ بیت دانکہ اے گلّ ءِ لانچ ءُ بوجیگان ءَ تاوانے مہ رس ایت .

چھبار ءِ دمگ دار ءَ گوشٹ کہ بوجیگ دار ءُ جانشوانی مونج ءُ نگیگی انی بارو ءَ ھمے زوتان توجیلے کنگ بیت .

"صادرات و واردات" ءِ رھبندانی رد ءَ ، بوجیگانی بُن لانچی گراز ءُ سامان جانشو ءُ دگہ کارندہ انی یک ھک ءُ اگبالے کہ توان انت اے رھبند ءِ سر ءَ ھر سالے داں ۶ رند ءُ ۱۵۰۰ ڈالر ءِ کچّ ءُ ھساب ءَ گوں وت ءَ ملک ءِ تہ ءَ گراز ءُ سامان آرگ توان انت / رجانک : میرجلال .