میارجلّ ھالرسانی بُنجاہ ءِ گزارش ءِ رِد ءَ چہ شھرستان راسک ءِ دمگاں پارود ءِ بھرگ ءُ پارود ءِ شھر ءِ ورنا گیش چہ 1500 وردشکار ءَ گوں کمتریں آسراتی ءُ بدتریں چاگردی جاوراں گوں ھاسیں مھرے ءَ وردش ءَ گلائیش بنت.
لھتے چہ پارود ءِ وردشکاراں گوں میار جلّ ءِ ھالکار ءَ گپّ ءُ تْران کنان ءَ دَرّائینت اِش؛ پارود بومی دمگی ءُ پادبولی وردشانی ردوم جاہ اِنت ورنا ھاسیں مھر ءُ واھگے گوں وردش ءَ دار اَنت آ پہ وردش ءُ پادبولی ءِ دوستی ءَ ساڑی اَنت کہ ماں ڈلپاداں ءُ گوں بدتریں جاوراں گْوازی بہ کن اَنت.
وردشکارانے کہ ماں گْوازی ءِ وھد ءَ تھلیں ناگتالانی آماچ بوتگ اَنت ءُ سکّ ٹَپّ ءُ ٹور ءُ درد ءُ دور دیستگ اِش بلے وردش ویل اِش نہ کتگ آیاں چہ اُگدہ داراں یکّیں استاندارد ورزشی زمینے ءِ ودار بست اَت کہ سالانی سال اِنت اِے وداراِش آسر کنگ نہ بیگ ءَ اِنت ءُ پہ ناچاری سکّیانی دیمپان بنت ءُ وردش ءَ ویل نہ کن اَنت.
گُش اَنت : ماں ھستیں راجمان ءَ ورنا بازیں جیڑہ ءُ جنجالانی آماچ بوتگ اَنت ءُ چاگردی تاوان اِش ماں پد ءَ اِنت اَگاں اے آسیبانی سر گِرگ مہ بیت تاوان باری ءِ سوَب بنت گُڑا بْیا اِت ماں وردش ءِ پِڑ ءَ وردشی بُن ھشتی شاھگان کاری ءِ تہ ءَ ورنا ءُ وردشکاراں کمک بہ کن اِت تاں ورنا کمتر چاگردی آسیبانی نیمگ ءَ برگ بہ بنت.
.png)
