سیمی مستریں گْوز راہ ایران ءُ پاکستان ءِ پَچ کنگ بیت / میارجل ءِ گپ ءُ تران گوں رودرتکی بلوچستان ءِ م

چہ میارجل ءِ رسانکدر ءِ بنجاھی ھال ءِ نیمگ ءَ : ایران ءُ پاکستان ءِ رو ءُ آ ءُ کار ءُ بار چہ دیرتانی دوئیں ملک ءِ دولتانی واھگاں بوتگ کہ انی یک مسترین ءُ شاھگانیں میدانے ءَ سر بوتگ : دوئیں ملکانی ھمساھگی ماں یک مزنیں سیمسرے ءَ کہ شریدار اَنت ءُ دوبلوچستان ءِ مچانکی ءُ یک ساہ ماں دو بدن ءَ دود ءُ ربیدگی رھوت اِش ھم ھست اَنت ءُ اے رھوت ءُ رو ءُ آ تجاری ءُ زرکاری ءِ میان ءَ جوانیں کارستے ودی کنت ۔

پیشن ءُ مند ءِ رسمی گوزراہ ءِ باربری ءِ بنجاہ سیمی گوزراہ ءُ پایانہ اِنت رند چہ میلک ءُ ریمدان ءَ  کہ چہ پیشن ءِ شھر ءَ 8 کیلومتر راہ ءِ دیر ءُ دراجی ھست اِنت ئِے کہ اِے پایانہ ءِ جاہ 5 -2 پاگاپ اِنت کہ رودرتکی نیمگ ءَ ماں 450 متر  دراجی ءُ پھنات ءَ کہ آئی ءِ توک ءَ نمازگس ءُ مرزبانی ءِ گیٹ ءُ گمرُک جوڑ کنگ بیتگ اَنت کہ پاکستان ءُ ایران ءِ مزن کارمسترانی ساڑی بیگ ءَ پچ کنگ بیت کہ چہ پاکستان ءَ دیمپانی جوڑشتانی وزیر بانک زبیدہ جلال بلوچ ءُ چہ ایران ءَ مھمد اسلامی وزیر راہ ءُ شھرسازی ءُ دگہ مزنیں سپاھیگ ءُ لیڈر چہ ھر دوئیں نیمگ ءَ گون بیتگ اَنت -

پیشن ءُ مند ءِ مرزی پایانہ مجتی کار ءُ روزگار ءُ مساپر ءُ پاسینجرانی رو ءُ آ ءُ اوزار ءُ چیزانی بر ءُ آر ءُ کار ءُ کاسبی ءِ واست ءَ پچ کنگ بوتگ دانکہ پہ بلوچستان ءِ آبادی ءُ دیمروی ءَ گامے چست کنگ بہ بیت.