میارجل ھالرسانی بُنجاہ ءِ گزارش ءِ رِد ءَ؛ واھد بکش ایزدپناہ یکّے چہ بلوچستان ءِ دَروری رُدومکاران اِنت کہ چہ 2 دھک ءَ گیش اِنت کہ راہ ءُ ماڑی ءِ جوڑ کنگ ءِ کار ءُ بار ءَ دلگوش اِنت. آ گوں میار جل ءَ بوتگیں وتی گپّ ءُ تران ءِ تہ ءَ گُش اِیت : کاروں گوں دو کمپرسی ءَ بنگیج کرتگ ءُ ھمے راہ ءَ دیم ءَ روان بوتگاں بگندئے کار ءِ بندات ءَ گوں اَڑ ءُ جنجالاں دیم پہ دیم بوتگاں بلے وتی کاروں ویل نہ داتگ گوں سرجمیں ھاٹیگ ءُ توان ءَ دیم ءَ روان کتگ. 

ایزد پناہ ءَ دیمتر ءَ دَرّائینت : من ءَ آ رنگیں مالی پُشتے نہ بوتگ بلے من ءَ گوں وتی کار ءَ مھر بوتگ، پیمے نہ پیمے ءَ مردم گُشت کنت کہ ماں دمگ ءِ بُنُکّی کارانی شاھگانی ءَ وتی بھرزیری ءُ دست ھواری دیم ءَ بران کتگ دانکہ ھمیش اِنت راہ ءُ ماڑی ساچی ءِ شرکت ءِ بن ھشت ایر کنگ ءِ سسّا من ءَ آتکگ. 

اِے رُدومکاریں بلوچ ءَ درشان کُرت : باز مردم ءَ  آ وھد ءَ کہ من اِے شرکت ءِ نام دَرپ کتگ، پہ چوشیں کاراں واھگ اِش نہ بوتگ پرچاکہ سرمایہ گزاری روزگاربریں کارے بوتگ بگندئے دْراجیں مدتے گْوستگ داں کارے کہ کتگ آئی ءِ لوٹاں بہ رس اِت ءُ اِے کار پہ بازیں ھَندی سرمایہ گزاراں وشنود کنوک نہ بوتگ. 

واھدبکش ایزد پناہ ءَ دیمتر ءَ گُشت : جُھدیں کتگ کہ ماں اِے سالاں ھم مردمانی وشنودی ءَ دست ءَ بْیاریں ءُ ھم کارپَرما ءِ؛ سنگان ءِ پُھل ماں باھو کلات ءِ کَور ءِ پیشانی ءَ یکّے چہ وش تریں سرکَپتانے بوتگ کہ تاں اِے وھد ءَ کاروں کتگ، پرچا کہ گْواچنی مردمانی روگ ءُ آیگ ماں کَور ءِ آ دست ءَ گوں کسانیں ھَور ءُ ھارے ءِ آیگ ءُ مانشانگ ءَ، سک باز گْران ءُ مشکل بوتگ، ءُ ما گوں گْران تریں جاوران ءُ گوں زَرنکان ءِ کمّی ءَ اَبید  کار ویلیں نہ کتگ ءُ ھُدا ءِ شُگر ءُ منّت پہ جْوانی آسر ءَ رسینتگ؛ اَنّوں ھمے پُھل ھر روچ سَدانی شُمار ءَ کامیونی بار ءِ راہ اِنت دیم پہ ریمدان ءِ مْیان راجی سیمسر ءَ. اَلبت چیزے پہ گُشگ ءَ مہ مان اِیت کہ لھتیں چہ پھل ءِ جوڑکاری ءُ بندگ ءِ لوٹاں ھم دنیگت ءَ مَنتگ بلے بژن اِنت کہ کارپرما وتی کَول ءُ وادھانی سر ءَ نہ اوشتاتگ. 

آئی ءَ نشوندھی کُت : ماں بلوچستان ءَ ھستیں دَرپینک ءُ توانائی، رُدومکاریں بلوچ ورنایانی وازمند اَنت؛ سوج ءُ سرھالے کہ من ءَ گوں ورنایاں ھست اِنت ھمیش اِنت کہ اَلّمی ءَ ماں مھندسی ءُ کارمانی تھراں بہ وان اَنت اَنت ءُ دربہ بر اَنت ءُ بلدکار بہ بنت پرچا کہ اِے ماں ھَند ءُ دَمگ ءَ یک اَلّمی ئیں لوٹ ءُ نیازے.