چہ میارجل ءِ رسانکدر ءِ بنجاھی ھال ءِ نیمگ ءَ :جمیلہ ملازھی کہ مزن کار پجاری ءِ سند ماں ھکوک ءِ تھر ءَ ھست اِنت ءُ سال 92 ءَ شورای شھر ءَ گچینانی میانجی ءَ اوشتات ءُ کہ ھما وھد ءَ شھر ءِ دومی نپر بیت ءُ انیگ ھم گھ ءِ ادارہ گَلہ ءِ زمّہ وار اِنت کہ ،پنوج،گنداوگ،لاشار ءِ آبریچ ءُ کش ءُ گور دست ءِ چیر ءَ اَنت ئِے;
ھژدری تر ایشی اِنت کہ اے بلوچ ءِ جھدکاریں بانک ءِ سوبینی ءُ آیگ ءِ کسو ماں گچینکاری ءِ میدان ءَ چہ رستم ءِ ھپت ھان ءَ ارزان تر نہ بیتگ بلکیں سک تر ھم بیتگ۔ تہ ادامہ ءِ گپ ءُ گُپت ءَ گوں آئی ءَ وان اِت۔
بانک ملازھی:چہ رستم ءِ ھپت ھان ءَ بگوش اِت، چتورکا شما اولی بر ءَ توان اِت کہ گھ ءِ گچینگاریانی میدان یک زالبولے ءِ جاہ ءَ بیا اِت ءُ بھر بہ زیر اِت ؟
اول سر ءَ باز سک اَت ءُ پہ آسانی من اِش کبول نہ کُت، بلوچستان ءِ چاگرد یک سنتی چاگردے ءُ لھتیں سَک دیم ءَ اوشتات اَنت، ءُ انگت تو بہ گوش من آیانی گور ءَ شُت آں ءُ باز ازیت بیت آں من لوٹ اِت اولی رند ءَ گھ ءِ سنتی شھر ءَ پہ گچین ءَ اوشتوک بیتاں ءُ بلکیں چہ وتی سیاد ءُ وارس، ءُ بازیں مردم ءُ ھلاپاں سک باز پہ درد بیتگوں۔بازیں نگیگی اِش اڈ کُت، بازیں ھرابی بیتگ بلے پد ءَ ھم وتی ھبر ءِ سر ءَ اوشتاتگ آں انیگ پد ءَ ھم آتکگوں کہ گچین بہ باں اگاں مہ تواناں چہ مشکل ءُ نگیگیانی سوب ءَ شورا ءِ شھر ءِ ٹول ءِ توک ءَ برواں، الم ھچ جنینے نہ توان اِیت ماں ھچ دورھے ماں گچینکاری ءَ ھوار بہ بیت بلے باید اے دود پروشگ بہ بیت ءُ یکے پیش مرگ بہ بیت اِنت۔
کمے گِیشتر بگوش اِت؟
رَند چہ نام نبیسی تہ شورا ءِ شھر ءَ لوٹ اِت آں ھر پیم ءَ کہ بیتگ ءُ گوں یک یک مردماں ھبر بہ کناں۔ پھکانی لوگ ءَ شُت آں ءُ من بازیناں گوں ھبر کُت گیشتر پہ آسانی رازی نہ بیت اَنت ءُ من گوشت من لوٹاں ایشی کہ زاھریں توار پہ جنیناں بہ باں باید مارا جھگیر جنین بہ بیت ءُ منی مکسد ایشی نہ اِنت کہ مردینانی جاگہ ءَ بگر آں ما یک ءُ دگرے ءِ گور ءَ پورہ ءُ سرجم اِیں،
آیاں گوشتگ اَت کہ انگت مئے سنتی ءُ اسلامی چاگرد اجازت نہ دنت گوشتگ اش کہ باید سنتی چاگرد اجازت بہ دنت ءُ من آتکگون ءَ ءُ باید مئے سر ءَ بروسہ ءَ بہ کن اِت،انی گپ کنگ سکّ باز زوت اِنت، چارسال رند ءَ چہ من ءَ راہ برّی ءُ ھبر بہ بیت ءُ ھر چنکر ءَ کہ شما گوش اِت کہ اے زالبول نہ توان اِیت بلے من وت پہ اے باور ءَ رستگون ءَ کہ توناں شورا ءِ شھر ءَ ھوار بہ باں ءُ جواناں ھم ادامہ ءَ آئی کبول کُتگ ءُ چاگرد ءِ زانتکاراں ھم وتی کمک ءُ مدت ءِ جار اش جتگ،ءُ الم ءَ راہ سکیں راھے اَت ءُ پہ آسانی کبول بیگ ماں گھ ءِ سنتی چاگرد ءِ120ھزار نپری ءِ توک ءَ پہ اے آسانی ءَ نہ اَت ; گوں پھکیں کسواں آسر ءَ من توانت شھر ءِ شورا ءِ باسک بہ باں ءُ تہ شورا ءَ ھم توانت بازیں سوبینیاں پہ دست بیاراں ءُ ھر چنکر کہ من ءَ دل سیاھی اِش کُت بلے سوبمند نہ بوت اَنت کہ منی راہ سر ءَ بگر اَنت ءُ پہ شری سر ءَ توانت مردمانی بروسہ وتی نیمگ ءَ کَشّ اِت، من تہ آ چار سال ءَ یک سالے شھر ءِ شورا کمک کارمستر اِتاں ءُ یک سالے شھر ءِ شورا ءِ سرمستر بیت آں۔
چتور شما رازی کُت اَنت؟
من آیاں گوشت کہ ھاسیں ٹک ءُ کٹمے ءِ نمایندگ ءُ جھگیر نیاں ءُ من پھکیں مردمانی جھگیراں ءُ پہ راستی لوٹ آں پہ شمارا ھزمت بہ کناں;شما اگاں پہ من ءَ اوٹ بدئیت،الم کہ پشوماں نہ بئت ءُ رند چہ 4سال ءَ ماں سال ءِ 95 ءَ گھتریں جنین چہ مرکزی بکشداری ءِ نیمگ ءَ کارانے کہ کتگ اِت اَنت بیت آں ءُ اے بنگپ بزاں ایشی کہ منی جھد اِش چہ پھکیں گھ ءِ زالبولاں گھتر زانتگ اِش۔
پہ بلوچ ءِ زالبولاں چے توان اِت بگوش اِت؟
من یک بلوچ جنینے ءِ جاگہ ءَ گوشاں کہ ما توان ایں ءُ اھدیگیں ربیدگی تراشتگیں بُت باید پروشگ بہ بنت ءُ ھما وڑ ءَ ھم پیش کپتگ کہ ما بازیں چہ چنت سالی ربیدگی بُت پروشتگ اَنت ءُ ھرچنکر کہ اَنچائیں مردمانی پگرانی سر ءَ کار کنگ ءُ آیانی بدلینَگ ھم سَک انت، چہ ایشی ءَ رند ھم ما توان اِیں بلے یک وھدے کہ نہ بیتگیں کارے اَت کہ چار مردین ءِ کش ءَ یک مردینے بہ بیت ءُ جلسہ ءُ مراگشاں بہ روت بلے من سوب بیتوں کہ جنینانے کہ تہ لوگ ءَ نشتگ اَنت، در بہ کپ اَنت چہ لوگ ءَ ءُ چاگرد ءَ ھور بہ بنت ءُ چہ وتی ھَک ءَ دیمپانی بہ کن اَنت ءُ وتی ھبراں بہ کَن اَنت۔
جنینانے کہ چُک اِش ھست اِنت بایت پہ وتی زانگ ءُ توانائی ءَ ایمان اِش بہ بیت ءُ آیاں بھر بہ کن اَنت، ھمے دروشم اَت کہ لھتیں نا برابریاں آسان بہ کناں انیگ انچش بیتگ کہ اے دورہ ءَ 4 یاں 5 جنین ھست اِنت کہ لوٹ اَنت ماں شورا ءِ گچینکاری ءَ اوشتوک بہ بنت ءُ من پگر کناں انیگ مردم پہ جاگھے رس اِتگ اَنت کہ جن ءُ مردین گور اِش چارگ نہ بیت ءُ انگت ھست اَنت ءُ راہ دنیگت پہ روگ ءَ باز اِنت بلے چاگرد ءِ مردمانی پگر اِش کبول کُتگ کہ انی جھگیر اِش جنین بہ بیت یا مردیں پَرک نہ کنت لازمی اِنت کہ جھدکار ءُ کارزانت بہ بیت۔
پہ شمئے ھیال ءُ لیکہ ءَ بلوچ جنینانی پَد مَنتگی ءِ دلیل ءُ منانک چہ مردیناں مچی اِنت؟
بنگیجی مشکل ما وت ھست ایں ،لھتیں وھد ءَ ما جنیناں وت میار بار ایں،ھو ھچ مردینے نیست اِنت دانکہ بیئت ءُ جنینے دست ءَ پہ زور بگر ایت ءُ بگوش اِیت بیا دانکہ من تئی سِنچ ءُ بود ءَ پیش بہ کناں،بلکیں ما وت باید پہ وتی کار زانتیاں باور بہ کن ایں ءُ وت وتی ھک ءِ رند ءَ بہ رو ایں، ءُ دگہ مشکل ھم کوھنین ءُ سُنّتی چاگرد اِنت،انیگ ھر چنکر پہ جنینانی کار کنگ ءَ چہ ایران ءِ اسلامی جُنز ءُ ھکومت ءَ ھچ مشکلے مہ بیت بلے سنتی چاگرد مارا اے بارو ءَ موکل نہ دنت ءُ ایشی دگہ چہ مئے مشکل ءُ نگیگیان اِنت ۔
وشیں ترانگے چہ مردین ءُ جنین ءِ ڈیک ورگ ءَ ھست اِنت شمارا؟
یک برے من گوں چار ھمکار ءَ پہ یک نمایندگے چارگ ءَ ماں کنرک ءَ شُتگ اِت آں; اوداں ماں یک مراگشے تھ ءَ بیتگ اِت اِیں یک مردینے ھست اَت ءُ من اش گوشت شما برو دیر ءَ جنین نند اَنت سے بَر ءَ ایشی من ءَ گوشت دانکہ من توار بُرز کُت ھمائی کہ تزکر دیگ اَت ءَ گوشتوں "من گھ ءِ شورا ءِ کارمستر آں ءُ آتکگ آں مردمانی نگیگیان ءَ بہ گوشاں اگاں شمارا گوں منی اد ءِ بوتن ءَ مشکل ھست اِنت شما وت چہ اد ءَ بہ رو اِت" ءُ ھمے دمان ءَ واجہ ایران نژاد ءَ ھم گوشت اے بانک راست گوش اِیت ءُ اگاں شمارا مشکل ھست اِنت شما وت چہ دیوان ءَ بہ رو اِت ءُ اے بانک آتکگ دانکہ شھر ءِ مردمانی نگیگیاں گوں من ءَ بہ گوش اِیت،
اے چاگرد کوھنین ءُ سنتی اِنت ءُ اے سسّا ءَ کنت جنین باید اِنت لوگ ءَ بہ نند اِیت ءُ بَس چُک ءَ بہ دار اِیت ءُ پہ وتی مرد ءِ کار ءَ برس اِیت، ھو ایشاں ھم ھژدری ئیں کار ھست اِنت ءُ من ھم سیرکتگین ءُ مرد والا ءُ چُکّ ءُ چلانگوں ھم ھست اِنت بلے لوٹ آں وتی چاگرد ءِ توک ءَ ھم ھوار بہ باں ءُ چاگرد ءَ ھم ایشی ءَ باید اِنت کبول بہ کنت۔
شمئے ھیال ءَ پرچا جنین آں بلوچ اینکہ ماں دھیاری ءُ بکشداری ءُ ۔۔۔سوب مند تر چہ مردیناں گندگ بیگ انت؟
پہ اے ھاتر ءَ کہ جنیناں نہ لوٹ اَنت بروسہ چہ دست ءَ بہ روت، آیانی شمار انگت کم اِنت ءُ گوں اے ھال ءَ سَک وتی کار ءُ جھد ءَ ھساس ھست اَنت ءُ گوں پھیں توان ءَ کار کن اَنت بلے مردیناں آ رند گیری ءُ ھساسیت آن اِش نیست اِنت، جنیناں باز رندگیر اَنت ءُ ھمے پیم ءَ بیتگ دانکہ مردیناں ھنوں پہ اے برورد رستگ انت کہ جنین دھیار شرتر اَنت، من امیت واراں دانکہ سرجمیں پڑاں جنیناں شھر ءِ شورا ءِ ٹول ءَ بہ رو انت ءُ گوں اے وت باوری ءَ بہ رس اَنت ، من ءَ وت ھمے باوراِنت بازیں جنینے اے زمانگ ءَ شورا ءِ شھر ءَ ھور بہ اَنت کہ من پہ اِشانی ھمراھی ءُ ھوری ءُ ھست ءَ پھر کناں۔
آھری گپ؟
بازیناں کہ ھما بندات ءَ چہ منی بیگ ماں شورا ءِ شھر ءَ نہ منتگ اِش ءُ رند ءَ کہ رای اورت ءُ منی کار اِش دیست، وت چہ وتی لیکھاں تَرّ اِت اَنت ءُ بلکیں بازیں جاگھاں ماں شورا ءِ شھر ءَ کہ من کارمستر بیتگ آں من اِش مدت کُتگ،گُڑا پہ پھکیں بلوچ ءِ جنیناں الم بہ بنت کہ توان اَنت گڑا بلوٹ اَنت.
رجانکار : مھرنگ بلوچ
.png)
