بلوچی دود ءُ روبیدگ

چہ میارجل ءِ بنجاھی ھالرسانی ءِ ھالانی رد ءَ ; بلوچانی دود ءُ روبیدگ ماں آھانی اولی دپ کپگ ءِ درگت ءَ سکّ ڈول دار انت چمشکا اے مَنّ ءِ سر ءَ انت کہ پیش چہ دستانی گِرَگ ءُ دستَمَّنائی ءَ ، بَگَل کنگ ءُ ھمبازی ءِ دود ، آھانی دلانی نیام ءَ نزّیکی ءُ دل سِتکی گیشتر بیت .

انچوشیں دود ءُ روبیدگانے زالبولانی تہ ءَ ھم ھست ءُ برجاہ انت . وھدے کہ یکادگر ءَ گِند انت ، تری وتیگ بنت یا کہ درامد ءُ دیر سیادیں مردم ، اولسر ءَ گوں وت ءَ ھمباز بنت ءُ رند ءَ وتی دستان ءَ دروت دے انت ءُ چُکّ انت . 

بلوچستان ءِ وڑ وڑیں تک ءُ پھناتاں ، جوڑی ءُ وشاتکی ءِ دود ءُ روبیدگ ءِ نیام ءَ کمو دگری ھست .

ماں شستون ءِ آپسر اں اے ڈول انت کہ چہ واسیگ دار ءِ نیمگ ءَ یک مردمے گوں مھماناں وشاتکی ءُ جوڑی کنت .

ماں زرّاباد ءِ ھند ءُ دمگ ءَ جوڑی ءُ وشاتک ءِ دود ، داں نیم یا کہ یک ادارے ءَ چیٹ وارت ءُ دراج کَشّ بیت . واسیگ دار ءِ لوگ مردماں ماں اے دم ءُ درگتاں داں چُنت رند ءَ مھمان ءَ وشاتک ءُ پد مہ پد آئی ءِ ھال ءَ جُست کن انت ، چہ آیگ ءِ چون ءُ چہ پیمی ءُ آئی ءِ ملک ءُ دمگ ءِ اھوالات ءُ موسمی جاورھالان ءُ کِشت ءُ کشاری سرھالانی بارو ءَ گوں وتی مھمان ءَ گپ ءُ رپ کن انت .

بلوچ راج ءِ تہ ءَ پیش چہ ھرچ کارے ءَ مھمان ءَ آپ وارین انت . بلوچ کئوم اے سما ءِ سر ءَ انت کہ آھانی مھمان چہ دیریں راھے ءَ آتکگ ءُ نوں ژند ءُ منتگ انت پمیشکا گوں گلاسے آپ ءِ وارینگ ءُ مھمان ءِ بگل کنگ ءُ ھمبازی ءَ ، آئی ءِ دل ءَ وش کن انت ءُ دم سارین انت . 

بلوچ کئوم چوشکہ ایران ءِ اے دگہ راجاں ، یک دل ءُ ھم ستکیں راجے کہ اے ءِ سرڈگار ءِ سر ءَ ھنکین بوتگ انت ، بلوچاں بازیں کچّ ءُ شمارے ءِ مردم بنت ، آھانی بازیں کساسے اوں ماں پاکستان ءُ اوگانستان ءِ ملکاں زند گوازینگ ءَ انت ءُ لھتے دگہ ھم دری ملکانے نندوک انت . 

بلوچ راج ءِ زبان ءُ لبزانک بلوچی انت کہ یک بھرے چہ ایران ءِ روچ نشتی گوریچان ءِ زبانان پَجّارگ بیت .

بلوچاں اسلامی ایران ءِ درھیں رھبندانی منوگر ءُ وتی ملک ءِ ھُدوک انت ، ایران ءِ رھدربر ءِ گپّ ءُ ھبر ءَ اشکن انت ءُ گوش دار انت .

وتی ملک ءِ سیمسرانی دارگ ءُ پھازگ ، بلوچانی یک بُنَکّی زمّہ ءُ آھانی کوپگانی ڈوبہ انت .

بلوچ راج ءِ یکدلی ءُ ستک دلی ءُ تپاکی گوں زمہ واریں اگدہ ئے ، پہ ملک ءِ آباتی ءُ دیمروی ، بلوچانی یک چیدگیں منّارگ ءُ دودے انت .

بلوچانی مھمان جلّی چہ اے راج ءِ یک پر نام ءُ تواریں روبیدگان انت . بلوچ راج ، مھمان ءَ اللہ ءِ دوست مار انت ، تری اگاں دژمنی بہ بیت ، آئی ءَ وتی لوگ ءِ تہ ءَ جَلّ انت ءُ اِزّت دے انت .

وھدے کہ مھمانے یک بلوچے ءِ لوگ ءَ بئیت ، آئی ءَ وتی وس ءِ گِھتریں وراک وارین ایت ، گُواھے آئی ءِ سجّہ ایں مال ءُ مڈّی یک پَسے بہ بیت اے پَس َ مھمان ءِ ھاتر ءَ ندر کنت ءُ سر بُرّ ایت . مھمان ءِ ایمن ءُ سلامتی بلوچانی بُنَکّی زمہ اے مارگ بیت ، بلوچ ءِ لوگ ءِ تہ ءَ ھچّ کس آئی ءِ مھمان ءَ گُزندے جت نہ کنت ، بلوچ وتی مھمان ءِ اِزّت ءُ سلامتی ءَ پھاز ایت .

بژن انت کہ لھتے جاھاں بلوچ ءُ سیستانی مردمان ءَ بد ءُ رد گوش انت ، اے کار دژمنانی یک پندلے انت ءُ اے ھلاکہ ءِ تہ ءَ سیستانی ءُ بلوچ راج یک ءُ تپاک انت ءُ درو مھروان ، وش تب ، مھمان جلّ ءُ دوستیں مردم انت کہ مدام وتی لبز ءُ کولانی سر ءَ اوشتاتگ ءُ اوشتوک انت .

رجانک : میرجلال