چہ میارجل بنجاھی ھالرسانی ءِ ھالانی رد ءَ ; مُلکی بیاپاری جُھد کاران ، چہ چھبار ءِ لھتے  کانچی کُڈّلانی لوگ مُچّی ( مجتمع ) چُشکہ سَدَپ ، ابریشم ءُ ۔۔۔۔ گِلَگ اِش کُت ۔
اے دُکانداراں ماں گَپّ ءُ ترانے گون میارجلّ ءِ اِھوالکار ءَ گُوَشت کہ کانچی کُڈّلانی ماھینی نھاد ماں اے لوگ مُچّی آن آسمان ءِ سر ءَ شُتگ ءُ اے گرانی ءِ منانک ، درامدیں مردمانی پادنیامی پہ بُنمال بندی ءِ نیمون اِنت ۔ 
اے مردماں در مُلکانی تہ ءَ گوں دِگِہ ڈولین شرکت ءُ کارجاھانی نیمون ءَ ، پہ کانچی کُڈّلاں ٹوھیں نھادے دیم ءَ کار انت ءُ ما را آھانی دیم پہ دیمی ءَ ،  چوشیں زَرّانی دیگ ءِ جَوازَت نیست پمیشکا ما را پاد لپاش کن انت ۔ 
مُلکی دکانداران چہ چھبار ءِ آزات بندن ءِ زمہ واراں لوٹ اَنت کہ گوں یک سَرچاری بنجاھے ءِ ٹھینگ ءَ ، پہ کانچی کُُڈّلانی ماھینی نھاد ءَ رھدر ءُ رھبندے درگیج انت دانکہ چوشیں سیت چوسانی دستان گوند گِرَگ بہ بنت ءُ ما را ھم پہ کار ءُ چلوپگ ءِ ھاتر ءَ اے شھر ءِ تہ ءَ گُوَم ءُ گیگے بہ بیت ۔ 
میارجل ءِ ھوالکار گوں یکّے چہ اے لوگ مُچّی ان ءِ کارمستراں ءِ گَپّان ءِ اِشکُنگ ءِ ھاتر ءَ  گوانکوئی رھوتے کتگ ۔ / رکانک : میرجلال