بلوچ اِزمکاریں بانک ءِ گپ ءُ تران پہ بلوچ جنکانی جھد ءُ ھاٹیگانی بارو ءَ/ پاتمہ بارکزھی : بلوچ زالبو

چہ میارجل ءِ ھالرسانی بنجاہ ءِ ھال ءِ گوشگ ءِ پد ءَ : اِزم ءُ ھنر چہ بیتوک ءِ وھد ءَ گوں بلوچ جنکانی اَرواہ ءَ ھمگرنچ اِنت ۔ بزاں چہ ھما وھد ءَ کہ پُر نکش ءُ نگاریں ءُ سیچن دوچیں گُد ءُ پوشاک گور ءَ دیگ بنت گوں رنگ ءُ نکشاں ھیل زیراَنت ءُ اِزم ماں آیانی ھون ءُ رگانی تھا جاری بیت.

پاتمہ بارکزھی اِزمکاریں جنکے کہ آئی ءَ بازیں نکش ءُ زیبداریں چیز جوڑ کتگ ءُ گوں وتی دست ءِ اِزم ءَ پہ جوانیں دروشم ءَ ماں سوشل میڈیا ءَ زانگ ءُ پجاہ آرگ بیت 
ما دیم پہ اے بلوچ جنک ءِ نیمگ ءَ شتگ اِیں ءُ سھتے آئی ءِ مھمان بیتگ اِیں داں کہ گوں آئی ءِ اِزم ءُ ھنر ءَ گیشتر پجاہ آروک ءُ زانتکار بہ بئیں 

پاتمہ بارکزھی ءَ گوں میارجل ءِ گلگدار کنوکاں گوشت : من چہ شانزدہ سالی ءَ ھنرستان ءِ وانگجاہ روگ ءَ ءُ گوں رشتہ گراپیک ءِ گچین کنگ ءَ وتی کار پہ دلجمی ماں اے پڑ ءَ بزاں بُت کشی ءَ بنگیج کتگ ءُ گوں وتی لوگمردمانی دلبڈی ءَ ءُ وتی استاد واجہ ابدلستار شھنوازی رھشونی ءَ اے اِزم ءُ ھنر جوانیں دابے ءَ ھیل کتگ ۔

دیمتر ءَ آئی ءَ گوشت : من چہ درستیں اِزمگراں لوٹ آں کہ ماں ھر امرے ءَ گوں ھر جنسیتے ءَ بزاں جنین ءُ مردین پہ وتی زانت ءُ زانتکاری ءِ شوھاز ءَ  بہ رواَنت ءُ چہ ھچ کوششت ءُ تلاشے ءَ وتی دست ءَ مہ داراَنت  گڈسر ءَ آئی ءَ پہ وتی جند ءِ ھمسروکاں گوشت :اوشت ءِ آماچ مہ بنت ءُ ھر وھد ءَ پہ وتی مرادانی رسگ ءَ ءُ پہ وتی ھیالانی پورو کنگ ءَ وتی گاماں تیز بکن اَنت ۔