چہ میارجل ءِ ھالرسانی بنجاہ ءِ نیمگ ءَ : مریم رئیسی چاھان ءِ دبیرستان ءِ جنکانی وانینوک ءَ پروش نہ وروکیں ارادہ ءُ ھاٹیگے ھست اِنت ئِے ءُ وتی کار ءُ زمہ واری پہ اِیشی ءَ دیستگ ئِے کہ باید چاھان ءِ جنکاں سر ءُ سوج بہ کنت دانکہ پہ وانگ ءَ کر ءُ گوری دمگ ءَ بہ رو اَنت ۔
البت کہ اِے یکے چہ مستریں ڈنگر ءُ داران اِنت کہ سرجمیں دمگ نندیں مردم اِے وڑیں مشکل ءُ نگیگانی آماچ اَنت ءُ پہ ھمیشیگی چہ وانگ ءَ پشت کپگ اَنت کہ ھمے کار سوب بیگ اِنت کہ سالانی سر ءَ بازیں جنکے چہ دبیرستان ءُ دیم تر ءِ وانگ ءِ روگ ءَ پشت بہ کپ اَنت ءُ چہ دبیرستان ءُ دیم تر ءِ وانگ ءِ جاہ ءَ لوگاں بہ نند اَنت ءُ گڈسر ءَ گڑا سور کن اَنت ءُ لوگ داری ءُ چک داری ءَ مولمہ بنت ۔
گوں اِے ڈنگر ءُ داراں کہ ماں رھسر ءَ ھست اَنت ءُ انگت ءَ مریم رئیسی آموزش ءُ پرورش ءِ رسمی وانینوکے نہ اِنت ءُ بلے پہ چاھان ءِ دبیرستان ءِ جنکانی ھاتر ءَ باز دلسیاھی کش اِتگ کہ پہ درس ءِ وانگ ءَ کر ءُ گور ءِ میتگ ءَ بہ رو اَنت ءُ ھمیشیگی آیانی لوگمان ءُ کھول ءِ مردماں گوں گپ ئِے کتگ ءُ رند چہ گپ ءُ شور ءَ شہ آیاں موکل ءُ اجازت ئِے گپتگ دانکہ پہ وانگ ءَ کش ءُ کِرّی میتگ ءَ بہ رو اَنت ۔
اِے ایوکیں کارے نہ اِنت کہ بانک رئیسی ءَ پہ چاھان ءِ وانگی جاورانی دیم ءَ برگ ءِ واست ءَ کتگ ، بلکیں گوں زَرّ ءُ ءُ کمک ءُ مدت ءِ گرگ ءَ شونکیں دبیرستانے ءِ بن ھشت ئِے اِیر ءُ بنگیج ئِے کتگ ءُ اِے گرانیانے کہ چیز ءُ اوزار ءُ سامانانی نھاد ءُ کیمت ءِ سر ماں آزمان ءَ سک انت ءُ پد ءَ ھچ وڑیں بودجھے نیست کہ اِے وانگ جاہ بُرز ءَ بہ روت ءُ بے زری ءِ سوب ءَ زمین ءَ مَنتگ ۔
امیت اِنت کہ ھیرواھین ءُ نیکیں مردمانی کمک ءُ مدت ءَ اِے وانگ جاہ پہ آسر ءَ بہ رس اِیت ءُ جنک پہ وانگ ءِ واست ءَ کمے پَند ءُ راہ ءِ جنگ ءَ پہ وانگ جاہ ءَ بہ رس اَنت ءُ ھمے دروشم ءَ وتی وانگ ءَ پہ ارزانی ءَ دیم ءَ ءُ دیم تر ءَ بہ بر اَنت ۔
ماں اِے تامر ءِ سرجمیں گلگدار ءِ تہ ءَ کہ میارجل ءِ ھالرسانی ءِ ھالکار ءَ گوں بانک مریم رئیسی ءَ گوں گپتگ دانکہ ھما سکی ءُ سوری ءُ مشکل ءُ نگیگانے کہ آئی ءِ راھسراں میلانک بوتگ اَنت شما بہ گند اِت اِش ۔
.png)
