آشا ناروئی گوش اِیت ; اگاں بلوچ مردین دیمروی ءِ پڑ ءَ پچ ءُ شاھگان تر بکن اَنت دلجم ءَ ما زالبول پہ وتی شھر ءِ آبادانی ءَ سوبمندیں سربراہ بیت کن اِیں پرچا کہ زالبول مئی چاگرد ءِ دلجمیں باسک اَنت.

میارجل بنجاہ ءِ ھالرسانی ھال ءِ ردءَ : آشہ ناروئی پھرہ ءِ زالبولانی دینی وانگجاہ ءِ سربراہ اِنت ھمے داب ءَ آئی ءِ زھگ زیمل کارے ءُ ھر انسان ءَ پہ وتی باندات ءِ گچین کنگ ءِ ھات رءَ مھکمیں اوستے ءِ واھنداِنت.

آ چو گوش اِیت کہ : ماں اے سالانی تہ ءَ چہ اھل سنت ءِ گچین کنگ ءَ پہ مُھمیں کارانی دیم ءَ برگ ءَ اولی رنداِنت کہ ما گندگ ءَ اِیں اھل سُنت ءُ بلوچ زالبول پہ کارانی دیم ءَ برگ ءَ چہ مردیناں دیم ءَ تر بیتگ اَنت چہ ھمے کاراں ماں بازیں جاگاھاں باز نگیگیں جاور پیداگ بوتگ اَنت بلے اگاں اے باواست چار بیچار کنگ بہ بیت گڑا گندگ بیت کہ پہ وانندہ ءُ زانتکاریں زالبولاں یک شریں چاگردے جوڑ بوتگ.

آ دیمترءَ گوش اِیت : زالبولانی جاگاہ ءُ آیانی ھک انسانی نگاہ ءِ باندات ءَ سک برزاِنت پرچا کہ زالبول چاگرد ءِ دلجمیں باسک اِنت ماں اے ھاکی سرڈگار ءِ ھر جاھے ءَ ءُ ماں ھر چاگردے ءَ وتی زانتکاری ءُ پرھیزکاری ءَ ھمگرنچ کت کنت بزاں شریں بھت ءُ نسیبے ءِ واھند بیت کنت مروچی بلے ما گندگ ءَ اِیں کہ زالبول ماں وتی دینی زندمان ءُ چاگرد ءَ ڈالچار کنگ بوتگ بزاں ماں لوگان ءُ ماں چاگردءَ پہ شری زانگ ءُ پجاہ آرگ نہ بوتگ ھمے پیم ءَ راجی سیاست ھوراِنت گوں دودمانی سیاست ءَ کہ بازیں مول ءُ مرادانی ءُ شریانی بھر بانگ کنگ ماں چاگرد ءِ تہ ءَ پہ ھمے باندات ءَ گڑا بلوچ زالبول بایداِنت کہ ماں چاگرد ءِ تہ ءَ وتی نیکراھی کاراں دیم ءَ بران بکن اَنت.

 ناروئی گوش اِیت: اسلام ءَ پہ ما زالبولاں شرین ءُ مُھمیں جاگاھے داتگ اولی جاگاہ جنک بیگ اِنت بزاں ماں ھر لوگے ءَ جنین چُکے کہ پیداگ بیت پہ آ پت ءُ مات ءَ ھاوند ءِ مھربانی ءُ رھمت کاینت دومی جاگاہ لوگبانک بیگ اِنت اے دین ءِ سرجم کنوک اِنت بزاں مردینانی دین سرجم نہ بیت داں کہ یک جنینے پہ وتی لوگبانکی ءَ وتی لوگ ءَ میاراِیت سیمی جاگاہ مات بیگ اِنت بزاں بھشت مات ءِ پادانی چیر ءَ اِنت گڑا زانگ بیت کہ چاگردءَ بے پاکیں ءُ نیکیں زالبول ءَ نہ بیت ما بایدانت کہ شریں مات بہ بئیں داں کہ شریں چک ءُ زھگ پہ وتی چاگرد ءَ بہ رودین اِیں ھمے داب ءَ ھر کھول ءِ بایداِنت کہ پہ وتی جنین چُکانی وانینگ ءَ دلگوش گور بکنت۔