بھداشت ءُ آموزش پزشکی وزیر ءَ گوشت : ماں سیستان ءُ بلوچستان ءَ کروناءِ سکترین ءُ گرانتریں وھد ءَ وزارت بھداشت ءِ نگاہ ءُ ھیال ھاس ءُ دلجمی اِنت ۔

میارجل ھالرسانی بنجاہ ءِ ھال ءِ پد ءَ سئید نمکی ءَ گوشت : چہ مروچیگ ءَ کرونا ءِ نادراھانی درستیں ھرچ درچ ماں سیستان بلوچستان ءِ درستیں نادراھجاھاں دولت ءِ سرءَ اَنت بزاں پہ اے نادراھی ءَ چہ مرماں ھچ زر ءُ مالے گرگ نہ بیت ۔

آئی ءَ منتواری کنان ءَ کہ کروناءِ نادراھی ءِ باندات ءَ بازیں کارے بوتگ گوشت ئِے : شھید سلیمانی ءِ کارشونی بنگپ ءِ دیمروی پہ نادراھی ءِ درگیجگ ءَ ءُ پہ وت سمبالی ءَ ءُ درمان ماں اے وھد ءَ پہ شری دیم ءَ شتگ ءُ ما امیتواریں کہ گوں درستانی ھمکاری ءُ ھمکوپگی ءَ اے نادراھی ولگوج ءُ مھار کنگ بہ بیت ما پہ نادراھانی درگیجگ ءَ ءُ پہ کرونا ءِ جیڑگی سامانانی دیگ ءَ یک دمانے ھم اے استان ءَ  ایوک نہ کن اِیں ءُ مردم دلجم بہ بنت کہ ما گوں وتی درستیں زور ءُ توان ءَ سیستان بلوچستان ءَ کمک کن اِیں ۔

بھداشت ءُ آموزش پزشکی وزیر ءَ گوشت : مردم ءُ نیکراھی پیشوک ءُ اے دگہ گَل ءُ مُچی ماں کرونایی روچانی تہ ءَ یکجاہ ءُ ھور بیتگ اَنت ءُ ما دنیا ءَ پیش داشتگ کہ گوں اے تھریم ءُ بازیں کمی ءُ نگیگیاں پہ شری کار کتگ بزاں ما چہ بازیں کشوراں ءُ وتی رودرآتکی ھمساھگاں ساپ تریں ھساب ءُ آمارے ماں بین المللی ءُ ھاورمیانہ تہ ءَ مارا بوتگ ءُ ھالکارانی واھند بزان اَنت کہ جمھوری اسلامی ءِ ھساب ءُ آمار  ساپ تریں ءُ دلجم تریں آمار بوتگ اَنت.

آئی ءَ گوشت : 86 داں 84  درسد کرونایی بیرانی ھما مردمانی بوتگ اَنت کہ اُمبر ءَ چہ 65 سال ءَ برزتر بوتگ اَنت ءُ یاکہ چہ پیسرءَ دگہ نادراھی اِش بوتگ پہ ھمے ھاترءَ مئی آمار باز گیش گندگ بیت انگت مئی بُنکی کارانی دیمروی گوں استان ءِ پدمنتگی ءَ ھمدپ نہ بوتگ اَنت بزاں پہ مردمانی آسودگی ءَ باید اِنت کہ انگت بازیں کارے کنگ بہ بیت داں کہ پہ اے ھند ءُ دمگ ءِ مردمانی شان ءَ بہ رس اِیت ءُ اے پدمنتگی ءَ پہ دیمروی ءَ بدل بہ کن اِیں ۔

آئی ءَ پہ دلجمی گوشت : مالی کمک پہ بُنکی کارانی دیمروی ءَ ءُ پہ نادراھجانی سامانانی گیش کنگ ءَ ءُ ھنچو پہ کارندھانی گیش کنگ ءَ ماں نادراھجاھاں ءُ پہ استان ءِ زرباری مردمانی ھاترءَ چہ مروچیگ ءَ پہ دلجمی رندگیری ءُ دیگ بوتگ اَنت گوں نوکیں نادراہ بروکیں گاڑیانی (آمبولانس) آیگ ءَ چہ کشورءَ اے کول ءُ کرار ءَ کن اِیں کہ سیستان ءُ بلوچستان اولی استان بیت کہ ھاسیں ونڈے دیگ بوتگ.

 نمکی ءَ پہ استاندارءِ لوٹ ءِ پدءَ کہ درستیں ھالکاراں دیمگیری سوچن (واکسن ) جنگ بہ بیت منان ءَ گوشت : گوں استاندار ءُ وزارت بھداشت ءِ ھمترانی ءَ سیستان ءُ بلوچستان ءِ درستیں ھالکار ھمے زوتاں دیمگیری سوچن جنگ بنت ءُ دوماہ ءِ گیشیں گیش کاری پکار پہ ایرانشھر ءِ الوم پزشکی شھدربرجاہ ءِ کارندھاں دیگ بیت ۔

بھداشت ءِ وزیر ءَ گوشت : ایرانشھر ءِ 540  تھتی نادراھجاہ ءِ کارانی ھمے زوتیں دیم ءَ بَرگ ءُ ھنچو پہ چھبار ءِ نادراھجاہ ءِ بُنکی کارانی دیم ءَ بَرَگ ءَ گوں بندن آزات ءَ ھمترانی بوتگ ءُ پہ استان ءِ زرباری درمان بسترانی کارانی سرجم کنگ مئی مستریں کار ءُ مراد اِنت اے کار ھم ھمے زوتاں بیگی اَنت مئی وش بھتی اِنت کہ گوں چار بیچاراں ھمے زانگ بیت کہ درمان ءُ اے دگہ آزمایشگاھی کِیت ءُ سامان ھست ءُ سرجم اَنت ءُ نادراھانی چارءُ گند چہ پیسر ءَ ھنوں باز شرتراِنت.

 ماں اے دیوان ءَ شھریاری کمیسیون بھداشت ءُ درمان مجلس ءَ گوشت ئِے : چو کہ ما چارگند کتگ ایرانشھر ءِ الوم پزشکی شھدربرجاہ ءُ گیشتر ھاتم الانبیاءِ نادراھجاہ کہ ما شتگ ءُ چاربیچار کتگ اَنت کارمستری باز شر گندگ بوتگ ءُ کروناءِ نادراھاں پہ شری دلگوش کنگ ءَ اَنت اے باروءَ اِشانی منتواری کنگ لوٹ اِیت.

 آئی ءَ گوشت : ماں ایرانشھر ءِ الوم پزشکی شھدربرجاہ ءِ کارندھاں ماں اے وھد ءُ پاس ءَ کہ کروناءِ نادراھی ءُ اے نادراھی ءِ دیمروی پہ شریں ءُ دلجمیں کار کنگ لوٹ اِیت اے باندات ءَ ما باید اِنت کہ گیشتر گوں آیاں دلگوش گور بکن اِیں بایداِنت کہ بُنکی کاراں ءُ کمیاں گوں وزارت بھداشت ءِ مھربانی ءَ ماں استان ءِ زرباری ھند ءُ دمگاں اے جنجال آسان کنگ بہ بنت داں کہ ما پہ مردماں شریں ھزمتے کت بکن اِیں بزاں ھما کارے کہ لائک پہ اے مردمان اِنت ما پہ دلجمی کت بکن اِیں.

 

 

رجانک : ملا چمل