میرکمبر ، بلوچ راج ءِ گیرت ءِ مزنیں بامرد

چہ میارجل ءِ بنجاھی ھالانی رد ءَ ; میرکمبر ، سلیمان ءِ سولیں بَچّ ، گِہ ءِ دمگ ءُ بنت ءِ آپسرانی یکّے چہ گھورت ءُ بھادریں مردمان انت کہ وتی آپریچ ءِ ورناھانی ھمراھی ءَ گوں پہ وتی ھند ءِ بَزّگیں مردمانی رَکّینگ ءِ ھاتر ءَ ، زلم ءُ زوراکی ءِ دیم پہ دیمی ءَ نمیران بوت . 

واجہ ایرج اپشار سیستانی ماں وتی نبشتگیں " بلوچستان ءُ آئی ءِ کُوھنیں بودناکی ان " ءِ کتاب ءَ میر کمبر ءِ کسہ ءَ چہ ۳۹۲ می تاک ءَ بنگیج کتگ .

ماں " دِھان ءِ کَلَّگ ءَ کہ گِہ ءِ دمگ ءِ یک آپریچے انت سلیمان نامیں مردمے زِند گوازینتگ کہ آئی ءَ کمبر نامیں زَھگے بوتگ . سلیمان چہ وتی کَسان سالی ءَ گھورت ءُ مھروانیں مردمے ات . ورناھی ءِ اُمبر ءَ کہ توہ بوت ، راجدوستی ، آجوئی پسندی ءُ مھروانی ءِ ستاھانی سر ءَ پُر نام ءُ توار ءُ راج ءَ را آئی ءِ سر ءَ ستک ءُ مَنَّگ بوت . کمبر مدام بَزَّگیں مردمانی پَلّوگر ءُ وار ءُ زبھرانی دوزواہ ات .

اے سر وھد ءَ بلوچستان انگریزانی سامراج ءِ چیر دست ءَ ات ءَ ھمے دَرگَتان مھراب ھان نامیں ھاکمے سراوان ( شستون ) ءِ دمگ ءِ سردار ءُ یک جنگولیں رُمبے کہ انگریزانی چیر دستی ءَ کار کنگ ءَ ات چہھمے سردار ءِ زمہ ءُ ڈوبہ ان ات .

وھدے کہ مھراب ھان ءِ جنگولیں رُمب بنت ءِ آپسراں آتک انت ءُ ملوران ءِ کلّگ اش ھول ءُ چول کُت ، لھتے چہ جنین زھگ ءُ زالبولان ءَ ھم بندی اش کت ءُ گوں وت ءَ بُرت اش گڑا ملوران ءِ مردماں میر کمبر ءِ پانَگ ءَ آتک انت ءُ آئی ءِ پلّو ءِ لوٹوک بوت انت ، ھمے ھاتر ءَ میر کمبر اوں جَزم بوت کہ مھراب ھان ءِ جنگ ءُ مڑ ءَ بہ روت ءُ گوں بندیگانی آجو کنگ ءَ مھراب ھان ءَ گوش پونڈے بہ دنت . میر کمبر اے میڑ ءِ ھاتر ءَ لھتے چہ ملک ءِ ورنا ءُ وتی سیاد ءُ وارِسیں مردمان ءَ سِلیھ بست ءُ پہ جنگ ءَ تیار بوت . میر کمبر رند چہ جنگ ءِ تیاری اں پہ رُکست ءِ گِرَگ ءَ وتی پت ءُ مات ءِ کِرّ ءَ شُت . آئی ءِ پِت ءُ مات ءَ گُوَشت ; دانکہ مُلک ءِ بندیگیں زالبول ءُ دُتّگان ءَ چہ مھراب ھان ءِ جنگولیں رُمب ءِ دست ءَ آجو نہ کتگ ترا واپد آیگ ءِ موکل نیست .

کمبر وتی جنگولیں براھندگان گوں مھراب ھان ءِ رند ءَ کپت ءُ سُدیچ نامیں کلّگے ءِ ھدّات ءَ مھراب ھان ءِ راہ ءَ را بست ءُ آئی ءِ سر ءَ کلوئے راہ دات کہ کَلَّگ ءِ درھیں جنین زھگ ءُ زالبولان ءَ گوں درستیں ھول ءُ چول کتگیں سامانان ءَ واپد بہ کنت . مھراب ھان ءِ دل ءَ جہ اے کلوے ءِ اش کنگ ءَ بیمباھے ماں کپت ءُ پسّو دات کہ پہ اشانی نیم بھر کنگ ءَ تیار انت ، بلے میر کمبر ءَ اے پسو نہ مَنّ ات . اے درگت ءَ ، مھراب ھان گوں گورناکیءَ چہ میر کمبر ءَ جُست گپت کہ ; اے کئے انت مئی راہ ءِ سر ءَ ؟ کمبر ءَ پسو دات ; اے کمبر انت ءُ بَزَّ کار . مھراب کہ چہ میر کمبر ءِ گھورتی ءُ ڈڈّی ءَ سرپد ات ، گوشت کہ ; کمبر بَزَّ کارے نہ انت ، بنت ءُ دِھان ءِ واجہ انت . 

رند ءَ ، میر کمبر ءَ دَرّا ئینت کہ درھیں بندیگیں مردمان ءَ زوت ءِ سر ءَ یلو کن بلے مھراب ءَ اے کار نہ کت ءُ گوشتی کہ بندیگیں مردمان ءُ ھولانچیں مالانی نیم ، تئیگ ءُ دگہ نیمے منیگ ئے بہ بنت . میر کمبر چہ اے پسو ءِ اش کنگ ءَ ھژم گپت ءُ گوشت : زاناں کہ بندیگ انت تئی بلے مات ءُ گُھار انت کُلّ منی .

ھمے درگت ءَ آھانی شم ءَ گرانیں جنگ ءُ مڑے ماں گپت ءُ میر کمبر ءِ جنگولیں ھمبلاں مھراب ءِ جنگی رُمب ءِ سر ءَ ھلابَوش کت ءُ بندیگیں زالبولان ءَ چہ جنگ ءِ پٹّ ءُ میدان ءَ در کَشّ ات انت ءُ یک جنگولیں ھمبلے ءِ ھمراہ ءَ دیم پہ ملوران ءِ کلّگ ءَ راہ دات انت . 

جنگ ءُ میڑ انگت ءَ یک شل ات کہ اناگت ءَ چہ آزمان ءَ گرانیں ھورے وتی گوارگاں بندات کت ، میر کمبر ءِ جنگولانی جنگی سلیھاں کہ باروتی توپک ات انت چہ ھور ءِ تر بیگ ءُ میسگ ءِ ھاتر ءَ ناکار بوت انت پمیشکا آھاں وتی پادمٹی ءَ زھم ءُ کاٹارانی گوم ءَ رندگیر کت . ھمے وھد ءَ مھراب ءِ یک جنگی مردمے چہ ھور ءِ گوارگ ءِ ھاتر ءَ کوھی ھونڈے ءِ تہ ءَ پتر ات دانکہ چہ تَر بَیَگ ءَ ایمن بیت ، ھور ءِ تم جَنَگ ءَ رند ، مھراب ءِ ھما جنگولیں مردم چہ کوھی ھونڈ ءَ در کپت ءُ کمبر ءِ سر ءَ ( کہ انگت ءَ جنگ ءُ مِڑَ ءَ گلائیش ات ) اُرُش آرت ءُ میریں کمبر ءَ را شھید ءُ شھمیر کت . چہ کمبر ءِ شھمیری ءَ پد ، مھراب ءِ رُمب کہ چہ آئی ءِ کوشارینگ ءَ گلابال ات انت ، میر ءِ جنگولانی سر ءَ دگہ ترُندیں اُرُشے آرت .

کمبر ءِ جنگولیں ھمبلان وتی ساہ ءِ گُڈّی درگت ءَ جنگ ءِ میدان ءَ مِڑ اِت ءُ درھیں شھمیر ءُ نمیران بوت انت . چدءُ پد ، میر کمبر ءِ دلیری ءُ گھورتی ، بلوچستان ءِ درھیں دمگانی تہ ءَ نام کپت ءُ بلوچ راج ءِ ستاھانی درور بوت . بلوچستان ءِ اے گھمرد ءِ مانشجاہ ماں بِنت ءِ شھر ءُ دھان ءِ راہ شمگ ءَ انت . بنت ءِ شھرداری ءُ اسلامی شورجاہ ءَ گوں وتی ھوری ءُ ھم سَنَتی ءَ میر کمبر ءِ بُت ءَ ساچگ ءُ تیار کتگ ءُ اے شھر ءِ یک پٹّ ءَ میدانے ءِ تہ ءَ ھمے نامدات ءِ سر ءَ مک داتگ . بلوچستان ءِ گِھیں بامرد ، میرکمبر ءِ مزن لیکی ءِ مراگش ءِ دومی سالدپ ماں بِنت ءِ شھر ءَ . بلوچستان ءِ بے مٹّ ءُ بے دروریں بامرد ءِ مزن لیکی مراگش ءِ دومی سالدپ گوں ھلاکہ ءِ لھتے چہ ازمی ءُ چاگردی جھدکارانی بھرزوری ءَ ماں بنت ءِ شھر ءَ کہ گہ ءِ دمگ ءِ ھند ءَ انت برچم دارگ بوت . اے مراگش ءِ رد ءَ پھرہ ءِ جھگیر ماں اسلامی مزن شورجاہ ءَ میر کمبر ءِ مراگش ءِ دومی سالدپ ءِ درگت ءَ گوشت کہ مروچی رند چہ ۲ کرن ءُ سدی ءِ گُوَزگ ءَ ، آ مول ءُ مراد کہ ما را اے ملک ءِ تہ ءَ نَزّ آرتگ . میرکمبر ءِ گھمردی ءُ دلیری ءُ راجدپتری ءِ ھما بستار انت کہ ھچ برءَ زوراکی ءُ زورانسری دیم ءَ سرجھلی ءَ نہ سگّ اتگ ءُ وتی شیرکنیں جان ءَ پہ وتی ازّت ، منگھی ءُ وتن دوستی سر ءَ ندر کتگ . واجہ درکشان ( درخشان ) ءَ گوشت ; ھما شرّیں پنت ءُ سوجاں کہ میر کمبر وتی لوگمان ءِ تہ ءَ آھانی گوم ءَ ٹوہ بوت ءُ ردوم گپت آئی ءَ را انچوشیں راھے ءِ رَوَگ ءَ شون دات کہ راج ءِ مردماں آ بستارانی ھاتر ءَ وتی سر ءَ پھر بند انت ءُ میر کمبر چہ ھمے ھاتر ءَ بلوچ راج ءِ درھیں پدریچانی کِرّ ءَ ابدمان انت . واجہ درکشان ءَ گیش کت کہ بلوچستان ءِ وڑ وڑیں دمگانی تہ ءَ نامداریں بامردانی کارستاں پدّر انت ءُ امیت انت کہ ما ھم آھانی بامردی ءُ وتن دوستی کِردانی زَبریں پد گرے بِہ بَہ ایں . ‌اے واجہ وتی گپانی دگہ بھرے ءَ گوشت ; میر کمبر ءِ وڑیں بامردانی کرد ءِ کیمت ءَ وتی زرد ءِ تہ ءَ بہ دارین ءُ گوں وتی ازمی کاران ءُ نبشتگیں کتاباں ، آھانی زندمان ءِ بارو ءَ ، سرپدیں میراس دارے ءِ پیم ءَ اے میراس ءَ وتی دیمی پدریچاں سر بہ کن ایں . گِہ ءِ دمگدار ءَ اوں اے مراگش ءِ تہ ءَ گوشت ; اگاں مروچی ما میر کمبر ءِ کرد ءَ مزن لیکیں پہ اے ھاتر ءَ انت کہ آئی ءَ گرانیں بھائے پہ وتی راجدوستی ءُ وتن دوستی ءِ سر ءَ داتگ . اے واجہ وتی گپان ءِ گیشتریں بھرے ءِ رد ءَ گوشت کہ میر کمبر چہ اسلام ءِ نیکراھی ءُ امام ھسیں ءِ شھمیری کارستانی ھاتر ءَ زلم ءُ زوراکی ءِ ھلاپ ءَ جہ جت ، میر کمبر ءِ مکہ ایں مات ءِ پنت ءُ سوج ءُ رودینگاں ھم اے پڑ ءَ باز اسر مند بوتگ . گِہ ءِ دمگدار ءَ وتی گپانی دگہ بھرے ءِ تہ ءَ درّا ئینت کہ اے ھند ءُ دمگ ءِ درھیں کارگسانی اگدہ دار ءُ ملک ءِ زمہ واران ءَ زلورت انت کہ ھند ءُ دمگ ءِ دوئیں بامردانی ( میر کمبر ءُ سبیل اھلاکی ) مزن لیکی ءِ پلامرزی ءَ کتابی دروشم ءِ سر ءَ بہ کن انت . ( آھر سر ءَ ) واجہ عظیم شہ بکش ، شھدربرجاھی ندکار ءُ پتّ ءُ پولکاریں زانتکارے ءَ گوں میر کمبر ءِ دور ءُ باریگ ءِ تپاکانی یات کنگ ءَ گوشت کہ اے گھمرد ءِ رَیش ءُ بستار ، چہ بنت ءِ ھما دور ءُ باریگ ءِ چاگرد ءِ مردمانی دربرگی ءُ دود ءُ روبیدگ ءِ کٹّ ءُ بروردانی ھاتر ءَ انت کہ چہ وتی ھما گوستاک ءِ اَسَر مندی ءِ سَوَب ءَ وتی راجدپتر ءِ پیسری کارستان ءَ پدا پَدّر ءُ پرّام بہ بہ کنت

رجانک : میرجلال