چہ میارجل ءِ رسانکدر ءِ بنجاھی ھال ءِ نیمگ ءَ : بانک پریسا ایرندگانی ءَ درائینت : بے شک ماں ھر چاگرد ءَ بانکانی ساڑی بیگ ءُ ھمکوپگی آئی ءَ دیم ءَ بارت ءُ آ چاگرد شاھگان بیت تاک ءُ بر کنت ءُ گواڑگ جنت ءُ دیم روی ءِ راہ ءُ میدان ءَ پچ تر کنت ۔ بانک پریسا ایرندگانی یک جھدکار ءُ سان دیوکیں بانکے ماں بلوچستان ءِ چاگرد ءَ ، مھکم ، مزن ارادہ ءُ جھدکار کہ ماں مچانکی ءُ ربیدگی ءُ ازمی گیشتریں دیوان ءُ مراگشاں بھر زیر اِیت ءُ سان مندیں ھمراھی ئِے ماں چاگرد ءُ مچانک ءَ ھست اِنت ئِے ، پہ گیشتریں پجاروکی ءَ گوں اِے بانک ءَ میارجل ءِ گلگدار ءُ گپ ءُ رپ ءَ رندگیری کن اِت ءُ چہ دست مہ دے اِت ۔

میارجل : دروت ءُ سلام ءُ مھربانی چہ ایشی ءَ کہ وتی وھد میارجل ءِ ھالکاری ءِ بنجاہ ءَ داتگ ۔گڈ چہ دروت ءُ سلام ءُ وھد وشی ءَ وت ءَ را پجار کن اِت ءُ کارانے کہ تو کتگ اَنت پہ مئے وانوکانی واست ءَ بیان ءُ درانگاز بہ کن اِت

من بلوچ بانکے آں منی سرزمین ءُ سرڈگار ءَ مھر ءُ مارشت ءُ میارجلی ھست اِنت ، پہ پلیوار ءِ پاکی ءُ بازی ءَ کہ گلکار ءُ چکنکار ماں پشک ءُ سریگانی سر ءَ چہ بھیسہ ءُ بروسہ ءَ نکش کنگ بوتگ اَنت ماں آریپ ءُ مڑاہ دار ءُ بوھیر ءُ کنگرانی سر ڈگار ءَ کہ راہ ءِ سکّی اِش پہ زند گوازینگ ءَ بھر اِش کتگ اَنت ۔

جی ھو من روچ ءُ مچ ءِ سرڈگار ءِ یک جنکے آں آتکگ آں وتی ڈیھہ ءِ نکش ءُ نگاراں پد ءَ بہ دوچان ءُ جوڑ بہ کناں ۔ من یک بلوچ بانکے ءِ بستار ءَ اِے باور ءُ دیدانکوں ھست اِنت کہ وتی شھر ءِ دیم روی ءِ واست ءَ ھژدری ءُ سان مندیں کارستے بہ باں ۔ چہ جارانے کہ پرینگ بوتگ اَنت ءُ کرد ءُ کارپدانے کہ پیشدارگ بوتگ اَنت ءُ کارے چہ کاراں پہ وتی چاگرد ءِ واست ءَ بہ کناں ھرچنت وت ھم زانگ آں کہ منی سرڈگار ءَ مھروانی ءُ مھر ءُ میارجلی ءَ ھمیشہ بدل کتگ اَنت ۔ اِد ءَ مچ ءُ روچ ءِ سرڈگار اِنت کہ جنیناں نکش ءُ نگار ماں دست ءَ اَنت دانکہ امیتانی چراگ ءَ ماں اِے شھر ءِ دروازگانی دپ ءَ بہ بلین اَنت۔

من بانک پریسا ایرندگانی آں جنکے چہ بلوچ چاگرد ءَ ، چاگردے کہ جنک ءُ جنیناں مزنیں ارزشت ءُ بستار دنت ءُ گوں وتی ھاسیں دودمان ءَ ، الوم تربیبتی ءِ کارشناسی ارشد ءِ واھند آں ، سیاسی ءُ ازمی ءُ دودمانی جھدکارے آں ، روتاک ءُ سرای ءِ وتن ءِ ھپتگ تاک ءِ ھالکار آں ، گوں سدا ءُ سیما ءِ مھر ءِ ھنکین ءِ برنامہ ءَ ھمراھی ءُ ھمکاری کتگ ، مردم نھاد ءِ دستان ءِ توانا ءِ جوڑ کنوک ءُ بنیادی باسکے ھست آں ،گوں وڑ وڑیں موسسہ ءُ برنامہ ھاں ھمکاری ءُ ھمراھی ھست اِنت ،بسیج ءِ پئالیں باسکے آں ، بسیج ءِ پھر والا ھالکارے آں کہ گوں پھر سیاسی ، ازمی ، آموزشی ءُ ورزشی میداناں کار کتگ ،پنچمی دورہ ءِ شورای شھر ءِ تہ ءَ ماں گچینکاریاں بھر زرتگ ءُ کہ پنچ ھزار ءَ برز اوٹ آورتگ ، ءُ شورا ءِ الی البدل ءِ باسکے بوتگ آں ۔

میارجل : تئی دیدانک چہ یک بلوچ بانکے ءِ جاگہ ءَ کہ بلوچ بانکانی انیگیں جاور ھال ماں مچانکی ءُ دودمانی پڑ ءُ میداناں چون اِنت ؟

پہ یک بلوچ بانکے ءِ جاگہ ءَ منی برداشت ءُ دیدانک چہ بلوچ بانکانی انیگیں جاورھال ماں مچانکی ءُ دودمانی پڑ ءُ میداناں ساڑی بیگ کہ مجتی ماں چاگرد ءَ جست ءُ پرس بیگ اِنت ۔ گواچن اِیش اِنت کہ پیشتر ءَ بانک اش باور نہ کتگ اَنت کہ توان اَنت ماں ھر میدانے ءَ مزن جھدکارے ءِ دروشم ءَ گون بہ بنت ءُّ ماں اِے دیدانک ءَ نیمے چہ چاگرد ءِ کارکنوک ءُ جھدکاراں کرّ ءَ کنگ ءُ ڈالچار بنت ۔ کدم کدم ءَ بانکانی ھمراھی ماں چاگرد ءَ سما بیت ماں گیشتریں مچانکاں بلوچ بانک ماں مردینانی ھمکوپگی ءَ چاگرد ءِ میدان ءَ آتک اَنت ءُ گوں زانگ ءِ دیمروی ءُ سنچ ءُ بود ءِ پجارگ ءَ ، جنین یک سانمندیں رمب ءُ ٹولے ماں وڑ وڑیں مچانکاں دیم ءَ آتک ، کارمرزگ چہ جنین ءِ پگر ءُ سنچ ءُ سما ءُ بودناکی ءَ سرجمیں چاگرد ءُ ٹولانی توری سیاسی ، یا ازمی ءُ مچانکی بہ بیت ، دیمروی اِنت ، جنینانی ساڑی بیگ ءَ مسئلھے نیست اگاں ما وت بہ لوٹ اِیں توان اِیں سرجمیں میداناں دیمروی بہ کن اِیں ، من یک بلوچ بانکے ءِ جاہ ءَ سرجمیں ڈنگر ءُ دار گوازینتگ ءُ مچانک ءِ توک ءَ آتکگ آں ۔

میارجل :بانک ایرندگانی تئی لیکہ ءَ ھژدری ئیں لوٹ بلوچ بانک ءِ ماں اِے درگت ءَ چے اِنت؟

ھژدری ئیں لوٹ بانکانی ایش انت کہ آیانی سنچ ءُ بود پجارگ ءُ ماں مدیریتی پستاں ، پہ کار ءُ روزگار ءِ ءُ کارمستری ءِ واست ءَ زیرگ ءُ اِیر کنگ بہ بنت ، برنامہ ریزیانی واست ءَ یا لوگمانی  کسان ءُ مزنیں باپاری ءِ ھاتر ءَ یا شھر ءُ کلگانی دیمروی ءُ آبادی ءَ کارمرز بہ بنت ، چہ بدسرپرست ءُ بے سرپرستیں بانکاں مدت کنگ ءُ ھمے وڑ ءَ چہ بانکانے کہ ازم ءُ بودناکی اِش ھست پہ آیاں بیمہ جوڑ بہ کن اِیں ، ھاٹیگ مندیں بانکانی پجارگ ءُ منہ واری دودمانی ، سیاسی ، ازمی ءُ کشاوری ءُ دگہ دگر ءَ ۔۔۔ بہ بیت کہ اِے بلوچ بانکانی ماں انیگیں جاورھالاں ھژدری ئین ءُ مستریں لوٹ اِنت ۔

میارجل : بلوچ بانکانی چونیں نگیگی ھست اَنت ءُ آیانی توجیل چے اِنت ءُ چونیں کار کنگ بہ بنت ؟

مستریں نگیگی بلوچ بانکانی ایش اِنت کہ آیاں سابتیں کار ءُ روزگار نیست اِنت ، باپاری ءُ زرکاری وانگ ءُ زانگ  نہ بیگ ماں جنینانی کارانی تہ ءَ ، سرپرست ءُ لوگ واجھانی نشاھی بیگ ، زوریں لڈ ءُ لوگ چہ وتی ھنکین ءُ بنجاہ ءَ پہ ڈکال ءِ سوب ءَ پد ءَ ماں شھر ءِ کرّ ءُ کنک ءِ نندگ ءَ ،سنت ءُ ردیں باور ماں لھتیں ٹک ءُ کٹمانی میانجی ءَ ، زوتیں سوردیگ ءُ مالی بے وسی ، ورد ءُ وراک ءُ بھداشت ءِ نہ بیگ ، بیمہ سلامت ءُ تامین اجتمائی ءِ نہ بیگ ماں شھر کنکّاں ، سجلانی نہ بیگ ماں لھتیں جنیناں ،اِے مشکلات ءُ زیان پجاری ءِ کار کنگ ءَ کار جوڑی ءُ کار ءُ روزگار ءُ زانشتی کارجاھانی برجم دارگ ، کاربلدیں بانکانی پجار ءُ پیش برگ پہ کار جوڑی بنجاھانی نیمگ ءَ ءُ کار جوڑشت ، وام ءِ دیگ پہ لوگمانی کار ءِ واست ءَ توان اِیت پہ بانکانی واست ءَ سیت مند بہ بیت ۔

میارجل : تئی لیکہ ءَ مردمانی کارست پہ بلوچ بانکانی نگیگیانی توجیل ءِ واست ءَ چے اِنت ءُ چونیں امیتے چہ مردماں بہ کن اِیں؟

سرجمیں مردمانی ھرچ وڑیں مدت ءُ چہ کومی وت منّیاں پَھریزگ پہ بلوچ بانک ءُ لوگمانانی رزا بیگ ءَ مشکل ءُ نگیگیانی کم کنگ ،بنیادی لوٹانی پیلو کنگ ، آیانی وانینگ ءُ ھاٹیگ مند کنگ چہ نمایشگاھانی برجم دارگ ءِ سوب ءَ کہ مردمانی بنیادی زمہ واری اِنت پہ بلوچ بانکانی نگیگیانی توجیل کنگ ءِ واست ءَ اِنت ۔

میارجل : راہ ءُ در پہ بانکانی دیم ءَ آرگ ءِ واست ءَ ماں چاگردی ءُ دودمانی ءُ مچانکی میداناں چے اَنت؟

سرجمیں مردمانی ءُ دولت ءِ مدت ،باور ءُ بھیسہ ءُ بروسہ کنگ پہ بانکانی ھژدری تریں راہ ءُ در اِنت پہ ایشی ءَ کہ بانک ماں مچانکی ءُ دودمانی ءُ چاگردی پڑ ءُ میداناں وت ءَ دیم ءَ آورت ءُ پیش داشت بہ کن اَنت ۔

میارجل : تئی ھیال ءَ بلوچ بانکانی کارست پہ چاگرد ءِ دیم ءَ برگ ءَ چے اِنت؟

بانکاں کہ چاگرد ءِ نیم بھر اَنت ھژدری ئیں نکش اِش پہ چاگرد ءُ لوگمان ءِ روانی سلامت ءِ واست ءَ ھست اِنت اِش ،بانکاں مات بیگ ءِ زمہ ءُ نکش اِش ھست ءُ لوگبانکی ءِ زمہ واری ءُ چکانی ساٹینگ ، بہ گر شک ءَ پہ دودمان ءِ جوڑشتی ءَ مزنیں زمہ واری اِش ھست ، بلوچ بانک یکے چہ ھژدری ئیں کارستاں پہ چاگرد ءِ آبادی ءُ دیمروی ءِ واست ءَ ھست اِنت کہ اوپار ءُ جھد ءُ گامگیج زورگ ءِ چیدگ اَنت کہ گوں کم تریں امکاناتاں گیشتریں سیت ءُ نپاں زورگ ءَ اَنت ۔

میارجل : شمئے پشت ءُ پناہ ءُ مدت کنوک پہ ایشی ءَ کہ مچانک ءَ جھد کنگ ءِ واست ءَ گام چست کتگ کے بوتگ اَنت ءُ شمئے لوگمان دیدانک پہ ایشی ءِ بارہ ءَ چے بوتگ ؟

اول ھدا منی پشت ءُ پناہ انت ماں زندمان ءِ سرجمیں پڑ ءُ میدان ءَ ءُ دوم منی لوگ واجہ کہ منی زندگی ءِ شریک ءُ ھمراہ ءُ پشت ءُ پناہ ءُ مدت کنوک اِنت ماں زندگی ءُ چاگرد ءُ دگہ دگہ کاراں ھمراہ اِنت ۔اِے گپ منگی اِنت کہ سرجمیں میداناں نگیگی ھست اَنت ءُ برے برے انسان ءَ پہ نا امیتی ءِ نیمگ ءَ کش اَنت بلے منی وتی بازیں واھگ مندی ءَ ءُ لوگ واجہ ءِ ھمراھداری ءَ اِے مشکل ءُ نگیگی گوازینتگ اَنت ءُ لوگمان ءِ رزا گوں وتی شریں کار ءُ کرد ءَ گپتگ ءُ انگت ھم ماں وڑ وڑیں پڑ ءُ میداناں دودمانی ءُ مچانکیان جھدوں ھست اِنت ۔

میارجل : تئی پنت ءُ سر ءُ سوج ءُ گڈی دانک ءُ درد ءُ دل پہ میارجل ءِ رسانکدر ءِ وانوکانی واست ءَ چے اِنت ؟

منی پنت ءُ سوج پہ بلوچ بانکے ءِ بستار ءَ اِیش اِنت کہ وتی سر ءَ باور اِش بہ بیت ءُ بروسہ بہ کن اَنت دانکہ ماں دیمروی ءِ مزنیں میداناں گام چست بہ کن اَنت ، من یک روچے ءَ گندگ آں کہ منی سرڈگار ءُ سرزمین ءِ سرجمیں بانک پہ مزنیں تاکت مندی ءُ ھاٹیگ ءَ سر بوتگ اَنت کہ ھچ وڑیں بندیں راہ ءُ در نیست اَنت کہ پچ مہ بنت ۔گڑا مدام پہ وتی ھاٹیگ مندی ءِ رسگ ءِ ھاتر ءَ ماں سرجمیں کاراں زندمان ءِ جھد بہ کن اِت ءُ نا امیت مہ بئت ۔چہ میارجل ءِ رسانکدر ءَ منہ واری پیش کناں کہ موھ ئِے دات دانکہ وتی نگیگیاں درشان بہ کناں ءُ مزن شاباشی دیاں پہ وتی راج ءُ ڈیھہ ءِ سرجمیں بانکاں ءُ اللہ اِش میار ءُ باھوٹ بات ۔

رجانک : میرجان میر