میارجل ءِ رسانکدر ءِ بنجاھی ھال ءِ نیمگ ءَ: پہ بلوچستان ءِ وش دروشم ءُ براھداریں ندارگ کَشّی ءَ سرباز ءِ آبند ءَ راھگیج بوت اِیں ءُ پیروز آباد ءِ شونک ءُ ڈولداریں میتگ ءَ شت اِیں ، پیروز آباد ءِ دھستان پھرہ ءُ چھبار ءِ راھسر ءَ اِنت ءُ ماں راسک ءِ شھرستان پنچ کیلومتری ءَ اِنت۔
اِے دھستان ءِ آپ ءُ ھوا گرم ءُ ھشک اِنت ءُ کمے نمب ھم بیت کہ سک کم بیت ءُ سال ءِ گیشتریں دم ءُ درگت ءَ ھمے وڑ اِنت ءُ سرباز ءِ کور ءِ کَنکّ ءَ اِنت; اے کور ءِ بُن چمگ ءُ آپ ءِ سَر چہ گویمرک ءُ ھنسانوچ ،پشام کور ، سرکور ءِ کور ءَ اِنت۔
پیروز آباد ءِ دھستان ماں راسک ءِ شھرستان ءَ اِنت کہ یکے چہ مسترین ءُ ھژدری ئیں دھستاناں شمار بیت کہ کوھنیں دروشم ءُ ڈیل ئِے ھست ءُ کوھنیں استائی ءُ سنتی دروشم ءَ جوڑ بوتگ کہ ماں استان ءَ کم گندگ بنت ءُ ملک ءِ بِستاری ھساب ءَ بنجاہ ءُ ھژدری ئیں شاھراہ بوتگ کہ آ آبند ءِ دگہ ملک ئِے گوں ھمساھگیں ملکاں ھور ئِے کنائینتگ اَنت ءُ پیشتر ءَ کہ کوھنیں کوٹ ءُ کلات ئِے بوتگ ھاسیں بستار ءُ جاگہ ئِے ماں سرباز ءُ بلوچستان ءِ آبریچ ءَ بوتگ ئِے ۔
رَند چہ دم ءُ گینسارت ءَ پیروز آباد ءِ کوٹ ءُ کلات ءَ شُت اِیں; کہ کلاتے دگہ داب ءُ ڈیلے ءَ گوں ھاسیں استا کاری ءَ کہ منسور پاد مئے رھشون ماں اِے سپر ءَ بوتگ ءُ اِے کوٹ ءُ کلاتے سال ءُ امر ئِے گشان کتگ : اِے جاگاہ گوں 2500 متر مربّہ ءَ ماں پیروز آباد ءِ کلگ ءَ ءُ پنچ کیلومتری ءِ راسک ءَ اِنت ءُ ھاکمانی ھاکمی کنگ ءِ جاگہ ماں اِے آبند ءَ بوتگ۔
چہ پٹ ءُ پولکارانی گوشتن ءَ اِے کلات اسلامی دور ءُ زمانگ ءِ بندات ءَ کہ اربانی واھند بیگ ءَ ماں اے آبریچ ءَ مکران ءَ جوڑ کنگ بوتگ، گاجاریانی زمانگ ءِ گڈسر ءَ کہ چہ دمگی ھاکماں ھکومتی ءَ چہ دست گِر اَنت ءُ، بارکزئیانی ٹک ماں اِے آبریچ ءَ ھکومتی کن اَنت کہ رزا شاہ ءِ بیڑ ءُ ارش ءَ ماں دوست مھمد ھان ءِ زمانگ ءَ کہ مکران ءِ دمگی سردارانی سر ءَ مرکزی دولت بیڑ بارت ءُ اے کوٹ ءُ کلات وتی براہ ءُ زیبائی ءَ چہ دست دے اَنت ءُ ھاکم ءِ پشت کپتگیں مردم اِے کوٹ ءُ کلات ءَ یلس کن اَنت ، اِے کلات ماں دست جوڑ کتگیں ڈمپے ءَ کہ برزی ئِے 15 متر ئِے بیت جوڑ کنگ بوتگ، ءُ ھمے ایشی ءِ بنپد ءُ دیوال چہ کور ءِ ڈوکاں جوڑ کنگ بوتگ ءُ سرباز ءُ راسک ءِ براہ ءُ ڈولداریاں شمار کنگ بیت ۔
گڑا وتی راہ ءَ روان بوت اِیں کہ سرباز ءِ مزنیں کور ءَ رس اِت اِیں کہ کسانیں کورکانی سرانی ھور بیگ ءِ جاہ ; سرکور ، ھنسانوچ ، گویمرک ،کیشکور ءُ پشامگ ، جژان جوڑ بوتگ ءُ ماں دشتیاری ءِ آبند ءَ باھوکلات ءِ کور ءَ نام ئِے بدل بیت ءُ مکران ءِ دریا ءَ باھو ءِ ھور ءَ رِچ اِیت ۔دگہ کور آئی ءِ آشار اِنت کہ نھنگ ءِ کور ءِ جوڑ بیگ چہ رودرآتکی بلوچستان ءِ پھنات ءَ چہ گوادر ءِ نزیکی ءَ ماں مکران ءِ دریا ءَ رچ اِیت ، ءُ راسک ءِ شھرستان ءِ گیشتریں کلگ چو دراج کش وڑ اَنت ءُ کور ءِ دوئیں نیمگاں ماں کوہ ءِ پادین ءَ جوڑ بیتگ اَنت ۔
.png)
