باتیل ءِ کوہ ءِ اولی نام کہ سکندر آزم ءِ دھر ءِ راجدپترانی تہ ءَ ھست انت اِیشی ءِ نام آ دھر ءَ *لمباتیر* بوتگ ، بیت کنت کہ اے بلوچی یا پارسی گالے کہ المبا تیر بوتگ ءُ تازیاں(اَرباں)  اِشی ءِ دیم ءَ گیش کتگ ءُ ھمے نام ءَ توار جنگ بوتگ ، استاد ھسن اَلی سھیل گش ایت کہ من گوں گوادر ءِ میداں باتیل ءِ کوہ ءِ بزانت ءُ مانا جست کرتگ گڑا آھاں ھمے پسو داتگ کہ اے کوہ ماں زِر ءَ انچوش گندگ ءَ کیت کہ تو گش ئے زاناں یک دراجیں بتّیلے (بوجیگ ءُ یدّار)   باز، گُش انت کہ اِیشی ءِ چپ ءُ چاگرد ءَ اِیشی ءِ چیری بو ھُشکیں تیل انت کہ باز وھداں زمین چنڈ ءَ گوں تیل ءُ گاز (گیس) چُش آسے ءِ پیم ءَ روک بوتگ ءُ درآتکگ.

پمیشکا باز اِشی ءَ ماں ھمے نام ءَ باتیل گُش انت دگہ یک ٹکّے گش ایت کہ اِشی ءِ نز ءَ کبرستان ءِ کر ءَ اوشت ئے ءُ کوکار ءُ واھی کن ئے گڑا تئی وتی توار برگرد اِیت بزانکہ تئی توار باتِل بیت ءُ پر تو کیت بلے اے ھبر ءِ تہ ءَ اِینکس جان نیست بزانکہ ھنچائیں ھبرے۔بلے مارا اِشی ءِ نام بتّیل ءِ شر تر گمان بیت بتیل ءِ بزانت " ۔  بوجیگ ءِ یک کسمے "
المباتیر ءِ بِابت ءَ استاد مجید گوادری وتی ھیالاں چش درشان کنت ءُ گش ایت. 

*او اَلمبا تیر  باتیل*
*گوادر ءِ شان ءِ نشان*
*بندن ءَ چہ گوستگ اَنت تئی*
*دَھر ءُ وھد ءِ کاروان*
*یات بنت کِسّہ دَور ءُ*
*ھرچ نوبتانی داستان*
*تو وتی کرتگ بلوچی*
*شَکّل ءُ شھدیں زبان*
*تئی ایمنی ءُ سارتیں ساھگ*
*راج دپتر ءَ بوتگ بیان* 
*اپسوز تو بھا بوت ئے پہ گازے*
*تئی آوار جت اِش پیشیگی شان* 

استاد مجید گوادری ءِ پُرسوزیں ھیالانی شانزدھمی کتاب نام ھم المبا تیر انت ۔

پولکار : اَبداللہ میر