بانکاں بلوچستان ءِ دود ءُ ربیدگی دیمروی ءُ آبادی ءِ توک ءَ ھاسیں کارِستے ھست اِنت اِش / مرچیگیں جنک

میارجل ءِ رسانکدر ءِ بُنجاھی ھال ءِ پد ءَ : بلوچستان چار جتائیں دود ءُ ربیدگ ءِ ڈیک ورگ ءِ جاگاہ اِنت کہ ایرانی ءُ اربی ءُ ھندی ءُ اِیشیائی ربیدگ اَنت کہ چہ نزیکی ءِ سوب ءَ چہ ھریکے ءَ چہ اِے دود ءُ ربیدگاں ، بازیں چہ لیکھاں ، ھیل ءُ آدتاں ، رپتار ءُ کرداراں ماں بلوچ ءِ دود ءُ ربیدگ ءِ توک ءَ ودی بوتگ اَنت ۔

وھداں بلوچاں گوں وتی کش ءُ گور ءِ ھمساھگاں آ وڑیں رو ءُ آ نہ بوتگ ءُ آ چیزے کہ چہ داستان ءُ لچھاں گندگ ءُ اِشکنگ بیگ اِنت جنین ءِ زندمان ءِ جاور چہ دگہ چاگردانی ھساب ءَ شرتریں زند ئِے بوتگ بلے ایشکہ اے گپ ءَ نہ باید چہ سسا ءَ دور بہ کن اِیں چہ پیشگیں باجنانی پھر بندی ءَ ھور مرچی گیشتر جھد بہ کن اِیں کہ پیشگیں کمی ءُ تنک لیکھی ءِ دور کنگ ءَ باید گام چِست بہ کن اِیں ۔

مرچیگیں چاگرد چہ رو ایرُشتی ءُ ھِندی ءُ اَربی دود ءُ ربیدگ ءِ اُرش ءَ چہ دل کَشیں دود ءُ ربیدگ ءَ دیر اِنت ءُ دیر بوتگ ۔بلوچ چاگرد ءِ سَسّا ءِ ءُ پگر ءِ سان مندی چہ ھند ءِ ھزار دروشمیں ڈیھ ءِ دود ءُ ربیدگ ءِ بیڑ ءُ اُرش ءَ اِنت ۔

ھمے وڑ ءَ آپریکا ءُ ایشیا ءِ راہ سر ءَ بیگ ءَ کہ بلوچستان زرھریدیں بندیگانی گْوز راہ بوتگ ءُ لھتیں سوب کہ نزوریں ربیدگی لیکھانی جوڑشت ماں بلوچستان ءَ سان مند بوتگ اَنت.

ماں بلوچ چاگرد ءَ بانک ، واجہ ءَ گوں کوپگ ماں کوپگ ماں زندمان ءِ سرجمیں پِڑ ءُ میداناں ھمپگر ءُ ھمگام بوتگ ءُ رند چہ کش ءُ گور ءِ نزوریں پگری جوڑشتانی سوب ءَ ءُ اسلامی ھور ءُ توریں چاگردی پگر ءُ لیکھاں ، ءُ چہ مردین ءِ وَتمَنّی ءَ ءُ پِت واجھی ءِ چاگرد ءِ سوب ءَ سان مند بیتگ کہ واجہ ءُ بانک ءِ میانجی ءَ مھریں گروہ بندی جوڑ بیتگ اَنت ۔

ماں شاھگانیں بلوچستان ءَ بژنے گپے اِیش اِنت کہ ھِچ کار ءُ آبادی ءِ وڑ ءُ پیم کہ ملک ءِ دیمروی ءِ ھم اندازہ ءُ دپگ بہ بیت  گندگ نہ بیگ اِنت ، جوڑشتی مزنیں کارگس ماں اِے استان ءِ توک ءَ چہ دست ءِ لنککاں کم تر اَنت ، بس کمیں شمار مردماں یکجاھی سابتیں آمدنی ھست گیشتریں مردمانی آمدنی ءُ سِیت ءُ مُزّ چو روچ ئیگ اِنت یا آب ءُ ھوا ءُ کشت ءُ کشار ءِ سوب ءَ یا دولت ھمے کمینانی سر ءَ زند گوازینگ اَنت ۔ مئے سرڈگار ءِ مردین دین ءِ رھبند ءِ پابند اَنت ءُ جنیادم ءِ بستار ءَ زان اَنت ۔

مردم ءُ مئے مردین ماں بلوچستان ءَ چہ دینی ءُ مزھبی پنت ءُ سوجاں سان مند اَنت ءُ پمیشکا ھاسیں جاگھے پہ جنین ءَ کہ پہ چُک آری ءُ مات ءِ بیگ ءِ سوب ءَ ماں بلوچانی گور ءَ ھست اِنت اِش ، آ شری ءِ سر ءَ سرپد اَنت کہ سرجمیں زمہ واری ءُ کارست ھدا ءَ پہ بانکاں داتگ اَنت ، مات کسانیں ھدا اِنت ، گڑا بلوچ ءِ مردین کہ روہ ءُ روان ءِ سلامتی ئِے بہ بیت ءُ تچکیں مسلمان ءُ ایمان دارے بہ بیت گڑا وتی لوگیگ ءُ گوھار ءُ مات ءِ سر ءَ زلم نہ کنت گڑا بزانکہ جنین ءِ ارزشت ءُ جاگاہ بلوچ ءِ گور ءَ سک مزن اِنت کہ بلکیں اِے بارو ءَ راجدپتری باجنانی داستان ءُ کِسّو ءُ گپ ءُ گپتار چہ اَھدیگین ءُ پیریناں بار بار گوشگ بیگ اَنت ءُ پشت کپتگ اَنت ۔

بلوچستان ھم چو ایران ءِ گیشتریں جاگھانی وڑ ءَ نگیگی ءُ چاگردی کمی ئِے تجربت کُتگ اَنت بلے راستی ایش اِنت کہ چاگردی کارست ءُ جنینانی جاگاہ ماں سرجمیں بلوچستان ءَ چو سجوئیں ایران ءِ داب ءَ چہ باستان ءِ دَوراں دانکہ اسلام ءِ آیگ ءَ ءُ ھمے انی ھم مزنیں بستار ءُ جاگاہ  ئِے ھست ۔

ماں اِے آبریچ ءُ آبند ءَ پہ جنین ءِ ارزشت ءُ بستار ءِ بارو ءَ لھتیں گپ ءُ بتل ھست اِنت کہ چُش اِے وڑ اِنت :"چادر جنین ءِ میار اِنت " کہ اِے بتل ءَ ھاسیں کلوھے پہ وانوک ءُ اشکنوکانی واست ءَ ھست اِنت ئِے ءُ شری ءِ سر ءِ جنین ءِ پُر بستاریں مکام ءُ مزنیں جاگہ ءَ ماں اِے آبریچ ءَ ماں استان ئیگ ءَ پیش دارگ اِنت۔

"میار" پہ اِے بزانت ءَ اِنت چشکہ مزنیں جنگ ءُ جدلے پیش بئیت گڑا جنین میانجی گری بہ کنت ءُ وتی چادر ءَ پچ بہ کنت ، جیڑگ ھلاس بیت ، یا اگاں مردے جرم یا کوشے ءِ سوب بہ بیت گڑا آئی ءِ سر ءَ کوش ءِ کیاس ءُ ملام کنگ چہ کازی ءِ نیمگ ءَ واجبی بہ بیت ءُ اگاں تچگ ءِ وھد ءَ جنینے ءِ باھوٹ بہ بیت چو بی امن ءُ امان اِنت  ، ھَژدری نہ اِنت کہ آ جنین نام کپتگین ءُ پجاہ آورتگینے بہ بیت ھمے بس کہ جنینے بہ بیت ءُ اِے جنین ءِ ارزشمندی ءِ کلوہ ءَ سر کنگ اِنت ۔

گڑا لھتیں کمی ماں جنین ءِ میدان ءَ ماں اِے سالاں بوتگ چشکہ وانینگ ءُ بھداشت ءُ سلامت ءِ توک ءَ بوتگ ءُ مچانکیں چاگردی میدان ءَ اِے کمی ماں بلوچستان ءَ کمتر بوتگ اَنت ءُ ایشی ءَ گوشت کن اِیں کہ نہ باید جنینانی ڈالچاری ءَ یک دیدانکے ءَ بہ چار اِیں ۔