میارجل ءِ بُنجاھی رسانکدری ھالکاری ءِ ھال ؛ اِزمکار بیگ ءَ وھدے سرپد بئت کہ کرونا ءِ دم ءُ درگت ءَ لاچار بئت کہ وتی گیشتریں وھد ءَ گوں بیکاری ءَ بہ گْوازین اِت
ءُ بلوچ ازمکار ھم چو دگہ ازمکاراں چہ اِے رھبند ءَ دور ءُ گِستا نہ اَنت ءُ دگہ مشکل ءُ نگیگی کہ ھست زالبول بیگ  ماں ازمکاری ءَ بدتر  دست ءُ پاداں بند اِیت ۔

ماسومہ میرکازھی چہ ھما ٹول ءِ اِزمکاران اِنت کہ گوں بازیں سکّیاں دیمپان بوتگ ءُ ڈنگر ءُ دارانے کہ یک زالبولے ءِ راھسر ءَ ماں ازمی ءُ ربیدگی کار ءُ کِرداں پیش کاینت ،  دیر ئِے کتگ انت ءُ ماں ازم ءُ باسکوپ ءِ میدان ءَ سوبین بوتگ ءُ ھمے سوبینی ئِے سوب  بوتگ کہ ما گوں اِے وش تب ءُ وش روئیں بانک ءَ گوں گپ ءُ تران بہ کن ایں کہ دیمتر ءَ اِے گپ ءُ رپّاں شما وان اِت

بِندات ءَ چہ وت ءَ ءُ چہ وتی اِزمی ءُ دود ءُ ربیدگی کار ءُ کِرد ءُ آیانی وَھد ءُ مُدّت ءَ مارا بہ گوش اِت

من بانک ماسومہ میرکازھی آں کہ چہ سال ءِ ھشتاد ءُ نھ ءَ ماں "موسسہ آھنگ بلوچ" بزاں زیمر بلوچ ءِ گَلّ ءَ وتی کار بنگیج کرتگ ءُ پیش چہ ایشی ءَ گوں (نشریہ تئاتر دانشگاھی استان دانشگاہ سیستان و بلوچستان ) شھدربرجاہ سیستان ءُ بلوچستان ءِ شھدربرجاھی ازمی تاکبند ءَ گوں ھم ھمراھی ءُ ھمکاری کتگ ۔
من گیشتر اِزمی کار ماں مُلکی (تئاتر) ءِ رھبند ءَ ءُ مُلکی نام کپتگین ءُ مھشوریں جھدکارانی زند ءُ جاور ھال ماں بلوچستان ءِ دود ءُ ربیدگ ءُ رھبند ءِ توک ءَ بوتگ ءُ ھست اَنت ۔

*شمارا دولتی مسئول ءُ زِمّہ واراں اے دود ءُ ربیدگی کارانی بارو ءَ  کمک ءُ مدت کُتگ؟ ءُ چہ آیانی کمک ءُ مدت ءَ رازیگ اِت؟*

چہ یک بانکے ءِ جاہ ءَ اے گِلہ من ءَ ھست اِنت ءُ اِے گالبند مئے چاگرد ءَ ھم نام کپتگ کہ "چہ جنین ءَ مُچّی ءُ ھوری ءَ تچگ زمہ وارانی میانجی ءَ ھست  اِنت "! ءُ بژنی گپّ اِیش اِنت کہ یک واجہ ءُ بانکے ءِ کرد ءُ کارپد ءُ راہ ءُ راھبند یکّ ءُ جھدانی اُرجین ھم تَنگ بہ بنت بلے زمہ وار ءُ مسئول چہ واجکاراں گیشتر کار گِر اَنت کہ جھدکاریں بانکانی میانجی ءَ اِے بروسہ پہ زمہ واراں پرشتگ ءُ نیست اِنت کہ بانکاں اِزمی ءُ ھنری کار بہ گر اَنت ءُ اِے چیز باز مئے چاگرد ءَ گندگ پیداگ اِنت ۔
من  بانُکے آں اِے لوٹ ءُ واھگوں ھست کہ یک انچیں روچے ماں اسلامی ئیں ایران سرزمین ءَ بئیت ءُ بہ رس اِیت کہ دوئیں چمّاں سریمگ بہ کن اَنت نئیکہ یکے ءَ واد ءُ دگرے ءَ سریمگ!

*شمئے لیکہ ءُ دیدانگ ربیدگی کارانی بارو ءَ ماں کرونا ءِ بندگیں دم ءُ درگتاں چے اِنت ؟*

چہ یکے ءِ دیدانک ءُ لیکہ ءَ کہ ازم ءِ پڑ ءُ میدان ءَ گام جنگ اِنت کرونا ءِ ویروس ءِ درگت ءَ گوں پھکیں بدیاں  کہ ھست اَنت ئِے ; مردمانی رھوت ءُ رو ءُ آ یانی توک ءَ کار ءُ زندگی ءِ توک ءَ ءُ باپاری ءُ زرکاری ءِ توک ءَ ھست اِنت ئِے بلے لھتیں شری ھم گندگ ءَ کاینت کہ ھمے گِس ءِ کُنڈ نندی ءَ ازمی جیڑگ ءَ پرما اِیت ، یکے چہ ھمے کاراں کہ من دیست دولت ءِ  کارمندے  اَت کہ بندیگی ءِ وھد ءَ  چہ ریچگی ءُ دوریگی لِپتگیں آسناں  جوانیں سَندلی ءُ چارپادگ ئِے جوڑ کتگ اِتگ اَنت کہ  سرجمیں مھلوک ھمے کار ءِ گندگ ءَ ھَبکّہ ءُ اَجکّہ بوت اَنت 
ھمے ھاتر ءَ مردم گوشت کنت ماں رسانکدر ءَ مُچّانکی دروشم ءَ اِزمی ءُ ربیدگی کار ءُ جُھداں (آنلائن)  دیم ءَ بہ بر اِیں 
من ءُ منی وڑیں مردم کہ روچ ءِ نِیم بھر ءَ ماں رسانکدر ءَ گوازینگ اِنت گڑا ھمے کاراں یک نوکیں دروشمے ءَ دیم ءَ بہ بر اِیں چشکہ : باسکوپ ءُ (تئاتر آنلائن) ءُدگہ وانگ ءُ وانینگی جُھد ءُ ھمیشانی ھمدرور ماں ھمے (آنلائن)رھبند ءُ دروشم ءَ ماں رسانکدر ءَ دیم ءَ بیار اِیں ۔