میارجل ءِ بنجاھی ھالکاری ءِ گوشگ ءَ: پہ گپ تران ءِ نیمون ءَ اے بابت ءَ کہ بلوچستان ءَ پہ دیمروی ءَ چے پکار انت ، ماں واش ءِ ھند ءُ دمگاں یک زانتکاریں ورنایے ءِ گور ءَ شت ایں، ھسن شھنوازی جوانیں جھدکار ءُ لچہ کارے ماں بلوچستان ءِ لبزانک ءِ پڑ ءَ انت، واجہ پارسی لبزانک کارپجاری ءَ بُرز ونتگ، ءُ وانینوکے ءُ نوکیں پدریچ ءَ وانینگ ءَ انت.
سلام ءُ دروت شمئے وھد وش بات شما وت ءَ شری ءِ سر ءَ پجار بہ کن ات.
بنگیج گوں مھر ءُ دوستی ءُ زانت ءُ سسا ءِ ھاوند ءِ نام ءَ، منی نام مھمد ھسن شھنوازی انت پارسی لبزانک ءَ کار پجّاری ءَ بُرز ونتگ ءُ ماں دربرجاھاں وانینوکے آں، چنت سالے انت کہ ماں مچانکی رسانکدراں بلوچستان ءِ مھلوک ءِ ھزمت ءَ کنگ ءَ آں برے برے ند ءَ ماں دست ءَ گران ءُ لچہ ءُ لبزانک ءِ پڑ ءَ ھم کار کنگ ءَ آں.
واجہ شھنوازی شما یکے اچ بلوچستان ءِ زانتکاران ات، شما لوٹ ات کہ بلوچستان 20 سال ءَ رند ماں دود ءُ ربیدگ ءُ چاگرد ءُ باپار ءِ بارو ءَ چون بہ بیت؟
پیسر اچ ھر چیز من اچ شما منتواراں کہ شما بلوچ ءُ بلوچستان ءِ گموار ات شمئے جست ءِ پسو ءَ گوشاں کہ بلوچستان ءِ چاگرد ءُ بلوچ راج اچ توان ءُ تاکت ءَ سرّیچ انت.
اگاں من بہ لوٹ آں کارزانتی دیدانک ءَ شمئے پسو ءَ بہ دے آں اے گشگ لوٹاں کہ منی وشبھتی انت کہ بلوچستاں مزنیں تاکتے ءِ واھند انت. بلوچستاں بازیں ھدا دادی نیامتے ءِ واھند انت کہ اگاں پٹ ءُ لوٹ بہ بہ انت بلوچستان ءِ بازیں مشکلے توجیل بنت ءُ بلوچستان ءِ آبادی ءِ راہ تچک بیت.
گندگ ءَ ایں کہ گوں مزنیں ھستیاں کہ بلوچ ءُ بلوچستان ءِ چاگرد آیانی واھند انت بزاں چوش کہ درملکی گردوک کہ پہ باپار یا دود ءُ ربیدگ ءِ بارو ءَ انت یا کشت ءُ کشار، بلوچستان ءِ دیمیں 20 سال روک ءُ رژنا انت، منی دیدانک ھمیش انت کہ گوں اے ھدا دادی نیامتاں بلوچستان ءِ دیمیں 20 سال رژنا ءُ اچ برکت ءَ سرّیچ انت، منی لوٹ ءُ واھگ ھمیش انت کہ بلوچستان ءِ مھلوک ءُ بلوچستان ءِ چاگرد ھما چیزے کہ آیانی ھک انت پہ آیان ءَ بہ رس ایت . من ایشی ءَ ھم زاناں کہ اے چیز گوں تپاکی ءُ شور ءُ سلاہ بوت کنت.
یک چیزے کہ پہ ما ھژدری انت ءُ آئی ماں بلوچستان ءَ ھست انت، کوھنین ءُ چنت ھزار سالی دود ءُ ربیدگ انت، کہ باید مچانکی دروشم ءَ جھدکار ءُ زانتکار آئی ءِ پجار ءَ پہ گیدی ءِ مردماں بہ کن انت.
شمئے لیکہ اے بابت ءَ چے انت ءُ چہ پیم ما پہ اے واھگ ءَ رس ایں؟
ھما وڑ کہ من گوشت ماں اے سے ئیں پڑاں، دود ءُ ربیدگ، مُچّانکی (اجتماعی) ءُ باپاری ما توان ایں مزنیں سنگ بہ بہ ایں، بلوچستان ءِ میزریں زید ءُ ندارگ اچ ھمساھگیں ملکاں یا آسیائی ءُ اروپائی ملکاں بازیں گردوکے کش ات ءُ یاؤرت کنت.
اگاں ما ھرد چاری بہ کن ایں ماں بلوچستان ءِ سڑکاں بازیں در ملکی گردوکے گندگ بہ انت کہ اے مارا پیش دار ایت کہ اے پڑ ءَ مارا مزنیں ھستی یے ھست.
دگہ گپے ایش انت کہ مارا بازیں مادنے ھست کہ اگاں ایشاں کارمرد بہ کن ایں گڑا مارا پہ دیمروی مدت کن انت، مارا گوں چنت ھمساھگیں ملک آپی ءُ ھاکی سیمسر ھست کہ ما اچ آئی ءَ پہ بلوچستان ءِ نزوریں باپار ءِ ھاٹیگمند کنگ ءَ کار نہ گپتگ، سیمسر پہ مئے واست ءَ مزنیں نیامتے کہ ما وتی باپار ءُ دود ءُ ربیدگ ءَ دیم ءَ بہ بر ایں آئی ءَ ماں گیدی ءَ پجار بہ کن این ءُ در ملکی گردوک بیار ایں.
اگاں اے پھکیں چیزاں یکجاہ ایر بہ کن ایں، اچ پھکاں وانینگ ءِ کارست پہ دیمروی ءَ گیشتر انت ما باید وانینگ ءِ ارزشت ءَ بہ زان ایں منی دیدانک ایش انت اگاں ما لوٹیں کہ دیمروی بہ کن ایں گڑا باید مئے ءُ مئے مردم ءِ پگر ءُ سسا نوک بہ بہ انت، ایشی وھدے بوت کنت کہ مئے مردم گوں وتی تمامیں ھاٹیگ دیم پہ رژنائی ءُ دیمروی ءَ گام بہ جن انت ءُ پہ زانت ءُ زانشت ءِ دیمروی ءَ وتی ھاٹیگ ءَ کاربہ بند اَنت.
باید ایشی ءَ ھم بہ گش آں کہ مئے مردم زانوگر ءُ مزن سسائیں مردم انت ءُ اے اچ مئے وشبھتی انت، چوش کہ بانک یسرا سلیمانی کہ آئی ءِ نام ماں گیدی ءَ ترپ ایت.
شمئے ھیال ءَ مئے ملک ءِ مزنیں دود ءُ ربیدگی ءُ باپاری مردمانی کارست پہ بلوچستان ءِ دیمروی ءَ چے انت؟
مزنیں مردماں پہ دود ءُ ربیدگ ءُ چاگرد ءِ دیمروی ءَ مزنیں کارستے ھست، آیاں توان انت چاگرد ءَ رژنا ءُ سوگو بہ کن انت ، اگاں اے وڑ مہ بیت گڑا ما، ماں مزنیں گپچلے کپ ایں .
چوناھیگا دود ءُ ربیدگ ءِ کارست ماں ھر چاگردے ءَ باز انت ءُ ھر چاگردے کہ وتی دود ءُ ربیدگ ءَ بہ پھریز ایت آ دیمروی کنت. بلوچستان ءِ زانوگر ءُ دود ءُ ربیدگی مردم ھم پہ چاگرد ءِ دیمروی ءَ ھژدری ئیں کارستے ھست.
منی دیدانک ایش انت کہ چاگرد ءِ وانندہ ءُ ربیدگی مردم باید ماں سرجمیں پڑاں چاگرد ءَ رھشونی بہ کن انت ءُ گوں وتی پگر ءُ سسا ءَ چاگرد ءَ دیم ءَ بہ بر انت، البت کماش ءُ ٹک ءُ کُٹمانی کارست ھم ماں بلوچستان ءِ چاگرد ءَ باز انت، ھر ٹکے باید پہ وتی مردمانی سوھو کنگ ءَ گام بہ جنت پرچا کہ ماں بلوچستان ءَ ٹکّ ءُ کٹم ءِ کارست ھم ھست ءُ گندگ بیگ انت.
بلوچستان ءِ مھلوک ءِ زمہ پہ اے واھگ ءِ پورو بوگ ءَ چے انت؟
ھنوں مھلوک ءِ کارست باز انت مرچی ھر چاگرد ءِ باپار ءِ چھر، گوں آ چاگرد ءِ مھلوک ءِ ھاٹیگ ءَ کار دار ایت، بزاں چاگرد ءِ باپار ءَ زندگ دار ایت ماں بلوچستان ءَ ھم ھمے وڑ انت.
ماں وانوگری ءُ دود ءُ ربیدگ ءُ ازمگری ءَ، مھلوک ءِ ھور ھوار بوگ ھاسکار ورنا ءُ وانندہ چاگرد ءَ دیم ءَ بر اَنت ، ماں باپار ءَ ھم مھلوک ءِ ھاٹیگ ءُ تواکت چاگرد ءِ باپاری ءَ دیم بارت ، بلوچستان ءِ چاگرد زندگ ءُ ھاٹیگمندیں چاگردے کہ گوں کمیں کوشستے ھم باز سوتمند بیت کنت، باید مھلوک پہ چاگرد ءِ آبادی ءَ کوشست بہ کن انت ءُ اے گوں مھلوک ءِ روگ دیم پہ وانگجاھاں بوت کنت.
تو بلوچستان ءَ یک پَجار بوتگیں کسی یے، زانتکارانی کارست ءَ پہ بلوچستان ءِ دیمروئی ءُ پوہ بیگ ءَ چتور گندئے؟
زانتکاریں مردمانی کارست چاگرد ءِ نیام ءَ مزن اِنت،ءُ آ توان اَنت ،چاگرد بھت ءُ تالہ ءَ بہ مٹین اَنت، اِے گروپ تونا ءُ کدرت مند اَنت ءُ ھمے سوب ءَ سان دات کن اَنت ، ھمے واست ءَ ایشانی کارست باز اَسْر اِلّ اِیت، بلوچستاں ءِ چاگرد ءِ ھژدری ئیں لوٹ، زانتکار ءُ سوھویں مردمانی کار گرگ ماں (اجرائی ءُ مدیریتی) زمہ وارانی سر ءَ اِنت! کہ چہ مئی وشبھتی ءَ اِے گُڈ سری سالاں شریں ءُ سیت مندیں کارے ھکومت ءُ (نزام) ءَ بنگیج کُتگ، اِے کارانی نیام ءَ اگاں بلوچ زانتکار ءُ سوھویں بچ کمے گیشتر ھمت بہ کن اَنت گڑا راہ پچ تر بنت!
زانتکار باید اِنت زری ءُ مالی ءُ مُچانکی کار ءُ باراں مان بدے اَنت ءُ نبوتگیں کارانی بیگ ءِ شرت ءُ زمہ واری ءَ بود بہ کن اَنت، ءُ منی لیکہ ءِ تہ ءَ اِے وھد رس اِتگ کہ اِے زانتکار ءُ وانندہ ءُ زانندھیں مردمانی سر ءَ بروسہ کنگ بہ بیت دانکہ بلوچستان ءِ چاگرد ءِ نیام ءَ مزنیں کارے کنگ بہ بیت!بلے اِے گپ ھوں شموشگ مہ بیت کہ بلوچ راج ءِ مردم زھمت کش ءُ جھد کاریں مردم اَنت،ءُ گوں شور سلاہ ءَ لس مھلوک ءُ زانتکاریں مردمانی نیام ءَ بازیں نگیگی پہ سیت مندی ءَ مٹ بیت!ءُ مئی واھگ اِیش اِنت کہ چاگرد دیم پہ دیمروئی گام گیج بہ زور اِیت!
تو یک رسانکدری جھدکارے ئے اِے بہ گوش اِت کہ رسانکدر بلوچستان ءِ چاگرد ءِ دیمروئی ءَ چینچو سِیتّ مند بوتگ؟
رسانکدر ھر چاگردے ءِ گویاکیں زبان اِنت ،کہ اِے سالانی توک ءَ گوں تیزیں گامے ءَ دیم ءَ شتگ ءُ چاگرد وتی بیرک ءِ چیر ءَ آورتگ ئِے ، من یک شھدربرجاھی ونتگیں وانندھے ءِ جاہ ءَ اِے لیکھوں ھَست کہ رسانکدر ءُ تندجاہ ءُ سوشل میڈیا ءِ چاگردی ٹول توان اَنت بلوچستان ءِ ورنائیں پدریچ ءِ سر ءَ سان بل اَنت ءُ سان بدے اَنت،رسانکدرانی ساھگ ءَ بازیں نگوشتگیں چیزے گوشگ بیتگ ءُ چاگرد پوہ اِنت ءُ بازیں جاہ ءُ راہ ءُ دَر کہ بلوچ راج ءِ واست ءَ بند بیتگ اَنت سوشیل میڈیا ءُ رسانکدرانی برکت ءَ پَچ بنت،ءُ بازیں سوھو ءُ ناموریں مردم کہ آیانی پگر ءُ سسا دیم ءَ آرگ نبیتگ گوں سوشل میڈیا ءَ پَجاہ آرگ بیتگ اَنت،ءُ من سدکاں کہ بلوچستان ءِ چاگرد ءِ مردماں چوش کہ اِے دگہ چاگردانی مردمانی وڑ ءَ توان اَنت سوشل میدیا ءِ برکت ءَ دیمروئی ءِ کار ءَ بنگیج ءُ باندات ءَ رژنا بہ کن اَنت ءُ چہ مئی وشبھتی ءَ سوشل میڈیا روچ پہ روچ دیمروئی کنان اِنت ءُ گڑا پہ ھمیشی چاگرد ھم دیم روئی کنت ءُ اِے ھبر زلوری اِنت کہ ما راستیں راہ ءَ پہ سوشل مدیا ءِ بھر زیرگ ءَ در بہ گیجین ءُ آسری گپ اِیش اِنت کہ سوشل میڈیا ءُ رسانکدراں بازیں اَسرے پہ مردمانی دود ءُ ربیدگ ءَ ھست اِنت اگاں پہ راستی کارمرز کنگ بہ بنت! ءُ چاگرد اگاں دیمرویی بہ کنت مردمانی کار ءُ بار ءُ روزگار دیم ءَ روت !
شمئی لیکہ میار جل ءِ تَندجاہ ءِ بارو ءَ چی اِنت؟
من بس ھمے گوشت کنان کہ اِے تَند جاہ پہ بلوچستان ءِ دیمروئی ءَ باز شوکین ءُ ھاٹیگ مندیں تندجاھے کہ آئی ءِ مول بلوچستان ءِ آبادی ءُ دیمروی اِنت ءُ من پہ اِے تندجاہ ءِ سوب مندی ءَ لوٹاں ءُ چوش کہ من اِے ٹول ءِ باسکاں پَجاہ کاراں باز جوانیں مردم اَنت ءُ پہ بلوچستان ءِ دیمروئی ءِ واست ءَ وتی جھداں کنگ ءُ دزگلائیش اَنت!
.png)
