چہ میارجل ءِ بنجاھی ھالرسانی ءِ ھالانی رد ءَ ; واجہ محمد امیر براھوئی دزّاپ ءِ شھردار ، ماں بانکانی ھاسیں لیب ءُ گوازی ءُ دود ءُ روبیدگی پارک ءُ لیب جاہ ءِ دیمدرائی ءِ مراگش ءَ کہ " لوگمان باگ " نامدات انت گُوَشت کہ نوکیں کار ءُ جاھانی اڈّ کنگ ءُ رندگیری ماں اے شھر ءَ مئے ھاسکاریں جھد ءُ ساہ پہ مردمان انت ءُ ما را ھمے امیت انت کہ چہ اے جھدانی کارپداں ، مئے شھر ءِ دروشم ، زیب داریں پیم ءُ وڑے ءَ دیم ءَ بَرَگ بہ بیت . واجہ براھوئی گوں چمشانکے پہ بانکانی ھاسیں لوٹ ءُ واھگانی سر ءَ گُوَشت کہ ما لوٹ ایں وتی اِزم ءُ جھدانی رد ءَ بانکانی ھاسیں واھگان ءَ اے پڑ ءَ پورہ بہ کن ایں . ھمے بارو ءَ ، چہ دزّاپ ءِ شھر ءِ شورا ءُ استانداری ءِ کرد ءِ کارپدانی آسرال ءَ ، بانکانی پارک ءُ لیب جاہ ءِ اولی بھر ، ماں " بلوار انقلاب " ءِ مزن دگ ءَ ھلاس ءُ آسر بوتگ ءُ اے کار ءُ جھدانی دگہ بھرے ( دومی ) ھم ھمے زوتاں ماں اے شھر ءَ بندات کنگ بیت . دزاپ ءِ شھردار ءَ ھمے رد ءَ گُوَشت ، گوستگیں دوئیں ماھانی تہ ءَ پہ اے ھاتر ءِ کساس 6 ملیارد تومن بُنمال گیشینگ بوتگ ءُ بازیں اوزار ءُ سامانے ھم پہ اے بارو ءَ کار بند کنگ بوتگ انت / رجانک : میرجلال