بلوچستان ءِ دواجاھانی تہ ءَ ۸۰ وڑیں ایرانی دوا ءُ درمان ءِ کُھت ءُ اَنزَروت بوتگ انت

چہ میارجل ءِ بنجاھی ھالرسانی ءِ ھالانی رد ءَ ; اے چنتے ماہ انت کہ لھتے ایرانی دوا ءُ درمانانی کُھت ءُ انزروتی ، لس مردمان ءَ گلگ وار کتگ ءُ نادراھاں چوشین ایرانی دواھانی شوھازگ ءِ ھاتر ءَ تکانسر انت . ھمے بنگپ ءِ سر ءُ سوج کنگ ءِ ھاتر ءَ ما چھبار ءُ پھرہ ءِ بازین دواجاھان ءَ گول ات بلے سیستان ءُ بلوچستان ءِ اے دوئیں مزن شھرانی جاورھال ، چہ ایرانی دوا ءُ درمان ءِ کمّی ءَ یک پیم انت . دواجاھانی اگدہ داراں چہ ۸۰ داں ۱۰۰ وڑیں ایرانی درمان ءِ انزروتی ءَ گپ کت ءُ درّائینت کہ ھند ءُ دمگانی تہ ءَ لھتے دگہ دواھانی کچّ کم انت ءُ درھیں نادراھان ءَ بھر نہ بیت ، اے نگیگی ، درستیں مردم ءُ دواجاھی اگدہ دارانی نارزائی ءِ سوب بوتگ . چہ دگہ نیمگے پھرہ ءِ علوم پزشکی زانشتجاہ ءِ اگدہ دارانی کولہ رَوَگ چہ دوا ءُ درمان ءِ کُھت ءُ انزروتی ءُ دوا ءِ نپر ءِ سر ءَ بھر کنگ ءِ منّانک ، بلوچستان ءِ زرباری دمگانی تہ ءَ وت یک دگہ جیڑ ءِ بنگپے انت . 

پمشکا ما را چہ ملک "بھداشت ءُ درمان" ءِ وزارت ءُ جھگیر ءِ اگدہ داراں دستبندی انت کہ بلوچستان ءِ زرباری دمگان ءِ دوا ءُ درمان ءِ کھت ءُ انزروتی ءِ سر ءَ توجیلے بہ کن انت دانکہ اے جنجٹ ءُ شلگرہ کہ راج ءِ نادراھیں مردمانی چکّّ ءَ کپتگ ءُ آھان ءَ مونج ءُ تکانسر کتگ ، یک نیکیں آپسرے ءَ سر بہ بیت .

میارجل ءِ ھالرسانی بنجاہ ، وتی رسانکدری زمہ ءِ سر ءَ ، پھرہ ءِ " علوم پزشکی " زانشتجاہ ءِ اگدہ دارانی پسو ءِ وداریگ ، بلوچستان ءِ زرباری دمگان ءِ دوائی کھت ءُ انزروت ءِ ھاتر ءَ انت / رجانک : میرجلال .