میارجل ھالرسانی بُنجاہ ءِ ھالانی رِد ءَ؛ ایمان شھنوازی بوتن سال 1371 ءُ برک ءِ دُکترا ءِ نودربر اِنت، آ کہ اُستان ءِ نودربرانی کارمستر ھم بوتگ۔
نودربری شورائی مجلس ءِ گچین کاریانی کاندید بوتگ ءُ ماں آزات زانشجاہ ءَ سال 92 ءَ زانشتی گَل ءِ شونکار بوتگ اَت، اَبید چہ ایشی ءَ آ یک سالے ءَ ھم اسلامی گَل ءِ جانشین ءُ پہ مشھد آزات زانشجاہ ءِ تھری شورائی ءِ شونکاری ءَ ھم گچین کنگ بوتگ اَت، آ، آزات زانشجاہ ءِ کار رُدومی ءُ کار ماں زانشجاھی سمن ءُ نیک کاری جُھداں ھم وتی کارنامگ ءِ تہ ءَ داراِیت ءُ ایشی ءِ ھمراھی ءَ لیسانس ءِ مدرک ءِ گرگ ءَ پد، توس سمن سپھرداد راہ ءَ پِرّینتگ ئِے کہ اِے سمن ءِ جھد ھم کاری زھگانی، لوگمانانی جنین مستر، شیراز وابانی رسگ ءُ چیٹگ اِنت ۔
اے واجہ کہ ایشاں اَبید زانشجاہ ءِ وانینگ ءِ کُتہ کاری ءَ ھم گْوستگ، تاں سال 96 ءَ ماں مشھد ءَ بوتگ ءُ رند چہ آئی ءَ ارادہ کنت چہ سال 97 ءَ ماں چھبار ءَ بَئیت دانکہ مشھد ءِ جھدانی ھواری ءَ، پہ بلوچستان ءِ مردماں ھم وتی دودمانی جُھداں دیم ءَ بران بکنت. گُشگ کَرزاِیت ایمان شھنوازی کہ آئی ءِ پِت ءُ پیرُک ماں واش ءَ جھ منند بوتگ اَنت آئی ءَ وتی سِند ءُ کسان سالی ماں زاھدان ءَ گْوازینتگ. جالب اِیش اِنت کہ آئی ءَ گوں بازیں شَرکاری گَلاں چوش کہ "امام اَلی مُچّی" ءَ ماں مشھد ءَ ھمکاری کتگ ءُ بے سجلیں زھگانی باندات ءَ ھم آئی ءَ بازیں نیکیں کارے کتگ.
آ بے سجلیں زھگانی بابت ءَ وتی جھداں گُش اِیت : زھگ ماں گَل ءَ آتکگ اَنت ءُ آ ما وانینتگ اَنت ءُ سال 97 ءَ کہ ماں چھبار ءَ آتکاں دل ءَ باز لوٹ اِت کہ اے کار ءَ ماں چھبار ءَ ھم بہ کناں ءُ ماں توس سپھرداد ءِ دیوان ءَ ھم اے شَور کنگ بوت کہ منی واھگ ءِ پد ءَ یک جھگیری یے ءَ ماں چھبار ءَ بْیاریں ءُ ماں چھبار ءِ شھر ءَ اَبید چہ دودمانی پِڑ ءَ کہ زانتگیں تْرازے ماں نوکین رنگے ءَ ءُ ھاسیں اَندازے ءَ گردشگری جُھدوں کتگ. وانگجاھانی جوڑ کنگ ءُ بندگ ءَ گیشتریں کارے کہ کنگ ءَ آں، آیاں دوستانی ھمراھی ءَ پد ءَ بندیں ءُ سرجمیں نبشتگی اَوزار ءُ کش ءُ کِرّی ساماناں جریدگ ءُ بھداشتی سروساں اَگاں مشکلے بہ بیت آیان جوڑ ءُ پہ کارمرز ءَ تیار کنیں. ماں گْوستگیں سال ءَ ھم ھار ءِ دَم ءُ درگت ءَ ما گروھے ءِ بھر بوتگیں کہ بازیں جاگھاں سر جتگ ءُ مشھد ءُ تھران ءِ نیک کارانی ھمراھی ءَ ماں اے پڑ ءَ ھزمت رسانی کرتگ.
آئی ءَ وتی اِزمی کارانی بارہ ءَ اے گِشوار دات : چھبار ءَ ما اِلمان جوڑ کتگ، پہ دَروَر "بندن آزات" ءِ پُتِرجاہ ءَ چہ لیپار ءِ نیمگ ءَ کہ رواِت ءُ اَنّوں بند اَنت آ رنگی مُکّئب من جوڑینتگاں کہ اُستان ءِ اَولی دیجیتال اِلمان بوتگ اَنت ءُ دومی ھم ما ماں زاھدان ءَ جوڑینتگ اَنت کہ ماھے پیش ما آ لگینتگ اَنت.
یک اِلمانے لونجانیں سنگ اَت کہ ایران ءَ ھچ جاگہ ءَ لونجانیں سنگ نیست اِنت، ما لونجانیں سنگ ءِ اِلمان ھم اَولی بر ءَ پہ چھبار ءَ ماں شیشگی کاپہ ءِ جھل ءَ جوڑ کتگ کہ اَنّوں سَیل ءُ ساواتی مردم مدام اود ءَ گوں اِے اِلمان ءَ بُت گرگ ءَ اَنت ءُ من گردشگری ءِ پِڑ ءَ ماں ربیتی ھوٹل دُربلوچ ءَ لَس سْیادی ءِ کارمستر بوتگاں.
دیمتر ءَ میارجل ءِ شاھاریں گپّ ءُ تْران ءَ ماں مال زانتی ءُ دود ءُ ربیدگی پِڑ ءَ گوں اے بلوچ جُھدکار ءَ وان اِت.
وتی وانگی تھر ءِ پِڑ ءَ شما چونیں جُھد کُرتگ؟
برک ءِ پِڑ ءَ ما مُلک ءِ زنڈیں پروجیکٹ ماں دَمگ ءُ چھبار ءِ شھر ءَ اَنجام داتگ اَنت ءُ مشھد ءَ امام رزا ءِ استادیوم ھم کہ ایران ءِ نوک رنگ تریں ورزشجاہ اِنت مئے شرکت ءَ بستگ. دگہ یک پروجیکٹے ءِ کرارداد ھم پرے زُوتّاں ماں زاھدان ءَ بندگ بیت کہ راجی پروجیکٹے ءُ ایشی ءِ کار ءِ راہ ءَ دَور دیگ ءِ اُگدہ ھم گوں ما اِنت.
چہ چھبار ءِ سرگْوز کرتگیں کار توانائیاں ھم پہ ما بگُش اِت؟
چُنت روچ ءَ پیش مارا گوں بلوچستان ءِ چھبار ءِ دمگ ءِ سرمایہ گُزاراں دیوانے ھست اَت کہ ما جْوانیں پُتانسیلاں ماں گردشگری تْران، کِشت ءُ کِشاری پـڑ ءَ...کار بہ بندیں، تھنا جاھے کہ اُستوائی نیبگ کِشَگ بیت چھبار اِنت ءُ ھمے اَمب یا اَلناس اَگاں کرار اَت سرمایہ گزار بئیت ءُ ماں چھبار ءَ زمین بہ گرایت ءُ ایشی ءِ ھمراھی ءَ دوست ھم بیا اَنت ءُ اَلناس ءِ کنسرو ءِ کارجاہ جوڑ بکن اَنت سرجم ءَ پہ بلوچاں کار ءُ باری جاورے دیم ءَ ئِے آورتگ اَت.
ما بازیں اُستوائی نیبگے تہ ءَ کاریں چوش کہ موز، جام ءُ چہ سرجمیں رنگ ءِ نیبگاں ما توانیں ماں چھبار ءُ دشتیاری ءَ کِشت ءُ برداشت بہ کنیں ءُ اَلبت اِے پرے بَے ءَ بوت کنت کہ مئے دویں پُرّاپیں سَدّاں پچ بہ کن اَنت ءُ پہ رھبند بِلّ اَنت مردم چَرایاں بھرہ مند بہ بنت نہ اے کہ بلّ اَنت روچ اِش بہ جنت ءُ نمب بہ بنت، کِشت ءُ کِشاری باندات ءَ چھبار باز شَرّ اِنت، اگاں کِشت ءُ کشاری پِڑ ءَ ھمبل دیم ءَ بیا اَنت، ماں ایران ءَ ھم مارا پہ گُشگ ءَ بازیں گَپّے بیت.
گردشگری ءِ باندات ءَ ھم مارا 100 کیلومتر ھاسیں تیابے ھست کہ بیت ماں اِے تیاب ءَ مزنیں کار دیم ءَ آرگ بہ بیت بلے سد بژن کہ اِے تیاب، کِرّے ءَ کپتگ ءُ ھچ کارے پہ آئی ءَ نہ کن اَنت ءُ ادارھانی تہ ءَ ناتپاکی ھست کہ چے بہ کن اَنت، ما لوٹ اِت کہ کہ یک جاھے پہ سِٹّ ءُ دَور ءَ بہ گِیشّینیں بلے بژن کہ دریاپانی ءَ گوں اَبرمی بُنزہ ءِ ادارہ ءَ مزنیں داستانے بوت کہ چریشاں سرگْوزگ مزنیں تاگت ءُ توانے لوٹ اِیت وھدے مردم چوشیں چیزانے گِنداِیت جزم زانت کہ دْرستیں چیزاں پہ گْورے ایر بہ کنت.
پگر کناں کہ شمارا مشھد ءَ ھم جُھدکاری ھست اِنت؟
ھو، من مشھد ءِ شورای شھر ءِ سروک ءِ شَورکاراں ءُ بہ کَول ء زاھدان ءِ شھردار ءَ من چہ اُستان ءَ بُنگیجی مردماں کہ لژیونر بوتگاں در ھالے کہ ما یکّش ءَ واکدار ءُ شَورکار چہ دگہ اُستاناں آورتگ.
مشھد ءِ ءُ اِد ءِ میان ءَ چونیں دگرے گندگ ءَ ئے؟
دگری یے کہ من گندگ ءَ آں اِیش اِنت کہ مردمانے کہ ماں اُود ءَ کارانی سروک اَنت آیانی دید اُستان ءِ رِد ءَ باز شاھگان تر اِنت ءُ ماں اُستان ءَ یک پیمے ناں پیمے ءَ نزوریں ءُ شَرّیں نُکتو گندگ ءَ کَیت بلے اِد ءَ یکّے کہ کارمستر بیت زوتّ وت ءَ گار ءُ زْیان کنت پہ درور اَگاں لوٹ ئے بہ روئے آئی ءِ گندگ ءَ باید اِنت گوں یک ھاسیں اِداری بوروکراسی ءِ کمک ءَ آئی ءَ سر بہ بَے ءُ مئے اُستان ءَ نہ کارمسترانی گندگ ءَ شُت کن ئے ءُ نہ آیاں نگد کُرت کن ئے.
پہ بژن، گیشّ اِتگیں رنگے ءَ باید بگُشاں کہ مئے کارمستر نگد ءَ ایربُرت نہ کن اَنت؛ پہ درور ھر جاگہ کہ من گپّ جتگ، چوش کہ یک دیم گُشیں مردمے آں، پہ من ءَ مشکل جوڑ بوتگ. اے جیڑہ ءِ منّانک پہ راستی اِیش اِنت کہ منی اُستان ءِ کارمسترانی دید ءُ نگاہ شاھگان نہ اِنت.
من اشکُتگ کہ مشھد ءِ شھرداری ماں وانگجاہ جوڑ کنگ ءِ پِڑ ءَ ماں بلوچستان ءَ جُھد کنگ ءَ اِنت؟
ھو، منی وتی جِند ءَ مشھد ءِ شورای شھر ءِ باسک ماں دشتیاری ءَ آورتگ اَنت ءُ ھمیش اَنت کہ لھتیں جاگھاں پہ وانگجاہ ءِ بندگ ءَ کمک کنگ ءَ اَنت. یک چار کِلاسی وانگجاھے700 میلیون ءِ نھاد ءَ ھمے گُڈسر ءَ بستگ اِش ءُ دشتیاری ءِ پرماندار ءَ آئی ءِ ھماھنگی، پرزنت ءُ اَولی کار مشھد ءِ شورای شھر ءُ اود ءِ شھردار ءَ پیلو کُرتگ اَنت کہ بازینے چہ آسراتیان ءُ اِداری ساماناں ماں دشتیاری ءِ پرمانداری ءَ آرگ بوتگ اَنت ءُ ما کرار اَت کہ پرے سال ءِ مھر ماہ ءَ دو وانگجاہ ماں دشتیاری ءَ بازسازی بہ کنیں کہ من ٹوکر وارت ءُ
منی ماں چھبار ءَ آیگ نہ بوت ءُ سامان ءُ اَوزار ھما رنگ ءَ وتی جاگہ ءَ اِیر اَنت گوں جاور ءِ جوڑ بوگ ءِ شرت ءَ پرے دویں وانگجاھانی بازسازی ءَ کہ سرجمیں چیز اِش ساجو اَنت، گامگیج زوراں.
تئی وتی دودمانی دید ءِ دلگوش ءِ رِد ءَ، تئی ھیال ءَ بلوچ ءِ دود ءُ ربیدگ چونیں جاورانی آماچ اِنت؟
بچاراِت بلوچ راج چہ ایران ءِ بُندری راجان اِنت ءُ چرے دید ءَ ٹوھیں دود ءُ ربیدگے ءِ واھُند اَنت. چھبار گوں پاکستان ءُ ھندوستان ءَ ھم سیمسر اِنت ءُ لھتیں چریشاں کہ ماں چھبار ءَ آتکگ اَنت آیاں وتی دودمان ھم وتی ھمراھی ءَ مئے اُستان ءَ آورتگ کہ اے دود ءُ ربیدگ، ایرانی بلوچ ءِ دود ءُ ربیدگ چہ کَٹّ ءَ بُرتگ لھتے کار ءُ لھتے رپتارانے کہ گندگ بنت اَلّمی ءَ رَد اَنت. پہ دَرور اِے پان پراک ءِ بنگپ ءَ ماں راجمان ءَ بلوچ راج ءِ پیش دارگ ءَ بدیں جاورے پیداگ کُرتگ پرچا کہ اِے جْوانیں چیزے نہ اِنت ما اَگاں بہ توانیں اِے بُنگپ ءِ سر ءَ کار بہ کنیں سکّ شَرّ بیت. منی وتی جند ءَ وھدے کہ ماں چھبار ءَ بندن آزات ءَ زانشتی کاربُردی زانشجاہ ءَ وانینتگ پہ وتی شاگرداں گُشتگ کہ اَگاں سرپد بہ باں کہ چرے نشھی مواد ءَ کارمرز کنگ ءَ اَنت ھچ رنگ ءَ آیاں پاس نہ کناں. دْریگتیں بیلاں دودمانی پِڑ ءَ اَنچیں رنگے ءَ کار کُتیں کہ بلوچاں وتی زگریں دود ءُ ربیدگ پھریز اِتین اَنت بلے بژن اِنت کہ دودمانی ادارھانی سْیادی داروکیں واکدارانی کوتاھی سوَب بوتگ کہ بلوچ دودمان ءَ لھتیں بے پکاری تہ ءَ پُتِرتگ کہ ھچ رنگ ءَ دلپسند نہ اَنت.
رجانک : جنید بلوچ
.png)
