ماھیگری گوں کُلّاب ءَ ھژدری ئیں کارے ءُ یک گُنجائشے پہ کار ءِ پیدائش ءَ ءُ کار ءُ بار ءِ گیشی ءَ ماں سیستان ءُ بلوچستان ءِ زِرباری تیاب ءَ ۔ بازار پسندی ، سوتّاری ، دل لوٹیں شکار ءِ گچین کنگ ءُ آئی ءِ شرّی ءَ گیش کنگ یکّے چہ ھژدری ئیں مول ءُ مراداں پہ شکار ءِ موکل دیگ ءَ گوں اے داب ءُ دروشم ءَ شمار بیت۔

میارجلّ ءِ بُنجاھی رسانکدر ءِ گُشگانی رِد ءَ : ماھیگری گوں کلّاب ءَ چہ ایران ءِ شیلات ءِ سازمان ءِ سیاست ءُ رھبندان اِنت ءُ پہ آئی سکین دنت ءُ اے رھبند ءِ تھ ءَ ماھیگ ءِ شکار گچینی وڑ ءَ بیت ، رند چہ ھون گِرَگ ءُ سارت کنگ ءَ گوں لانچاں وتی شرتریں رنگ ءَ تیاب ءَ آرگ بنت۔

ایرنا ءِ ھالکاری ءِ گُشگانی پد ءَ : اے کار ماھیگ ءِ شرّ وَرَگ ءِ بن ھشت ءَ ماں بازیں مُلکے ایر کنت ھنچُش ایران ءُ سیستان ءُ بلوچستان ءَ ھم  ، اے ماھیگ گوں شرّیں نھادے ءَ زورگ ءُ بھا کنگ بیت۔

چہ ایران ءِ سازمان شیلات ءَ  ءُ کارجاھانی برجم دارگ ءَ پہ ماھیگ ءِ شکار ءِ دربرگ ءَ چہ بیسہ والائیں مردمانی سوھوگری ءُ ادارہ شیلات ءِ کارزانتانی نیمگ ءَ پہ اے کار ءَ ٹوھیں کدمے چست کنگ بوتگ۔

چہ اے کار ءِ زانتکارانی سوھوگری ءَ ماں ھما ملکاں کہ ماھیگری گوں کُلّاب ءِ تکنولوژی ءِ واھند اَنت ھنچُش کہ ژاپن ، اندونزی ، کرہ جنوبی ، بھر زورگ چہ اے ادارہ ءِ مول ءُ مرادان اِنت ءُ داں انیگ ءَ مزنیں بنیادی کدمے پہ اے کار ءِ دیم ءَ برگ ءَ ماں سیستان ءُ بلوچستان ءَ چست کنگ بوتگ۔

شیلات ءُ ماھیگری ءِ گلّ ءِ کانودانی رد ءَ ماھیگری گوں کلّاب ءِ موکل پہ لوٹوکیں لانچ ءُ بوجیگاں دَیَگ بیت داں ملکی مردم بہ توان اَنت پہ اے کار ءِ تالان کنگ ءُ دیم ءَ برگ ءَ دریا ءَ رو ءُ آ بہ کن اَنت۔

امیت اِنت کہ گوں اے لانچ ءُ بوجیگان ءُ دیم ءَ شتگیں شکار ءِ بود  ءُ بودشت ءُ شکار ءِ کمیّ ءُ شرّی ءِ گندوک ماں ھند ءِ ساوڑ ءَ بہ بئیں۔

70لانچ گوں ماھیگری پہ کلّاب ءِ رھبندان ماں استان ءِ تیاباں کار ءَ اَنت

سیستان ءُ بلوچستان ءِ شیلات ءِ بندری ءُ ماھیگری ءِ جھگیر ءَ گوں ایرنا ءِ ھالکار ءَ گُشت : ھنونی ئیں وھد ءَ 70 لانچ گوں ماھیگری پہ کلّاب ءِ داب ءُ دروشم ءَ کار ءَ اَنت ءُ ھرچ لانچ ءَ 20 نپر پہ راستی گوں اے کار ءَ ملمہ ءَ اَنت ءُ سال ءَ 160 تن شکار کن اَنت۔

اتؔا اللہ رئیسی ءَ اے ھم گُشت : ھنوں ماھیگری گوں کلّاب گوں شکاری لانچاں ماں استان ءَ مزنیں گیشی یے آتکگ ءُ ھرروچ نزیک 50 داں 100تن ماھیگ ماں شکاری بندراں آرگ ءُ بازار ءَ راہ دیگ بیت۔

 آئی ءَ ھم گشت کہ شکار گوں کلّاب ءِ گپتگیں ماھیگ شرتر اَنت ءُ بازار ءَ شرتر بھا بنت
ھمے واستا گُشت ئِے : ایران ءِ سازمان شیلات ءَ پہ ماھیگری ءِ اے دروشم ءَ مزنیں جھدے کرتگ ءُ مزنیں مید ءُ ماھیگیرے چہ تور ءُ ماھور ءِ مشکل ءُ سکّیاں آجو بوتگ۔

سیستان ءُ بلوچستان ءِ شیلات ءِ مزنیں ادارہ ءِ جھگیر ءَ گُشت :  چہ دریا ءِ زرپیت ءَ بھر زورگ ءُ کار مرز کنگ پہ ھزاراں نپر ءَ کار اڈّ کُرت کن ئے ءُ توان ئے اے ھند ءُ دمگ ءَ دیم ءَ بہ برئے ءُ آباد بہ کن ئے۔

رئیسی ءَ گشت : دراجیں کلّاب ءِ راہ ءُ رھبند یکّے چہ شرتریں راہ ءُ رھبندان اِنت کہ سازمان شیلات ءِ مزنیں ادراہ ءَ آئی ءَ امیت وار اِنت ، ھمے زرورت ءَ گوں کارجاھانی یکدستی ءَ  یک دربرگی دورھے گوں جھاد کشاوزی ءُ سازمان شیلات ءِ ھوری ءَ برجم دارگ بوتگ۔

اے جھگیر ءَ دیمتر ءَ گُشت : ماھیگری گوں کلّاب ءَ  ءُ گیشتر ماھیگری گوں دارجیں کلّاب ءَ چہ گچینی ماھیگری ءِ دروشم ءَ شمار بیت کہ میان استمانی سازماناں سوگہ کرتگ ء ، ھنچُش کہ کار ءُ بار ءِ استمانی سازمان ءُ اکیانوس ھند ءِ تُنی ماھیگانی کمیسیون ، کہ بید ء گچینی ماھیگری ءَ  ماھیگری ءِ اے دگہ داب ءُ دروشم گار بہ بنت۔

رئیسی ءَ اے ھم گُشت : گڈّی آمارانی متابک ءَ یکھزار ءُ 264پایبر گلاسیں کایک ، 162 داری کایک ، 436 کتری لانچ ءُ 524 سردھانھی لانچ گوں 21 ھزار ءُ 781 نپر مدامی ءُ موسمی شکاری ءَ 34 سیادی تاونی ءِ توک ءَ ماں ادارہ شیلات ءِ ھوزہ ءَ کار ءَ اَنت ۔

آئی ءَ گشت : امیت اِنت کہ ماھیگری  ءِ اے داب روچ پہ روچ گیش بہ بیت ءُ مکران ءِ تیاب ءِ دیمروی ءُ شرّیں ماھیگانی گندوک بہ بئیں۔

200 داں 500 ملیونی مدت ءُ وام ھما لانچ ءُ کایکاں کہ اے دروشم ءَ ماھیگری کن اَنت دے ایں

ادارہ شیلات ءِ جھگیر ءَ دیمتر ءَ گُشت : ھما کایکانی واھند ءَ کہ وتی ماھیگری ءِ رنگ ءَ پہ ماھیگری گوں کلّاب ءَ بدل بہ کن اَنت 200 ملیون ءُ لانچ داراں اوں 500 ملیون تُمن وام دیگ بیت۔

آئی ءَ گُشت :  مزنیں گند ءُ نندے گوں ملک ءِ مستر ءُ کارمستراں کہ یکّے بنیاد برکت اِنت پہ میدانی مشکل ءُ نگیگیان ءُ شکاری تاونیاں برجم دارگ بوتگ کہ بنیاد برکت اے کار ءَ پیش کدم بوتگ ءُ اے کار ءِ منّت گرگ لوٹ ایت۔
آ بنیاد برکت ءِ گیشیں ھمپّتی ءِ لوٹوک بوت داں تاونیاں توانمند بہ کنت ۔

آئی ءَ گُشت : اے بنیاد ءَ تسھیلات دیگ ءَ پہ تولید ءُ کار ءُ بار ءَ ماں مکران ءِ تیاب ءَ وتی جار جتگ۔
اے جھگیر ءَ گشت : ھما مردمانی دیم ءَ آرگ ءِ کار کہ تسھیلات ءِ ھکدار اَنت چہ سیستان ءُ بلوچستان ءِ تپاکیں تاونیانی نیمگ ءَ گوں ادارہ شیلات ءِ کارمستری ءَ بیت۔

آئی ءَ سرجمیں کارگس ءُ مالداراں ماں ھاسیں بھر ءَ ءُ اے دگہ مردم ءُ شرکتاں کہ زورگ ءِ واھگ اِش ھست لوٹ اِت پہ مڈّی ءِ گیش کنگ ءَ وت ءَ ماں ادارہ شیلات ءِ جھگیری ءِ کارگس ءَ وت ءَ سر بہ کن اَنت۔

سیستان ءُ بلوچستان ءِ شیلات ءِ مزنیں کارمستر ءَ گشت : ماھیگری گوں کلّاب ءِ دربرگی دورہ گوں ادارہ شیلات ءِ سیاستانی ھیالداری ءَ ءُ ایران ءِ شیلات ءِ سازمان ءَ پہ نوکیں داب ءُ دروشمانی کارمرز کنگ ءَ پہ ماھیگری ءَ مزنیں سیتّ ءُ پایدگے دار اِیت ءُ ھنچُش سُنتی ءُ کوھنیں دروشمانی ایباں پدّر کنت۔

مھمد شھلی بر ءَ گُشت : ماھیگری ءِ اے داب ءِ مول ءُ مراد ایش اِنت کہ ماھیگ شرّ ءُ تازَگ بہ مان اَنت ۔
آپی جاندارانی دارگ ءُ اے دگہ رنگیں ماھیگری ءِ کم کنگ ھم چہ اے مول ءُ مرادان اِنت۔

آئی ءَ گُشت : پہ کرونا ءِ ویروس ءِ واستا کہ درستاں مہ گیرت اے دربرگی دورہ ءَ گوں بھداشتی پروتکل ءُ چاگردی گستائی ءُ دپوکہ کارمرز کنگ ءَ بس پہ ھما ھند ءُ دمگ ءِ مید ءُ ماھیگراں برجم دارگ بوت کہ ھژدری ئیں سھمے ماں ماھیگرانی ھُژار کنگ ءَ ھست اَت ئِے ۔

آئی ءَ گُشت : یک ھاسیں دربرگی دورھے ءِ برجم دارگ گوں ماھیگری پہ کلاب ءِ رنگ ءُ دروشم ءَ گوں ارزیابی ءِ بھر ءِ کارمستر ءَ ماں چھبار ءِ پٹّ ءُ پولی بنجاہ ءَ کہ اے دورہ ءِ استاد اَت ھالد نیازی ماھیگری گوں کلاب ءِ شنگ ءُ تالان کنوکے ءَ گوں بندر ءُ ماھیگری ءِ جھگیری ءِ کارزانتی ءُ ھمراھی ءَ گوں لانچ ءُ کایکانی واھنداں اے کار باز سیتمند بوت ءُ اے کار ءِ دیمروی ءَ باز کمک کنت۔

آئی ءَ گُشت : یک دورھے چہ اے کلاساں پہ ھما لانچانی واھنداں کہ موکل ءُ مجوز اِش پہ کلاب ءِ ماھیگری ءَ چہ شیلات ءِ مزنیں ادارہ ءَ گپتگ گوں کاری ءُ دیم پہ دیمی دروشم ءَ برجم دارگ بیت۔

سیستان ءُ بلوچستان ءِ شیلات ءِ مزنیں کارمستر ءَ گُشت : یکّے چہ مئے مول ءُ مراداں چہ اے دورھانی برجم دارگ ءَ سوھوگرانی گُشگ ءُ میدانی کار ءِ نگیگی ماھیگری ءِ وھد ءَ ءُ پہ آیاں توجیلے درگیجگ ءُ دیدانکانی دیم ءَ آرگ ءُ سکّی ءُ نگیگیانی دور کنگ اِنت۔

شھلی بر ءَ گُشت : یکّے چہ اے رنگ ءِ ماھیگری ءِ مزنیں سکّی ءُ مشکلاں ایش اِنت کہ پہ آیانی شکاراں شرّیں بازارے در نہ کپ ایت ءُ آ نھادے کہ  وتی شکاراں بھا کن اَنت برابر ءُ ھکّیں نھادے نہ اِنت بلکیں سکّ کم اِنت ءُ ھنچیں ھنچیں لھتے سکّی آیانی راہ ءِ دیم ءَ ھست کہ نہ توان اَنت وتی ماھیگاں پہ آسانی ڈنّی ملکاں راہ بہ دے اَنت۔
کہ نزّیکیں بانداتے ءَ گوں سرجمیں دزگاھانی ھمپتّی ءَ اے مشکل دور کنگ بیت۔

آئی ءَ گُشت :  ماھیگری ءِ 11بندر ءُ ھالی کنگ ءِ جاہ چُش کہ ، تیس ، کنرک ، رمین ، زرّآباد ، پزم ، ھپت تیر ء چھبار ، بریس ، گواتر ، جُد ، تنگ ءُ پسابندر  ءُ 6 شھرک ءُ سُنتی ناھیہ گوں گیش چہ 100 جوڑ کنگی شیلاتی سنایہ ءَ سیستان ءُ بلوچستان ءَ کار ءَ اَنت۔

آئی ءَ گُشت : سیستان ءُ بلوچستان ءِ مید ءُ ماھیگر سال ءِ تھ ءَ 31 درسد چہ ملک ءِ شکار ،  39درسد آپی شکار ءُ 20درسد آپیانی سرجمیں اڈّ کنگ ماں ملک ءَ کن اَنت کہ اے کاراں چھبار ءُ کنرک ءُ دشتیاری ماھیگری ءِ دومی رد ءَ ماں ھند ءِ ساوڑ ءَ رند چہ اندونزی ءَ  ءُ اولی رد ءَ ماں اکیانوس ھند ءِ مگربی نیمگ ءَ اوشتارینتگ۔

آئی ءَ اے ھم گُشت : چھبار ، کنرک ءُ دشتیاری ءِ مید ءُ ماھیگر ھم گوں 42درسد چہ ماھیگری ءَ ماں زرباری استانانی تھ ءَ سھمدار اَنت ءُ 40درسد ماں ایران ءِ ماھیگری ءَ سھم اِش ھست۔
گیش چہ 60 داں 70 درسد ماں سنتی ماھیگانی پیلّو کنگ ءَ دست اِش مان اِنت ءُ ملک ءِ کاردرگیجگ ءُ اکتساد ءَ مزنیں کارے کنگ ءَ اَنت 

رجانک : آبد رھشون