میارجل ءِ ھالرسانی بُنجاہ ءِ ھالانی رِد ءَ : چھبار بلوچی لبزانکی گل ءَ کتاب ءُ کتابوانی ءِ ھپتگ ءَ وتی ماھی مراگش ماں کمالان ءِ دیوانجاہ ءَ برجم داشت ، آئی ءِ گِنداری روایت شمئے چم ءُ دیدگانی دیم ءَ گوز اِیت ۔
چہ میارجل ءِ ھالرسانی بنجاہ ءِ ھالانی رِد ءَ : چھبار بلوچی لبزانکی گل ءِ ماھی دیوان کہ پہ کتاب ءُ کتابوانی ءِ ھپتگ ءَ برجم دارگ بوتگ اَت دیوان ءِ بندات ءَ گَل ءِ کارگشاد واجہ میرجان میر ءَ دیوان ءِ آیوکیں لچہ کار ءُ ازمکار ءُ گْوشندہ ءُ پولکار کہ چہ بلوچستان ءِ بازیں ھَند ءُ دمگاں بلکیں چہ جیونی ءُ کراچی ءَ ماں اِے براھداریں دیوان ءَ آتکگ ءُ بھر اِش زرتگ اَت ، وش آتک ئِے کُت اَنت ءُ درّائینت ئِے : چھبار بلوچی لبزانکی گَل ماں دو تَھر ءَ لچّہ ءُ رِدانک ءِ تہ ءَ کار ءَ اِنت بلے بژنی گپ اِیش اِنت کہ وت ءَ شرّین ءُ مُکیمی جاہ ئِے نیست اِنت کہ وتی دیوان ءُ مراگھاں چو درامدانی پیم ءَ برجم داران اِنت ۔
دیم تر ءَ تران ئِے کنان کُت :انی ماں اِے دور ءُ زمانگ ءَ ھپتگی ءُ ماھی مراگہ ھر پشمبے ءَ چو وانگجاہ ءِ دروشم ءَ برجم دارگ بیگ ءَ اَنت بلے ماہ ءِ گُڈّی پشمبے ءَ ماھی دیوان برجم دارگ بیت اِنت کہ لچہ کار ءُ ندکار چہ بلوچستان ءِ کنڈ کنڈ ءَ بلکیں چہ ھمساھگیں ملکاں کاینت ءُ بھر زیر اَنت ءُ اِے ماہ ءِ دومی مراگش اِنت کہ کابینہ ءِ نوکیں باسک ماں ھمے جاہ ءَ برجم ئِے دارگ اَنت بلے ھبکّھی گپ اِیش اِنت کہ سرجمیں کارجاھاں ھاسیں زر پہ دود ءُ ربیدگی کاراں گیشینگ بیت اِنت بلے اِد ءَ کہ لبزانکی گَل کہ لبزانک ءُ بلوچی زبان ءِ اِیوکیں پُشت ءُ بانپان اِنت ھچ وڑیں زرّ ئِے دیگ نہ بیگ انت کہ اِے جھان ءِ ھبکہ تریں گپے ۔
آئی ءَ گیش کُت : شئر ءِ زبان ، مھر ءُ دوستی ءِ زبان اِنت پرچا کہ چہ دل ءِ اندر ءَ باھُند کنت ءُ الم ماں دل ءَ نند اِیت ءُ شئر ءَ پہ چاگرد ءِ زانت ءُ زانگ ءِ ودّینگ ءَ مزنیں کارِستے ھست اِنت : ما سرجمیں کم کاریاں چہ وتی نیمگ ءَ گندگ اِیں بلے انوں وتی کار گوں جوش ءُ جزبگ ءَ بندات کتگ ۔
رجانک : جاڑو بلوچ