بلوچ چاگرد ءِ گوزان ءُ ھمے جنجال کہ باید اِنت دلگوش گور کنگ بہ بنت +تامر

میارجل ءِ ھالرسانی بنجاہ ءِ ھالانی رد ءَ : رند چہ بازیں جنینانی کُشت کوشار ءَ بزاں سے زالبول (بلُک ءُ مات ءُ جنک ) لوگمان ءِ زامات ءِ دست ءَ ماں سیاھکان ءِ پنوچ ءَ پہ لوگمان ءِ شرپ ءُ گیرت ءِ نیمون ءَ سے سال پیسرءَ ، ءُ یک مزن شھدربرجاھی جنینیں استادے ءِ کُشگ ماں زابل ءَ ءُ چاگرد ءِ نادلگوشی گوں ھمے نوکیں پیش آمد ءَ ، دو جنک ءِ سر ءَ تیرگواری ءُ ناموسی کشت ءُ کوش ماں دشتیاری ءِ کوچگاں چہ لوگ ءَ تچگ ءِ نیمون ءَ دگہ جنینے ءِ کُشگ پہ لوگواجہ ءِ دست ءَ ماں کدیمی پلیس راہ ءِ دیم ءَ ماں پھرہ ءَ مساپرانی دیم ءَ ءُ ..... بزاں یکرندے پدءَ لوگمان ءُ وانگی ءُ دودمانی ، چاگردی ءُ نیکراھی زانتکار ءُ سیاسی کارندھان ءُ زمہ داراں ترندے گورگندے جتگ ئِے کہ مئے گیشتریں چاگرد ءِ ھال نہ وش اِنت ءُ لوٹ اِیت کہ یک دلجمیں رھشونی ءُ چار ءُ بیچارے کنگ بہ بیت . 

بزاں چوش کہ ، اگاں ما وتی چاگرد ءِ زندگ بیگ ءِ ءُ بودناکی ءِ پگر ءَ اِیں ، گڑا بایداِنت کہ اے ھرابی ءُ جیڑگ کہ مروچی بلوچ ءِ گوزوکیں چاگرد ءِ تہ ءَ گندگ بیگ ءَ اَنت سلاہ دستیں مردماں موہ دیگ ءَ چہ کہ پہ نام گیرت ءُ ناموس ءِ رکینگ ءَ یا کہ اے ھرابیانی چیر دیگ ءَ بایداِنت کہ نزوریانی بابت ءَ پٹ پول ءُ آیانی دیم ءِ دارگ ءَ توجیلے بکن اِین ءُ پہ لوگمانانی رکینگ ءَ ءُ پہ اے ڈیکی ءِ مھکم کنگ ءَ بزاں زالبولانی کارکنگ ءُ دیمروی ءَ پگرے بکن اِیں . 

پہ ستک کہ گیرت ءُ ناموس ءِ رکینگ گوں سلاہ ءِ دست گرگ ءَ ءُ بزگیں جنکانی کُشگ ءَ چہ لوگ ءَ تچگ ءِ نیمون ءَ مانا نہ بیت پرچا کہ پہ چاگردزانتی ءُ مردم زانتی ءِ پھنات ءَ پہ جنکانی چہ لوگ ءَ تچگ ءِ باوست ءَ گیش گیوار بکن اِیں ، گڑا لبز ناموس ءُ گیرت بزاں بزاں چکانی شریں تربیت کنگ ءُ مات پت ءِ زمہ داری ءُ شریں دود ءُ دابانی پھمینگ ءُ زالبولانی چیر ءُ زاھریں لوٹانی پورو کنگ لوگمان ءِ کماش ءُ لوگواجہ ءِ دلگوش پہ جنک ءُ بچکانی وانگ ءُ تربیت ءِ بارو ءَ ءُ وتی کش گوری مردمانی دلگوش داری چہ مروچیگیں جاور ءِ بازیں ھرابیاں .

پہ گیشتریں ھیالداری ءَ باید اِنت کہ اے جست ءَ چہ ھمے مردماں کہ ناموسی نیمون ءَ زالبول ءُ جنکاں کُش اَنت بکن اِیں کہ داں چہ کچ ءُ کساس ءَ وتی جرند ءِ زمہ داری پہ چاگرد ءُ وتی جنکاں کہ مروچی آیاں گیرت ءُ ناموس ءِ رکینگ ءِ نیمون ءَ گوں تیرانی رگباراں بنداَنت دلگوش گور کتگ ؟! اے بے گیرتی ءُ بے ناموسی یکیں گوں جنینانی اکلاکی ارزشانی پاد چیر ءَ کنگ ءَ ھلاس بیت یا کہ گوں مردینانی سمبال کنگ ھم ھمے باوست ءَ ھوراِنت ؟! بزاں ھما بچک کہ چوشیں کارانی کنگ ءَ ءُ پہ جنکانی رد دیگ ءَ ھوراَنت ءُ جنکاں چہ کلگ ءَ پہ مزنیں شھرانی روگ ءَ سکین دینت ءُ اے چاگرد ءِ تہ ءَ میاریگ اَنت آیانی باروءَ شما چی گُش اِت ؟! ھمے ناموسی کاتل وت ھجبر چوشیں کاراِش نہ کتگ کہ وتی سیاد ءُ وارس ءُ وتی ٹک ءِ اِزت ءُ آبروءَ بہ براَنت ؟! 
بازیں پٹ پولانی چمشانک چوش گُش ایت کہ ، زالبولانی تچگ ، ھُردیں چکانی ءُ نوک ورنایانی تچگ چہ لوگ ءُ لوگمان ءَ چوش کہ : جنگ جیڑگ ، نادلگوشی ، نشاہ ، چیریں تلاک ءُ سَون ، بے زانتی ءُ ناسرپدی چہ چیرگپتگیں داماں ماں مروچیگیں رسانکدرءَ ، لوگمانانی نادلگوشی وتی چکانی رپتارانی سرءَ اکلاکی ارزشتانی نہ پھمینگ ءُ .....
چوشیں پیش آمد پیش کاینت چہ دگہ نیمگے بایداِنت کہ دلگوش گور بکن اِیں کہ بلوچ جاور ءِ گوزوکیں روچاں ھنچو کہ اے دگہ جاورانی پیم ءَ بازیں نزوری ءُ ھرابی پیش کاینت بلے پہ اے ھرابیانی دیم ءِ دارگ ءَ لوٹ اِیت کہ ما چہ جھان ءِ کتہ کاری ءُ زندمان ءِ بُنکی شریانی وانینگ پہ ورنا ءُ نوک ورنایاں دیم ءَ جنزان بکن اِیں . 

پہ جنکانی چہ لوگ ءَ تچگ ءِ ءُ ناموسی کُشت ءُ کوشانی کہ مروچی مئی چاگرد ءِ مستریں ھرابی اَنت کم کنگ ءُ دیم ءِ دارگ ءَ لوگمان ءِ ءُ چاگرد ءِ جاندراھی ءَ گوں جھل ءِ بنگپاں دلگوش بکن اِیں : 
الپ ۔ جنگ جیڑگانی دیم ءِ دارگ کہ پہ جنیناں پیش کاینت گوں دلجمیں ءُ مھکمیں ھکم ءَ ھمدپ نہ اَنت اے باندات ءَ بایداِنت کہ زانتکار ءُ لوگمانی سوھوئیں چاگرد زانت ءُ روان زانت پٹ پول بکن اَنت گوں نوکیں جاور ءِ وانگ ءُ دربرگ ءَ بزاں ایران ءِ گوزوکیں جاور ءُ ھاس  بلوچانی دود ربیدگی چاگرد ءِ باروءَ چار بیچار بکن اَنت ءُ لوگماناں شریں رھشونی یے بکن اَنت . 

ب ۔ چو کہ مروچیگیں کانودانی درد نہ ورگ اے جیڑگاں گیش گیوار کت نہ کن اَنت ، دیم دارگی کانود ءِ نہ بیگ ، ناموسی کُشت کوشانی کاتلانی نہ گرگ اگاں لوگمان ءِ مستر ءُ کماش بہ بنت دیمترءَ ٹک ءُ کومانی جنگ ءُ جیڑگاں دیم ءَ بارت  پد ءَ ھمے دود کہ ناموسی جیڑگانی سُھل ءُ تران کہ گوں کماش ءُ ٹکانی مزنیں مردماں بنت ءُ کاتل مجازات نہ بنت  ءُ مردمانی دزرسی پہ سلاہ ءَ ھاس ھما مردمانی کہ چاگردی ءُ روانی نادراہ اَنت . ھمے چیز ماں سنتی چاگرد ءَ جنینانی کُشت کوش ءَ گیش کن اَنت من چہ استان ءِ جھگیراں لوٹ کن آں کہ گھتراِنت پہ دلجمی زالبولانی ایمنی ءِ کانود ءَ کہ یک سالے بیت ماں مجلس ءَ مھتل اِنت دیم ءَ بہ براَنت . 
ج ۔ دیم گیری مراگشانی برجم دارگ چو کہ : وانینگ ءُ پھمینگ لوگمان ءِ پہ چکانی رودینگ ءُ تربیت ءَ گوں نوکیں دروشم ءَ اکلاکی ارزشتانی پھمینگ ماں چاگرد ءِ ھر پھنات ءَ ھاس ماں استان ءِ کوچگ ءُ کلگاں ءُ چاگردی زمہ داری پہ لوگماناں پہ وتی چک ءُ پدریچاں چہ وانگی ءُ دودمانی بُنجاھاں بزاں سرجمیں دولتی بنجاھانی ھمکاری ءُ ھمکوپگی لوٹ اِیت 

رجانک : ملاچمل