چہ میارجل ءِ بُنجاھی ھالرسانی ءِ ھالانی رد ءَ ; بالاچ نامیں مجازی جھدکارے ءَ اے ڈول نبشتگ: ساھت ءِ داروکاں ، 20:22 ءِ ادار ءُ دمان ءَ پیش دار اَنت ، من ، دگ ءِ کَش ءَ پہ موٹل ءِ آیگ ءِ ھاتر ءَ اوشت اں ، موٹل والائے پہ اداروکے منی پادانی دیم ءَ اوشت ایت . دیمتر ءَ رو ان ءُ انچوش کہ موٹل والا وتی موٹل ءِ راستیں شیشگ ءُ کانچ ءَ جھل کنگ ءَ انت چہ آئی ءَ وتی بَرَگ ءِ نھاد ءِ بارو ءَ جُست کناں ، چینچو ؟ من ، موٹل ءِ تہ ءَ نندگ ءِ پیسر ءَ وتی گپّ ( بَرَگ ءِ نھاد ) ءَ گوش اں دانکہ دیمتر ءَ پہ اے گپ ءِ ھاتر ءَ ما را جیڑے مہ بیت . موٹل والا بچکند ایت ءُ آ ھم وتی نھاد ءَ گُوَش ایت . ما دوئیں یک نھادے ءِ سر ءَ منوگر ءُ رازیگ بہ ایں چہ اوشتاتگیں جاہ ءَ سر گِر ایں ، راہ ءِ دراجی ءَ موٹل والائیں مرد چہ گِرانی ءُ گَراز ءُ سامان ءِ نھاد ءِ بُرزی ءَ شِزار ءُ گِلَگ کنگ ءَ انت ، ھمے وھد ءَ ما شھید بھشتی ءِ بندن ءِ روچ دراتکی دروازگ ءِ کَش ءَ سر بَہ ایں ، موٹل والا دیم پہ مزن دیگ ءَ سر ءَ کہ ٹوھیں ساوڑ ءِ ھمگور ءَ انت جُنزاں بیت ءُ پدا وتی پیشی گِلّہ گُزاری ءَ بندات کنت . موٹل والا ءِ موڈ انگت ءَ تھار ءُ برانزیگ انت ءُ انچوش گوش ایت ; اے ھم ، " شھمیر بھشتی " ءِ مزن آجو دگ انت کہ لھتے وھد انت آئی ءِ کار ءُ ساچ بند ءُ اوشت ءِ آماچ انت . موٹل والا چیروکائی منی نیمگ ءَ چمے شانک دنت ، ھمے درگت ءَ چہ ٹوھیں ٹرکے ءِ سوٹ ءِ بُرزیں توار ءِ اشکنگ ءَ وتی دیم ءَ منی نیمگ ءَ تَرّین ایت ءُ پدا وتی چمّان ءَ دگ ءِ سر ءَ زیلّ ءُ سکّ کنت . چہ راہ ءِ تھاری ءُ تاموری ءُ بے برَمشی پدا برانزیگ ءُ تَھروزی بیت ءُ گوش ایت ; اے مَزن دگ گوں 18 کیلومٹر دراجی ءَ کہ چہ " شھمیر رجائی " بندن ءِ روچ دراتکی دروازگ ءِ کِرّ ءَ بگر داں جکیگور ءِ " پلیس راہ " ءِ اوشت جاہ ءِ ھَدّات ءَ پہ 12 موٹل ءِ کِرّ پہ کِرّ ءِ آیگ ءُ رَوَگ ءِ ھاتر ءَ بندات بوتگ اگاں پورہ کنگ بہ بیت گڑا چہ چھبار ءِ شھر ءِ تل ءُ توکی دگ ءُ راھانی کوپگ ءِ سر ءَ ، ٹوھیں ترکان ءِ تَرّگ ءُ رَوَگ ءُ آیگ ءِ گرانیں بارے ءَ چِست کنت ءُ زور ایت . من ( پہ گیشتریں پَٹّ ءُ پولے ، اے گپ ءِ سر ءَ ) دست ءَ وتی کیتو ءِ توک ءَ کنان ءُ اود ءَ چہ بازیں چیزانے ءَ شَمَگ ءَ کہ منی کیتو ءِ تہ ءَ انت وتی گوانکو ءَ شوھاز اں . ناکو گوگل ءِ نبشتانکانی تَل ءُ توک ءَ پہ چھبار ءِ اے مزن دگ ءِ کارانی بارو ءَ گَشت ءُ گولے کنان ءُ چیزے ناں چیزے درگیج اں . وانگ ءَ رند ، موٹل والا ءِ دیم ءَ بچکندان ءُ اے وڑ ءَ دَرّائیناں ; بوجیگ روی ءُ بندنانی بنجاھی ھالانی رد ءَ ، اے مزن دگ ءِ ساچ ءُ کار اں دیمی سال ءِ اردیبھشت ماہ ءِ آھر ءَ ھلاس ءُ سرجم بہ انت ءُ مزن دیگ پہ ھند ءُ دمگ ءَ مردماں دیم درائی بیت . کماشیں مرد ( موٹل والا ) گوں تھلیں بچکندے ءَ گوش ایت کہ چہ ھما وھد ءَ کہ چھبار ءِ بندنانی کارگس ءِ کارمستر بَدَل بوتگ ، اے ساچ ءُ کار اوشت ءِ اوشت ءِ آماچ انت ءُ ءُ چُشکہ من گندگ ءَ اں پہ اے زوتاں ھم ھلاس ءُ آسر نہ بیت . مزن ساوڑ ءِ تیاب ءَ نزّیک بیگ ءَ این ءُ انچوش کہ منی چَمّاں ساوڑ ءِ سر ءَ سَکّ انت بے موچی ءَ موٹل والا ءِ گپانی سر ءَ ھیال ءِ بور ءَ تاچینان ءُ لُنتانی چیر ءَ گوش اں کہ ماں چھبار ءِ بندن ءَ چون ءُ چینچوکیں بلاھیں کار ءُ بارانے ھست انت کہ اگاں درستاں پورہ ءُ سرجم بہ بنت گڑا اے شھر ءِ دروشم چہ انیگیں جاورھال ءَ پہ نوک ءُ زیبداریں وڑ ءُ پیمے ءَ بَدَل بیت/ رجانک : میرجلال