آشا ناروئی ءِ جھد چہ دو و میدانی ءِ کمک کارمستری ءَ بہ گر داں پہ مدرسہ دینی ءِ دیم ءَ برگ ءَ برجاہ اِن
چہ میارجل ءِ رسانکدر ءِ بُنجاھی ھال ءِ نیمگ ءِ : آشا ناروئی مدنی ءُ سیاسی لیڈر ءُ جھدکارے ءُ یک ربیدگ کار ءُ زانوگر ءُ زانتکارے ماں پھرہ ءِ زانوگرانی مُچّانک ءُ مِیانجی ءَ ھاسیں جاگھے پہ وت ءَ ھست اِنت ئِے ، گوں دلجمی ءُ سَدکّی گوشت کن اِیں کہ اِے بلوچ بانک ءَ چہ بازیں مردیناں گیشتریں جھد ءُ کار ئِے ماں بلوچستان ءِ مُچانک ءُ چاگرد ءَ ھست اِنت ئِے ۔
ماں میارجل ءِ گپ ءُ رپانی دیمتر ءَ گوں بلوچستان ءِ اِے جھدکار ءُ ھگواھیں بانک ءِ گلگدار ءَ وان اِت ۔
کمے چہ وت ءَ بہ گوش اِت؟
منی اُمر دہ سال بوتگ کہ سوروں کتگ ءُ دوازدہ سالگی ءَ مات بوتگ آں وھدے کہ منی زند دیم ءَ روان بوت ءُ وتی چک مزن کت اَنت گڑا چہ لوگواجہ ءَ اجازت گپت دانکہ مدرسہ دینی ءِ توک ءَ شتاں پہ لوگمان ءِ کانود ءِ مھکمی ءِ ھاتر ءَ ءُ چاگرد ءِ زیانانی دیمپانی ءِ واست ءِ شور ءُ مشاور ءِ زمہ واری وتی کوپگاں زرت ءُ ایشی ءَ ھم گیش کناں کہ دو و میدانی ءِ کمک کارمستری ءَ ماں پھرہ ءِ شھر ءَ گِچین بوتگ آں ۔
چاگرد ءِ مچانکاں دگہ بازیں جُھد اِت ھست ، تئی مول ءُ مراد چہ اِے جھد ءُ تچ ءُ تاچاں چے اِنت؟
من آتکگاں دانکہ پیش بہ داراں کہ بانکانی توانائی ءُ ھاٹیگ چہ مردیناں گیشتر اِنت ءُ مردین مئے پشتیبانی ءَ دیمروی کنگ اَنت ، بھتام جنگ ءِ نیتوں نیست اِنت کہ بہ گوش آں مردین کم تر اَنت بلے راستی اَنچُش اِنت ۔ مردین چہ آدم ءَ بہ گر دانکہ انی مئے جنینانی مدت ءُ کمک ءَ دیم ءَ شتگ اَنت ءُ مردین گوں جنینانی اوپار ءُ تھمبل ءُ ھوشناکی ءَ جاھے رس اِتگ ءُ گوشگ اَنت اِش ، مرد ! ءُ انی ھم اگاں آیاں پہ درور گوشگ اَنت واجھیں رئیس جمھور ، لوگبانک ئِے پُشت ءَ ھست اِنت ءُ آئی ءِ ھاتر ءَ اِنت ۔
چہ مشکل ءُ نگیگیانے کہ شمئے راھسراں ھست اَنت ، بہ گْوش اِت؟
ماں بلوچستان ءَ یک مزنیں مشکلے کہ ھست اِنت اِیش اِنت کہ ھاسیں کانود نیست اِنت پہ درور آموزش ءِ برنامہ ءُ کانود ھِچ ءِ برابر اَنت گڑا ما روشنا ءُ گمواریں شھرے ءِ واھُند بوت نہ کن اِیں وھدے کہ پہ شھر ءِ وانگ ءُ وانینگ ءِ واست ءَ بندر ءَ بُن جوڑشتیں کانود ءُ برنامہ نیست اِنت ، پہ درور گوں زانگ ءُ زانتکاری ءَ جن ءُ مرد پہ سور ءُ سانگ ءِ واست ءَ یک ءُ دگرے ءِ واھگ دار بہ اَنت ءُ کدم اِیر کن اَنت ،گڈ سر ءَ آ کہ چُک ءِ ساٹگ ءُ ساٹینگ ءَ شری ءِ سر ءَ بلد اِنت توان اِیت جوانیں وڑ ءُ پیمے ءَ وتی چُکّاں چاگرد ءِ تابیل ءَ بہ دنت ءُ چشکا ما پہ جاگھے نہ رس اِیں کہ مئے بندیجاہ پُر چہ ورنایاں بہ اَنت گڑا اِے وڑ ءَ ورنایانی ساٹگ ءُ ساٹینگ گلّ ءُ ساٹگ جاہ دْرست بندیجاہ نہ بہ اَنت ، منی دیدانک ءَ انیگیں ورنا چو یک ورودیں درچکے ءِ وڑ ءَ انچشکا وت رستگ اَنت پہ درور ; چشکہ من ءَ ھِچ وڑیں زانت ءُ زانگے پہ چک ءِ رودینگ ءُ ساٹینگ ءَ نہ بوتگ ءُ نیست اِنت گڑا آ وڑ ءَ کہ من بہ ساٹینتیں ساٹ اِت نہ کتگ اَنت ، منی چک ءَ چہ چاگرد ءَ یات گپتگ یا ھراب ءُ شومیں سنگت ءُ دوستاں در ئِے بُرتگ گڑا گوں اِے چار ءُ بیچار ءَ منی چک شری ءِ سر ءَ ساٹگ ءُ ساٹینگ نہ بوتگ ۔
تئی دیدانک پہ چُکانی ساٹگ ءَ اَجیب اَت ؟
بہ چار اِت من چہ درستاں پیسر یک ماتے آں اگاں شریں ماتے بہ بوتیناں گڑا باید اِنت کہ لوگ داری ءُ لوگ بانکے ءِ زمہ واری شری ءِ سر ءَ پورو بہ کتین اِت اَنت ، من اگاں چک داری ءُ لوگ داری ءِ ھک ءُ ھکوک ءَ شری ءِ سر ءَ پیلو بہ کتیں گڑا رند چہ آئی ءَ تواناں ماں چاگرد ءَ بیایاں شری ءِ سر ءَ یک مدیر ءُ کارمسترے بوت کناں ، اَلّم ءَ یک سوبمندیں کارمستر بانکے ماں لوگ ءَ ھم سوبمندیں ماتے ھست اِنت ۔
ماں آموزش ءِ بارو ءَ گْوشت اِت ، بزاں واکی اود ءَ آموزش ھِچ نیست اِنت؟
بژنی گپے کہ ماں آموزش ءِ توک ءَ مئے شھر ءَ ھِچ ناں انگت چہ ھِچ ءَ ھم جھل تر اِنت ءُ مارا ایشکہ لھتکیں کتاب وان ھست اِنت بلے بس کسانیں بھرے مئے چاگرد ءِ کتاب وان اَنت ، اگاں درستیں ادارہ ھمت بہ کن اَنت ءُ وتی کارجاھاں یک کتابجاھے جوڑ بہ کن اَنت کہ ھم ڈنی مردم کہ کارجاہ ءَ کیت ءُ ھم ھما کارجاہ ءِ کار مند ءُ کار والا بہ توان اِیت کمے چہ وتی وھد
ءَ ماں آ کتابجاہ ءَ بہ گْوازین اَنت ءُ اگان شھر ءِ گوزگ ءِ ءُ در آیگ جاہ ءَ ھم کتابجاھے بہ بوتیں آ وھد ءَ بیتگ اَت کہ کتاب ءِ گپ ءُ کلوہ ءَ ماں چاگرد ءُ مچانک ءِ پگر ءُ سسا ءِ تہ ءَ بہ نادین اِین ءُ ردوم بہ دے اِیں ۔
ماں بانکانی پڑ ءَ ترا چونیں جھد بوتگ اَنت ؟
ماں بانکانی پڑ ءُ میدان ءَ مئے شھر ءَ کہ بے واھند ءُ بد واھندی ءَ دچار اَنت منی وتی جند امام جمو ءُ ھیرواھیں گلانی نیمگ ءَ روت دانکہ پہ آیاں ورد ءُ وراک ءُ پُچ ءُ پوشاک ءَ بہ گراں ، البت من لوٹاں اگاں بیت کنت پہ اے وڑیں مردماں کار جوڑ بہ کناں پہ کولے نہ لوٹاں آیاں وتی وازمندگ ءُ پنڈوگر بہ کناں ، بلکیں دوستوں بیت کہ آیاں ماھیگ گرگ یات بہ دیاں ۔ دوستوں بیت کہ چہ استان ءِ نیگواہ ءُ ھیرواھیں مردمانی ھمراھی ءَ بلکیں تھرانیانی ھمکوپگی ءَ پہ بلوچ بانکانی واست ءَ کار جوڑ بہ کناں کہ بانکانی کار کنگ ءِ واست ءَ اولی کار ءُ بُنی ھِشت ایر کنگ بوتگ اَنت ۔
گوں مرداں چتور ئے؟
آیاں من ءَ ھاسیں دیدانکے ءَ چار اَنت ، پہ درور تچ ءُ تاچ ءِ گروھتاچی ءَ درست مرد اَنت ءُ من اِیوک ءَ بس یک جنینے آں کہ مردینانی کَش ءَ اوشتاتگ آں بلے ھچبر جن ءُ مرد ءِ سر ءَ باوست ءُ گپ نیست اِنت بلکیں ما سجیں یک مول ءُ مرادے ءَ اِد ءَ اِیں ءُ منی مول ءُ مراد چہ اِے درستیں جھداں اِیش اِنت کہ وتی شھر ءِ آبادانی ءَ لوٹوکاں ، ھرچنت ھچ بانکے منی کش ءَ ماں بازیں پِڑ ءُ میدان ءُ جھداں گون نہ اِنت ءُ مردینانی کش ءَ ھم منی جنینی مارِشت مُرتگ ءُ بس پہ اِیشی ءَ جیڑگ آں کہ منی مول ءُ مراد بس مُلک ءِ آبادی ءُ دیمروی اِنت ۔
کرار اِنت کہ مدرسہ دینی ءَ سَبت ءُ درپ کن ئے؟
وتی دینی مدرسہ کہ یک سالے بیت رندگیری کتگ ءُ راجگس ءَ ھم شتگ آں ، مزاھبانی شھدربرجاہ ءَ ھم شتگاں ءُ انیگ ءَ منی کار ھلاس بیگ ءَ ات اَنت ، منی راھانی سر ءَ ڈنگر اِش دور دات ءُ گمان اِش کت کہ مردینانی دیم ءَ کم بیاران ءُ دستاں بہ داراں من کہ دمبرگ ھِچ نہ زاناں کہ تچ ءُ تاچ منی مُجّتی ھِیل ءُ آدت اِنت ، پہ وتی ھک ءُ ھکوک ءِ واست ءَ وتی پاد مھکم ماں زمین ءَ چسپینتگ اَنت ءُ ھچبر نا امیت نہ بوتگاں ، من لوٹاں مدرسہ دینی ءَ دیم ءَ براں ۔منی کار مدرسہ دینی ءِ بارو ءَ زوت ءَ سبت ءُ درپ بہ اَنت ءُ اِے سسا ءُ گمان ءُ دیدانکوں ھست اِنت کہ ھک ءَ وتیگ ءَ مدام گوں راستبندگری ءُ دلیل ءُ مَنانک ءَ بہ گر اِیں ۔
استان سیستان ءُ بلوچستان ءِ بارو ءَ چے جیڑ ئے ءُ چے پگر کن ئے ؟
منی دیدانک اِیش اِنت ھمایاں کہ ماں شھر ءِ توک ءَ لوگ ماں لوگ ءِ سر ءَ بستگ ءُ چار تبکانی واھند اَنت کہ توان اَنت ماں ھمے استان ءَ ناہ ءُ ھرماگ ءِ بستہ بندی یے کار جاھے جوڑ بہ کن اَنت دانکہ ورنایاں کار ءُ روزگار بہ بیت اِش ، پرچا باید بلوچستان ءِ سنگ ماں اسپھان ءَ بہ روت ءُ اود ءَ بلور جوڑ بہ بیت ءُ اِے کار ھمد ءَ ھم کنگ بیت اِنت ، پرچا اِے پیش آمد ءُ پیش آتک اِد ءَ نہ کپگ اَنت ، پرچا کہ مئے لھتیں جھگیراں کارزانتی ءُ کارپجاری نیست اِنت ءُ مارا باید کار بلد ءُ کار زانت ءُ کار پجاریں جھگیر بہ بیت چہ بلوچستان ءِ زید ءُ مادن ءَ شری ءِ سر ءَ پہ ھمے مردمانی واست ءَ کار بہ گر اَنت ءُ سِیت مند بہ بنت ۔
رجانک : میرجان میر
کارمرز کنوکانی هیال