چہ میارجل ءِ رسانکدر ءِ بُنجاھی ھال ءَ ، واجہ مھمد جواد سادکی ءَ  نبشت : دانکہ دوشی سے تھل ءُ نہ وشیں ھال ماں چھبار ءَ 1400 ءِ نوکیں سالروچاں گوشاں کپت اَنت کہ مئے شھر نند مانش ءُ کبرانی میار ءُ باھوٹ بوت اَنت ، آ ھم بس یک گوانکے ءِ ھاتر ءَ ، اِے دانک ءِ نبیسگ  پہ آیانی لوگمان ءِ واست ءَ سک سکّ اِنت کہ آیاں وتی دلبندیں ورنا بس یک گوانکوے ءِ ھاتر ءَ چہ دست داتگ  اَنت  اِے پیش آتکانی یات کنگ باز سکّ اِنت ۔

چھبار چو براھداریں جارانی توک ءَ چوکہ "10 مگاپورت ءِ دنیا" " ملک ءِ بنداتی اُگیانوسی بندن " "شھرے کہ باندات ءَ چینا ءِ شانگھای ءِ جاہ ءَ بیت" داں دل اِت بہ لوٹ اِیت بُنجاہ ئِے ھست : پتروشیمی ءِ بنجاہ ، آسن ءِ بُنجاہ ، تر ءُ گرد ءِ بُنجاہ ، آسیا ءُ اروپا ءِ ھور کنوک ،آسیای میانہ ءِ باپاری ءِ بُنجاہ ءُ اوزار ءُ ترانزیت  جاہ ، وڑ وڑیں دل ریپین ءُ براھداریں جار ءُ ستایانی توک ءَ اِنت ءُ درستیں چیزانی نھاد  چہ ملک ءُ لوگ ءَ بہ گرد دانکہ مُرگ ءُ ھیک ءَ آزمان ءِ سر ءَ شتگ  ۔

چنت روچ پیش ماں چھبار ءِ شھر ءِ دلگاہ ءَ کہ بازار سیاہ ءِ نام ءَ نام کپتگ ءُ گندگ ءَ گوانکو دز ءُ آیانی باپاریانی سَٹّ مَٹّانی جاہ اِنت کہ ھما روچ ءَ انچیں جنگ ءُ جدلے راہ کپتگ کہ ساکیانی بادشاہ ءِ کجام جنس گوں ھاپز شیرازی ءِ دلکشیں "می " ءِ وڑ ءُ پیم ءِ اِنت بلے اِے گپ ءِ تالان کنگ ءُ راھبُرّی ھژدری نہ اِنت ۔

اِے وڑیں نہ وشیں گپانی اشکنگ ءُ ناامنیں جاورانی گندگ  ءَ ماں شھرے ءَ کہ درست  آئی ءَ گردوکانی گلباگ ئِے بہ زان اَنت بلے آ شھر ءِ واھگ ءُ باندات ءِ برورد دیم پہ ناامیتی ءَ بدل بیت ءُ پد ءَ ما اگاں بیا اِیں سدبر ءَ بہ نبیس اِیں کہ " بلوچستان امن اِنت" ھچ سان مندی یے نہ یار اِیت ! ۔

رجانک : میرجان میر