آمنہ رئیسی : بلوچستان ءِ کَلُکِیں کَپَل شموشکاری ءِ اَرجان اِنت/ واکدار مئے نیمگ ءَ ھم نیم چمّے بچار

چہ میارجل ھالرسانی بُنجاہ ءِ ھال ءِ رِد ءَ ماں کلُک ءِ میتگ ءَ کپَل ءِ جوڑ کنگ دیریگیں گْوستانکے ءِ واھُند اِنت ءُ چرے دمگ ءِ ربیدگی ساچشتان اِنت. اے دمگ ءِ کپل چہ مُلک ءُ کشور ءِ کْوھنیں ءُ یکتائیں کپلاں شمار کنگ بیت ءُ ھستیں گْواھی ءُ نشانیانی رِد ءَ، چُنت ھزار سالی گْوستے داراِیت. 

اِیشی ءِ جوڑ کنگ ءِ رھبند اِے رنگ ءَ اِنت کہ بید ء کاراَوزار ءُ کَپل جوڑی  چَھر ءِ کمک ءَ بس گوں دست ءَ جوڑ کنگ بیت ءُ آئی ءِ نکش ءُ رَند گوں آپ ءُ گِل ءِ مینگ ءُ ساچکار ءِ دست ءِ ھنر ءَ جوڑ بیت، دمگ ءِ کپل ساچ (سپالگر) ءُ ھنربلدیں جنین گوں دست ءَ تھر تھریں دَرپ چوش کہ کُمب، دیز ءُ رنگ پہ رنگیں کونزگ ءُ آپدان جوڑین اَنت ءُ دیم ءَ کار اَنت. گْوستگیں ھالانی بنیاد ءَ ماں وَڑ وَڑیں رسانکاں، واکدار ءُ اُگدہ داراں پرے ھنر ءِ زندگ دارگ ءُ شاھگانی ءَ بازیں کَول ءُ پیمانے داتگ. 

چوشکہ کسرکند ءِ پیسریگیں پرماندار کوروش مھمدی ءَ سال 92 ءَ ماں یک گِند ءُ گِدارے ءَ کَول داتگ بوتگ کہ اَلّمی ئیں آسراتیاں پہ یک سر ءُ سامان گپتگیں کارجاھے ءِ تیاری ءُ اے میتگ ءِ سپال ءِ پَجّار  ءِ دیم ءَ آرگ ءَ کارے بکنت ءُ دگہ ھزاران کَول ءُ کرار کہ دْرست چو دْروھاپے ءَ چہ دزرس ءَ دور گندگ بنت.

دیم ءَ ما  آمنہ رئیسی یکّے چہ اے تھر ءِ ساچکارانی درد دل ءِ گوش دارگ ءَ نشتگیں کہ شمئے چمّ ءُ دید ءَ گْوز اِیت.

وتی پَجّار ءَ بکن اِت؟

من آمنہ رئیسی، سِند 50، ماں  شھرستان کسرکند ءَ، کلُک ءِ میتگ ءِ جھ مننداں ءُ سپالگری ءِ ھنر ءِ پِڑ ءَ سپالگری ءِ رھشون ءُ رُدومکار ءِ بستار ءَ جھد کنگ ءَ آں.

چہ وتی ھنر ءُ آئی ءِ کْوھنگی ءِ بارہ ءَ بگش اِت؟

اے ھنر ءِ رگ ءُ ریشّگ ءَ  راجی ءُ دمگی گْوستانک ءِ تل ءُ توکاں باید بگندیں، ھر جاگہ ءَ کہ بلوچ جنینانی رندپدے گندگ ءَ کیت کپل ساچی ءِ اِزم ھم اود ءَ وتی مزنی ءَ پیش داراِیت، من اے ارزشمندیں ھنر وتی مھربانیں مات ءِ ساھگ ءَ دربُرتگ، چہ راز ءُ رمز ءَ چَکاریں ھنرے ءُ بس گوں ھنرمندیں ءُ توانائیں سرپنجگاں جوڑ بیت ءُ گوں مشین ءُ چھر ءُ اے دگہ اَوزاراں سْیادی نکنت، سپال ءِ وڑ ءُ پیم چہ ربیدگی ساچشتان اِنت ءُ دست ساچ اِنت ءُ ماں اے میتگ ءِ سپال ءِ جوڑ کنگ ءِ کْوھنی سَے ھزار سال ءَ رَوت ءُ سر بیت ءُ چہ کشور ءِ یکتائیں سپالاں شمار کنگ بیت، اے سپال ءِ  جوڑ کنگ بید ء سپالگری چَھر ءُ کاراَوزارانی کارمرز کنگ ءَ، تھنا گوں دستاں جوڑ کنگ بیت ءُ سپال ءِ نکش ءُ نگار گوں گِل ءُ آپ ءُ سنگ ءِ مینگ ءَ گو‌ں ما سپالگرانی وتی دست ءَ نگارینگ بنت.

اے دستی ساچکاری ءِ اَنّوگین جاور ءَ چون گِند اِت؟

اے دیریگیں ھنر، چنت ھزار سالی گْوستے ءِ واھند بوگ ءَ باوجود،چہ نْیادی ءُ بھا ءِ بازار ءِ نیستی ءُ سپالگری کارجاہ ءِ نہ بوگ ءَ، ناھچّی ءِ برابر ءَ اِنت ءُ ویل اِنت، ما کسرکند ءِ سپالکار چہ راجمان ءِ نزوریں ٹَکّ ءَ اِیں ءُ مارا کارجاھے ءِ بندگ ءِ ھاٹیگ ءُ توان نیست، ما ربیدگی دْروشم ءَ یک چُنت متری کسانیں جاھے ءَ رنگ رنگیں دَرپ جوڑینیں ءُ گوں کمُّکیں نھادے ءَ ایشاں بھا کنیں. اے کار گوں واکدارانی دلگوش دیگ ءُ پرائی ءَ اَلّمیں بھر گیشّینگ، اے پڑ ءَ کارجاھانی راہ پِرّینگ، اے باندات ءَ کسب ءُ کار ءِ سبزگ ءُ پاداریں کار پہ چندے لوگمان ءَ بیت ءُ ھمے پیم  ماں کلُک ءَ  سپالگری ءِ ساچکاری ءِ دیمروی ءِ سوَب بیت.

چونین پیشنھاد ءُ گپّے گون اے پِڑ ءِ واکدار ءُ مستراں داراِت؟

باید گوں کمک کاری ادارہ ءِ پیم کنگ ءُ کارجاہ ءِ جوڑینگ ءُ بے بھرہ ئیں آسراتیانی پیش کنگ ءُ سَیل جاہ ءِ برجم دارگ ءَ چہ ما ساچکاراں پشتیبانی کنگ بہ بیت، اَلبت نہ گوں سیل جاھی دْروشم ءَ کہ ما پیسر ءَ اے کار کتگ ءُ گوں مولّیں تاوان ءَ واتر آتکگیں، اُگدھانی واھُند باید جْوانیں جاھے پہ اے ھنری ساچشتانی ساٹگ ءُ پھریزگ ءَ بگیشّین اَنت اگاں نہ گُڑا اے سپالگری ءِ ارزشمندیں ھنر شموشگ بیت ءُ دیم ءِ پدریچ چرے گنج ءَ زبھر بنت.

تو وت گوں سپال ءَ چونیں چیز جوڑین ئے؟

تھرتھریں کْوھنیں سپالی دَرپ چوش کہ رنگ رنگیں کُمب ءُ ماٹی، آپواری ءُ چُلّی دَرپ ءُ رَزان، دیزی دَرپ، بوسوچ، چُکّی لیبوک، لوگ ءِ سمبھینگی اَزباب، وڑ وڑیں کونزگ کہ رنگ رنگیں ساچانی تہ ءَ اَنت.

چہ مستر ءُ واکداراں پشتیبانی ءِ وداریگ اِت؟

ھو، ما سپال ساچیں ھنرمند اَگاں پشتیبانی کنگ مہ بئیں اے ھنر ماں اے سرزمین ءَ مراِیت ءُ دودمانی میراس ءِ ادارہ ءِ پشتیبانی باید گیش ءَ چہ گیشتر بہ بیت، اگاں اے ھنر ماں دمگ ءَ زندگ بہ بیت، میتگ ءِ مردمانی زَرجاور ھم شاھگان بیت.

رجانکار ۔ جنید بلوچ