بلوچستان ءِ پھلوان ءِ لیکہ ءُ درشان / مھمد رزا تازہ رو : بلوچستان ءِ مردمای ھَکّ اِے نہ اِنت

چہ میارجل ءِ رسانکدر ءِ بُنجاھی ھال ءِ نیمگ ءَ : مھمد رزا تازہ رو ءَ چہ سال 82 ءَ گوازی ءُ وردش ئِے بنگیج کتگ ، آئی ءَ پہ دل سال 84 ءَ وردش ءِ نیمگ ءَ شتگ ءُ "پاورلیپتینگ کدرتی" ءِ تھر گِچین ئِے کتگ ءُ سال ءِ 90 ءَ اِے تھر ءِ توک ءَ رَند چہ باج بروک ءَ دومی کس بوت ءُ ھمے سالاں پہ ایشیا ءِ گوازیاں گچین بیت ، ءُ آ چہ سال ءِ نود ءُ سے ءَ ماں "زورمندیں مردانی" تھر ءَ کار ئِے بنگیج کت ءُ ماں سال ءِ 94 ءَ ھم چارمی کس ماں ایران ءِ توک ءَ بیت ، آئی ایران ءِ اولی سرپ ءِ نمبر بیت ءُ سال ءِ 96 ءَ باج ئِے برت ءُ سال ءِ 97 ءِ نوکیں روچاں پد ءَ ماں ھاٹیگ مندتریں مردانی میان ءَ پینال ءَ شت ءُ پد ءَ اے بر ءَ ھم چارمی نپر بیت ءُ سال ءِ 98 ءَ پد ءَ ایران ءِ توک ءَ دومی کس بیت ءُ اِمبری کہ پہ دست ئِے آورت ھک اِت ئِے کہ اِے سال ھم اولی کس بہ بیت ۔

ماں گپ ءُ رپ ءِ دیم تر ءِ بھر ءَ گوں تازہ رو ءَ کہ انّی بلوچستان ءِ پھلوان ءِ نام ءَ پجارگ بیگ اِنت وان اِت ۔

چے بیت کہ وردش ءِ نیمگ ءَ شُت اِت ؟

پہ بدنسازی (جان جوڑی) ءِ تھر ءَ باز واھگ دار اِتاں کہ آ روچاں کہ باشگاہ ءَ روگ ءَ اتاں منی مستریں برات ءَ موکل نہ دات ءُ آئی ءَ گشت کہ اِے جاور پہ تو شر نہ اَنت ءُ آ وھد ءَ منی اُمر کم اَت  ءُ منی برات ءَ ھم اِے گمان کُت کہ جان جوڑی ءِ باشگاہ ءِ جاور چو باز ترسناک وڑ اِنت ءُ ماں سال ءِ 82 ءَ کہ منی برات ماں زمین چنڈ ءِ ویل ءَ بیران بیت اھمد بجارزھی منی رند ءَ آتک کہ منی برات ھمائی ءِ باشگاہ ءَ کار ءَ اَت کہ ھمائی ءِ واھند اَت ،من ءَ گْوشت ئِے واجہ تازہ رو تو اِد ءَ وتی برات ءِ جاہ ءَ تمرین ءُ کار بہ کن ءُ چہ آ سالاں رَند واجہ بجارزھی ءَ پہ من ءَ باز مھر ئِے کت ءُ من ھم داں اینچک ءَ پہ باشگاہ ءَ نزیک ءِ 70 مدال کَٹّ اِتگ ۔

بلوچستانی اِت یا بلوچ دوست اِت؟

راستیں گپ ءَ لوٹ اِت من وت ءَ بلوچ زانگ آں منی پت بُندر ءَ بیرجندی اِنت ءُ ھپتاد سال پیش ماں بلوچستان ءَ آتک ءُ اِد ءَ جاھمنند بوت ءُ ھمیشی ءِ ھاتر ءَ من گیشتر ماں بلوچانی میانجی ءَ رُستگ ءُ مزن بوتگان ءُ منی تروزتک بلوچ اَنت ءُ گْوشت کن ئے کہ مئے ٹکّ سرجم ءَ بلوچ اَنت ءُ من ھم انی وت ءَ را یک بلوچے زانگ آں ۔

تئی لیکہ پہ زمہ وارانی بارہ ءَ پہ بلوچ بنی آدمانی واست ءَ چے اِنت ،تئی ھیال ءَ واکی ھک اِنت کہ بلوچ ڈیزل کشّی بہ کن اَنت؟

بلوچستان ءِ مردم واکی گیرت والائیں مردم اَنت بزانکہ گوں کسانکیں کارے ءَ وژھال بنت ءُ منی واھگ اِنت کہ بلوچانی ھیالداری ءُ چارگ بہ بیت ءُ بلوچاں داں انیگ ءَ دولت ءِ گور ءَ ھچ چیز اِش نہ لوٹ اِتگ اَبید چہ آرامی ءُ تاھیر ءَ ءُ من بس دوست داراں کہ اِد ءِ چارگ ءُ ھیالداری بہ بیت ، بلوچستان ءِ مردم ءِ ھکّ اِے نہ اِنت ءُ اِے چہ مزنیں سیمسری ءَ سمبالگ ءُ ھیالداری کنگ اَنت ءُ واکی ایشانی کار ءِ بستار ءُ ارزشت سک باز اِنت ءُ نباید اِے مردم اللہ ءِ میار ءُ ویل کنگ بہ بنت ءُ گند ئے کہ پہ یک کسانیں کارے (ڈیزل کشی) ءِ کنگ ءَ کُشگ بیگ اَنت ، زاناں اِد ءِ مردم گوں دگہ جاگاہ ءِ مردماں گوں دگری اِش ھست ۔

گْوشت کن ئے چِہ راھے ءَ داں اد ءَ رس اِتگ ئے ؟

سک باز سکی کش اِتگ ،سال ءِ 82 ءَ وتی پَرپَٹ بھا کت دانکہ پیادکانی راہ ءَ بہ رواں ءُ بہ تواناں ھمے رنگ ءَ بامردے بہ باں ، باز سک اِنت کہ ھپدہ سالیں یک ورنایے لاچار بہ بیت کہ وتی پرپٹ ءَ بھا بہ کنت ءُ روچے یک ادارے پیادگ شتگاں دانکہ لوگ ءَ بہ رساں ءُ چہ اود ءَ ھم یک ادارے ءَ وھد برتگ دانکہ باشگاہ ءَ واتر بہ کناں ، من باید روچے پنچ ادار ءَ ھِیل ءُ تمرین بہ کتیں ءُ انچیں روچ بیتگ اَنت کہ من ءَ کِرانے ھم کیسگ ءَ نہ بیتگ ءُ آ وڑ ءَ کہ دل ءَ لوٹ اِت بروردوں نہ رس اِتگ ءُ البت مردماں من ءَ شریں وڑ ءَ مدت کتگ ءُ انی ھم بیت کنت کہ دگہ شھراں ھم بہ رواں ءُ اود ءَ تمرین بہ کناں ءُ آیانی واست ءَ باج بہ کَٹاں پرچا کہ زمہ وار اِش شرتریں پول دے اَنت ءُ انگت ھمے داب ءَ من اد ءَ منتگ آں ءُ گوں وت ءَ گوشگ آں کہ اگاں آ اولسر ءَ بلوچستان ءِ مردم نہ اِت اَنت ءُ من ءَ مدت اِش مہ کتیں گڑا انی اِے جاھاں نہ رس اِتگ آں کہ بہ توان اِت اِیں چشیں جاہ ءُ مکام ءَ بہ رس اِت اِیں ءُ جام ءُ باج بہ برتیں ۔

تئی ھیال ءَ استان ءِ زمہ وارانی نگاہ ءُ چار ءُ گزار وردشکارانی نیمگ ءَ چتور اِنت ؟

راستیں گپ ءَ لوٹ ئے من بس امبری زمہ وار دیستگ اَنت پیشگیں سالاں کہ ما شتگ اِیں گروھتاچی کتگ مارا گوشتگ اِش کہ شمامارا ھال نہ دیگ اِت ءُ وھدے کہ تھران ءَ رستگ اِت گڑا مارا نوک سھیگ کنگ اِت !

من سال ءِ 96 ءَ ماں 100 کس ءِ میانجی ءَ ماں سرجمیں ایران ءِ توک ءَ باج برت ءُ کَٹ اِت بزانکہ وتی تھران ءِ جند ءَ باج برت ھما جاہ ءَ کہ ازت پور ءَ سے سال چیر پشت ءَ باج برگ ءُ کٹگ ءَ اَت ءُ من چہ بلوچستان ءَ آتکگ کہ یک روچے ءُ شش ادار راہ ءَ بوتگاں ءُ وھدے کہ تھران ءَ سر بوتگ آں گڑا سے روچ ءَ دَم کُتگ ءُ رند ءَ گوازی کتگ ماں گروھتاچی ءَ ، بلے آ وھد ءَ من اِزت پور سد نپر ءِ میانجی ءَ پروش دات ءُ واکی ایران ءِ بامرد بیگ ءُ باج برگ ھم ارزانیں کارے نہ اِنت ءُ منتے ھم نہ اِنت کہ وتی شھر ءِ مردمانی ھاتر ءَ بوتگ کہ اِے کار کتگ ، یک سالے کہ من چارم بوتاں منی کسانیں انگشت درد بوت ءُ پینال ءِ توک ءَ نہ بیت کہ شریں مکامے بیاراں بلے من ھرچ ھال ءَ دوستوں داشت کہ باج ءَ بہ کٹان ءُ بہ براں بلے ھر وڑ ءَ مشکل پیش آتک ءُ نہ بیت ءُ اود ءَ ھم کہ چارمی کس بوتاں بلے شر گندگ بوتاں سال ءِ نوکیں روچاں شبکہ سے ءَ سرجم ءَ من ءَ پیش دارگ ءَ اَت بلے پد ءَ ھم چہ من ھچ وڑیں مدت کنگ نہ بیت ءُ وھدے کہ وتی شھر ءُ دیار ءَ رس اِتاں کہ یک ٹیکی یے سے ملیون آئی ءِ ارزش اَت من ءَ دات اِش کہ بلے من آ وھد ءَ 40 ملیون تومن ھرچ کتگ اَت کہ پہ اود ءَ بہ رساں : امبری کہ دومی کس بوتاں ،من بنداتی گوازیاں ھشتم بیتگ آں بلے باز دلسیاھی کش اِتگ اَت ءُ وھدے کہ پینال ءَ سر بوتاں گڑا دومی نپر بوتاں ءُ گمان کناں کہ منی ھَکّ اولی ئیگ ات ءُ چشیں کارے ءِ کنگ سک باز سک اِنت کہ چہ ھشتم ءَ وت ءَ بیارایت پینال ءَ ءُ دوم بہ بیت ءُ گڈسر ءَ شرکت ءَ من ءَ بیست میلیونی ٹیکی یے دات کہ ھدا ھیر اِش بہ دیات ءُ پانزدہ میلیونی ٹیکی ادارہ ورزش ءَ دات کہ پد ءَ ھم مھربانی انت اِش ءُ یک دابے اِنت کہ من انگت وتی شھر ءِ ادارہ ورزش ءُ جوانان انگت نہ دیستگ ءُ کرار اِنت کہ یک زمینے مارا بہ دے اَنت کہ من انگت چہ جاہ ءَ سھیگ ئِے نیاں بلے واجہ مسن آبادی ءَ سَے سد میلیون نگدی زر ئِے رس اِت ءُ یک لوگے ماں اِراک ءَ دات اِش کہ اندازگ دو میلیارد بھائِے ھست اِنت ، پرچا زمہ وار نہ توان اِیت پہ ورنایے ءَ کہ ھپدہ سال ءَ وتی امر ئِے پہ وردش ءِ راہ ءَ داتگ ئِے ءُ سک تریں وھد ءَ اِد ءَ رس اِتگ ءُ سر بوتگ کارے بہ کنت پد ءَ ھم کرار نہ اِنت کہ وتی کیسگ ءَ بہ دنت ءُ دولت ءِ ھزانگ دست ءَ اِنت ئِے ءُ واکی پرچا نہ باید کمک ءُ مدت بہ بئیں ؟۔

بزانکہ ھچ مدت نہ کنگ اَنت؟

سے ماہ دگہ کرار اِنت کہ ماں یک گروھتاچی ءَ کہ میان استمانی اِنت بھر بہ زوراں کہ واجکار گیتاسی ءُ مسن آبادی ءُ ڈنی وردشکار ھم چہ ڈنی ملکاں گون اَنت ءُ یک دگہ گروھتاچی یے ھم نوکیں سالروچاں  ھست اِنت کہ الّمی بیتگ کہ اِے گوازی ءُ گروھتاچی ماں تلویزیون ءَ بہ بنت ءُ ما لوٹ اِیں بہ گند اِیں کہ مئے زمہ وار لوٹ اَنت چونیں مدت مارا بہ کن اَنت ، ءُ اگاں لوٹ اَنت آیانی وردشکار گندگ بہ بنت ءُ آیانی شھر ءُ استان ءِ نام ءُ بیرک بُرز بہ روت گڑا باید مدت کنگ بہ بنت ، زاناں مارا چنت وردشکار ماں استان ءَ ھست اِنت کہ تلویزیون ءَ گندگ بہ بنت ءُ وداریگ اِیں کہ بہ گند ایں آ روچ ءَ مئے زمہ وار دلجمی ءَ گوں مزن مردی ءَ کمک بہ کن اَنت باریں کمک رس اِیت یا ناں ۔ اِے جاھاں کہ ما تمرین کنگ اِین ءُ اود ءَ کہ تھران ءِ وردشکار تمرین کنگ اَنت ھچ ھساب نہ اَنت ءُ مئے جاہ روچے یک دو بر ءَ پرشت ءُ پروش ءِ آماچ بنت ءُ اِد ءِ اوزار واکی ھچ نہ اَنت ءُ اگاں تھران ءُ کرج ءِ مردمانی ھساب ءَ جاگہ بہ داشتیں گڑا ھدا زانت کہ اِے وڑیں پیش آتک نہ کپتگ اَت کہ پہ درور یک داورے بئیت ءُ چہ من ھردکیں ردی یے بہ گر اِیت ءُ من ءَ چہ دہ ءَ ھچ ءِ سابرد ءَ بہ دنت ۔

رجانکار : میرجان میر