مروچ یکشمبے  4 مهر 1400 همدپ گوں 26 ستمبر 2021 ءَ  چهبار ءِ بلوچی  لبزانکی گل ءِ هم شَوری دیوان گوں آئی ءِ نوک ءُ کوهنیں باسکانی هوری ءَ ماں اِے بنگپ ءِ سر ءَ که :" چتو بکن اِیں لبزانکی کار ماں چهبار ءُ بلوچستان ءِ ته ءَ چو پیشگیں وڑ ءَ جوانیں گامگیج بزور اَنت " ؟ چَه که کرونا ءِ جهان پیڑیں نادراهی ءَ ماں گیدی ءَ سر کش اِتگ لبزانک ءَ اَبید ، سرجمیں نیادیانی دروازگ بند کنائینتگ اَنت ئِے که همے سوب ءَ  لبزانکی گَل ءَ هم آ وڑیں نند ءُ نیاد ءُ دیوان ءُ درگاه گرگ نه بوتگ انت که لبزانکی مردمانی زرد ءَ به ترهین اَنت ، تُنّ ءَ به پروش انت ءُ دل ءِ مست ءُ لهڑیں چول اِیرماد به بنت.

اِے آهِری دم ءُ درگت ءُ وهد ءُ اَدار مُدام گوں وڑ وڑیں نِیموناں چه مئے دست ءَ لکشتگ اَنت بلے وشبهتی ءَ مروچ یکشمبے ءِ سُرمگیں بیگاه ءَ گَل ءِ چَندے باسک چو ھانل ءِ سستگیں دستونکّ ءَ یکجاه چِتگ ءُ هم نیاد کنائینت انت که اِے هم نیادی  ءَ هرکس ءَ وتی لیکه درشان ءُ دل ءِ گپ درانگاز ات انت ءُ اِے شَور ءَ که "هر هپتگ ءَ دو ادار په لبزانک ءِ باره ءَ تران کنگ به بیت ءُ گَل ءَ وھد دیگ بہ بیت " چه دراهیناں گیشتر باج ئِے برت ، اگاں اِے مُچی ءُ نند ءُ نیاد مُجّتی به بنت گڑا سرجمیں جیڑگ ءُ جنجال دیم ءَ آرگ بنت.

وڑ وڑیں لیکه ءُ دیدانک دیم ءَ آتک انت بلے سرجمیں نندوکاں اِے گپ مَنّ اِت ءُ رزامندی اِش پیش کت که هر استادے هپتگے دو ادار په باسکانی سرپدی ءَ یک گِچتگیں بنگپے ءِ سر ءَ گپ بکنت ءُ وهد به دنت که دیم ءِ هپتگ ءِ بنگپ : چکاسنگی بنگپے ءُ دیوانے که واجه تارک هوت ءِ وتی گُپت ءُ لوٹ ءَ آئی ءِ لچه ءِ سر ءَ گپ ءُ شرگداری کنگ به بیت .
ماں اِے هم نیادی ءَ چه واجهاں ، واجه (ماسٹر رشید . الی بکش دشتیاری . گلام بهار .شے سید . جنید بلوچ . تارک هوت .اکبر کلمتی .نیاز بلوچ ءُ میرجان میر ) اِت اَنت ءُ چه بانکاں ،گْرانازیں بانک ، پروانگ (کلکشان بلوچ) جنگی زھی دیوان ءَ ساڑی اَت ،ءُ ادار هپت ءُ نیم ءَ دیوان ءِ هلاسی ءِ جار پِرینگ بیت.

هالکار ، چھبار بلوچی لبزانکی گَل ءِ کارگشاد : میرجان میر