چہ میارجل ءِ رسانکدر ءِ بُنجاھی ھال ءِ نیمگ ءَ : بلوچ بانکاں مَنارینتگ کہ ماں ھرچ پڑ ءَ کہ آیاں زمہ واری دیگ بہ بیت آ توان اَنت وتی زمہ واری ءَ گوں شرین ءُ ڈولداریں دروشمے ءَ گڈسر ءَ رسین اَنت ۔
مھلا جوادی چہ ھما ٹول ءِ مزن جھد ءُ مزن سنچ ءُ بودناکیں بانکان اِنت کہ توان اِتگ ئِے سان مندیں جھد ءُ کرد پہ بلوچستان ءِ چاگرد ءَ سر بہ کنت ۔اِے بلوچ بانک ماں نبشتہ کارے ءِ پِڑ ءَ ءُ لچہ کاری ءِ میدان ءَ وتی بور ءَ تاچان اِنت ءُ شریں کتاب ئِے پہ وتی نام ءَ چاپ ءُ شنگ ئِے کُتگ اَنت ۔ مھلا جوادی ءَ ماں وتی گپ ءُ رپاں گوں میارجل ءَ درائینت ئِے :" وھدے کہ راھنمائی ءُ دبیرستان ءِ وانگنءِ درگت ءَ وھدے کہ شریں ریزمانک نبشتگ گڑا وتی اندری سِنچ ءُ بودناکی ءَ ماں کلمکاری ءِ پِڑ ءُ میدان ءَ پوہ بوتگاں ءُ گوں وتی استاد ءُ وانینوکانی دلبڈی ءُ رھشونی ءَ جھد کتگ کہ اِے سِنچ ءُ بود ءَ گیشتر بہ ساٹین آں ۔
آئی ءَ درائینت : ھمے انیگ ءَ دو چاپ کتگیں گِدار گوں "آشکی ءِ دود"ءُ "باھینتگ دل" ءِ ناماں چاپ ءُ شِنگ کُتگ اَنت ءُ سیمی گدار ءِ نبیسگ ءَ مولمہ آں کہ نام ئِے "بلوچستان ءِ بانک " اِنت ۔ اِے کلمکاریں بانک ءَ تران کنان کُت : چہ ایشی ءَ کہ وت مَنّی ءُ بند اِش مئے استان ءَ گیشتر چہ دگہ جاہ ءُ استاناں گندگ بیگ اِنت پہ مئے بانکانی واست ءَ کار کنگ سک گران اِنت ءُ پہ اندری مارشتانی رودینگ ءُ بالینگ ءِ واست ءَ ھم موہ کم تر ءُ میدان کستر اِنت ، بازیں بانکاں ماں ھمے استان ءَ پجاہ کاراں کہ ھمے کوریں وتمنّیانی سوب ءَ گیشتر جھد کت نہ کنگ اَنت ۔
آئی ءَ گڈسر ءَ درائینت ; چہ سرجمیں کلمکاراں کہ منی تواراں اِشکنگ اَنت لبزانکی گل ءِ دیواناں بھر بہ زور اَنت ءُ جھد بہ کن اَنت کہ وتی اندری سِنچ ءُ بود ءَ پجاہ بیار اَنت ءُ آئی ءَ شری ءِ سر ءَ بہ بالین اَنت ءُ بہ ساٹین اَنت ۔
.png)
