آشا ناروئی وتی گپّ ءُ تْران ءِ تہ ءَ گوں میارجل ھالرسانی بُنجاہ ءَ، روھانی ءِ ھشتیں سالانی کارکِرد ءِ بابت ءَ گُش اِیت : آیا شما روھانی سرکار ءِ دَوران ءَ چوشیں کارکردے دیستگ کہ بلوچستان ءِ شان ءِ رِد ءَ بہ بیت، کارکردے کہ کشور ءِ دارا بوتگیں اُستاناں ماں کِرد ءِ تہ ءَ داشتگ، آیا روھانی ءِ سرکار ءُ پیشیگیں سرکاراں اِے شاھگان ءُ گْوستانکی استان ءِ پد منتگی ءِ جبران کنگ ءَ گامے چِست کُتگ، آیا شمئے ھیال ءَ زَرّ، درآمد، کار، کارپیداگ کنگ ءُ کار ءَ دارگ و.... داداریں رنگے ءَ ماں اُستان ءَ بھر کنگ بوتگ. من گوں دلجمیں رنگے ءَ گُشاں اِنّاں.
آئی ءَ ماں دیمتر ءَ گوں آدگہ سرکارانی کارکرد چہ رپسنجانی ءَ بگر تاں اھمدی نژاد ءُ ماں گُڈسر ءَ روھانی ءِ نیمگ ءَ اشارہ کنان ءَ دَرّائینت : چوش گِندگ ءَ کیت کہ اِے گْوستانکی پْراہ پَھناتیں اُستان ماں سرکارانی دَے ءُ زور ءُ ھساب کتابانی تہ ءَ گندگ نہ بوتگ، دْرستیں سرکاراں ماں کار ءِ بِندات ءَ آبادی ءُ آبادانی ءِ شیرکنیں کَول ءُ لَبز داتگ ءُ چہ جْوان ءُ دلپسندیں بانداتے ءَ گپ جتگ، زیبائیں گپ، رددیوک ءُ اُمیت وار کنوکیں باز جتگ دانکہ ھنرانی کار زانتاں لوٹ ءُ نیاز توراِتگ اَت ءُ ونتگ اِت اَنت بلے ھچّ نہ بوت.
آشا ناروئی ءَ ماں دیمتر ءَ چہ نوکیں سرکار بزاں آیت اللہ رئیسی ءَ لوٹ اِت : اَگاں اَنگت راستکاری یے منتگ ءُ پابرجاہ اِنت، ھما گْوستگیں شیرکنیں لبز ءُ کَولاں کار بند اِت، ھما چار ءُ بیچّار بوتگیں لوٹ ءُ نیازاں کار بہ کن اِت، نی پد ءَ دْرستانی جُست کنگ ءِ ھاجت نیست ءُ دمگ ءِ جھدکار باید وتی گوشاں بند بہ کن اَنت پہ زیبائیں گپّ ءُ شرترین ءُ امیت وار کنوک ترین ءَ، بلکیں وتی چمّاں پچ بہ کن اَنت کہ پیشیگیں ھزمت ءِ داواداراں ماں میدان ءَ چونیں کِردے اَدا کتگ؟
آ دیمتر ءَ گُشان کنت : آ دَرگتاں کہ کیسگ پُرّ اِت اَنت ھچ کارے کنگ نہ بوتگ ءُ اَنّوں کہ ھالیگ اَنت چونیں اُمیت ءُ بانداتے داشت کنیں؟! منی ھیال ءَ اے کشور ءِ مردماں ساہ ءُ باور ءِ بُرّبین ءِ نیاز ھست تاں ماں زندگی ءِ پِڑ ءَ راستیں سسّا ءُ نوکیں پگر ءَ بہ رس اَنت ءُ گوں زانشت ءُ جھانی ھمروچی زانش ءُ وتی پگر ءُ سسّا ءِ ھمدپ کنگ گوں وتی داشتگین ءُ نہ داشتگین ءَ ءُ گوں وتی ھمروچی لوٹ ءُ ھاجتاں پہ گھتریں بانداتے ءَ ءُ نگاھاں دیم ءَ شانک دیان ءَ دیم ءَ گام چِست بہ کن اَنت.
ناروئی گیش کنت : منی دیدانک اِیش اِنت کہ زانشت ءُ ھنرانی ھر تھر ءِ شیواریں کاربلد ءُ کار زانت باید اِنت پہ ھما تھر ءُ رشتہ ءَ دیم ءَ بیا اَنت ءُ کار بہ کن اَنت نہ دگرے، ھرکس باید وتی جاگہ ءَ بہ بیت، پہ درور مالکاری ءِ زانتکار مالکاری ءِ سر ءَ، پزشک پزشکی ءِ سر ءَ، کارمان زانت کارمانی ءِ سر ءَ ءُ مُلّا ماں مسیت ءُ واز ءَ، ءُ راج باید چہ وت ءَ جُست بہ کنت کہ آشوب ءِ دْرچک ءِ بَر ماں 42 ءِ سال ءِ دْراجی ءَ ماں کِرد ءِ پِڑ ءَ شیرکن بوتگ اَنت یا اِنّاں ءُ آیا لبز ءُ کَول پورا کنگ بوتگ اَنت؟
آ دیم ءَ گُشان کنت : گْواچنی، لَبز دیوک گھتر اَنت یا کار کنوک؟ بلوچ جھدکار باید اِنت چہ وت ءَ جُست بہ کن اَنت آیا مردمے کہ جھان ءِ مُچّی ءِ یک دَرسدے اَنت ءُ جھان ءِ سرچمّگ ءُ گَنجانی نُھ دَرسد ءِ واھُند اَنت آیا ھما مُلکانی نسبت ءَ کہ یک درسدے چرے گنجاں دار اَنت، مالی ءُ مال شاھگانی ءِ رِد ءَ دیم ءَ شُتگ اَنت یا پَد منتگ اَنت؟ سَد اَلبت باید اِنت مردم وتی چم ءُ سَسّا ءَ پچ بہ کنت ءُ وتی گوشاں پہ دْروگیں نیمون ءُ گپ ریپیاں بہ بنداِیت ءُ دمگ ءِ جھدکار ھم باید سرپد بہ بنت چُک دانکہ نہ گْریت مات آئی ءَ نہ میچین اِیت.
اِے مدنی ءُ سیاسی بلوچ جُھدکار گیشّین اِیت : سرکار مارا بایداِنت وتی سرجمیں برنامگانی تہ ءَ شریدار بہ کنت تاں مئے وپاداری ءَ پرے پاکیں مُلک ءِ رھبند ءَ چم ء وت بہ گنداِیت ءُ ما مدام پہ ھزمت ءَ دست بستگ ءُ اوشتاتگیں؛ دمگ ءِ جُھد کار، نوں کہ سر زاھر ءَ سرکار ءَ بدلی ءِ پدّریں راہ منّ اِتگ ( کہ اَگاں مہ بوتیں مردم دنیگا گاڑ نشین اَت) وتی مُلکی ءُ دَرمُلکی سوھویں ءُ شیواریں کاربلد ءُ کارزانتاں دَزبندی بہ کنت ءُ بہ لوٹائین اِیت دانکہ پہ سیستان ءُ بلوچستان ءِ رکّینگ ءَ وتی ھمّت ءِ آستیگاں بہ لانچ اَنت.
آ گُش اِیت : ما باید اِنت نوکیں سرکار ءِ شَرّیں رویکرد ءَ، بنیگج ءَ شریدار ءُ ھوار کنگ ءِ کَول ءُ مَنّ ءَ کہ اُگبالی ءُ اجرائی اھتبار ئِے بہ بیت ایشی ءَ بہ گریں، گُڑا کارزانتی وڑ ءُ پیم ءَ نَے کہ ھیالی دْروشم ءَ، گوں کشور ءِ سُھریں لکیر، نَپ ءُ سیت، آیوکیں لوٹ ءُ نیازانی دلگوشداری ءَ، ما بہ توانیں مْیان راجی گْروھتاچیانی پِڑ ءَ مشاورت بہ دئیں، کاربلدانی ھور ءُ ھمراھی ءَ آ دگہ دْرینیں ایرانی راج ءُ دْرستیں ایران ءِ جَھ منندانی، بے راجی، ٹَکّی، دینی ءُ نیکرھبندی کورمیمی ءُ وت مزن گِندی ءَ.
ناروئی دیمتر ءَ دَرّائین اِیت : سیاسی چاگردی بلوچ جُھدکارانی پگر ءِ آمید باید سرجمیں راجانی مُچّ کنگ ءِ جھد ماں ایران ءِ گال ءِ چپّ ءُ چاگرد ءَ بہ بیت گوں تپاکی ءَ اَنچوش کہ بندیک تَزبی ءِ پھکیں دانگاں وتی کِرّ ءُ گْور ءَ داراِیت ھمے رنگ ءَ یکجا بہ دارایت اِش، ءُ اَگاں گْواچنی بدلی لوٹیں باید ایران ءِ واھگدار بہ بئیں، ھمدل ءُ تپاک ءُ مُچّ گوں یکّی ءِ گال ءَ، بدلی ءِ لوٹ ءَ سرجمیں وازمندیں پھناتاں بہ چاراِیں ءُ دلگوش بہ دئیں ءُ سرکار ھم باید اِنت بانُکانی کِرد ءَ باور بہ کنت ءُ آیانی اَبرمی ءُ راستیں ھکّ ءُ اگبالاں اَرزشت بہ دنت.
آ گُڈسر ءَ درشان کنت : ھمے رنگ ءَ باید جنیناں ماں کار ءُ کِرد ءِ پِڑ ءَ، برابر ءُ یک اندازھیں موہ دیگ بہ بیت ءُ ایشانی کارانی اَڑاند دور کنگ ءُ آیانی پہ راجمان ءِ جوڑکنگ ءَ بھر زوری ءِ لوٹ ادا ءُ تیار کنگ بہ بیت.
اے بلوچ جھدکار ءِ گُشگ ءِ رِدءَ ، آیوکیں سرکار ءِ اولویت باید اِے رنگ ءَ بہ بیت کہ ورنا ءُ آیانی باندات اَرزشت دیگ بہ بنت ءُ مردمانی مالی زندمان ءِ گھبودی ءِ جاور چہ دْرستیں کاراں پیسر کنگ بہ بیت.
رجانک: جنید بلوچ
.png)
