ابدلھکیم ملازھی بلوچانی نام آور ءُ نام کپتگیں لچہ کارے کہ لاشار ءِ آبریچ ءَ کوپچ ءَ جاھمنند اِنت ءُ سالانی سال اِنت کہ گوں پٹ ءُ پولکاریاں ماں بلوچستان ءِ لبزانک ءِ پڑ ءَ یکے چہ لیکہ دیوکاں ماں اِے میدان ءَ شمار بیت اِنت ،میارجل ءِ گپ ءُ رپ گوں آئی ءَ پہ شمئے چم ءُ دیدگانی دیم ءَ گوز اِیت ۔

چہ میارجل ءِ ھالرسانی بنجاہ ءِ ھالانی رد ءَ لچہ ءُ لبزانک ئِے ماں وتی برات ءِ مکتب ءَ واجہ ابدلگپور کوپچی ءِ پتر ءَ یات ئِے گپتگ کہ ماں لچہ ءُ لبزانک ءَ ءُ دود ءُ ربیدگ ءُ زبان ءُ لبزانک ءِ پجارگ ءَ مزنین ءُ سیت مندیں گامگیج ئِے چِست کتگ ۔

ابدلھکیم ملازھی کہ پہ ابدلھکیم لاشاری ءَ مشھور اِنت بلوچستان ءِ اِے دور ءِ کلاسیکل ءِ نامی ءُ مستریں لچہ کار اِنت کہ لچہ کاری ءِ ھپت دپتر ءِ واھند اِنت ءُ کرار اِنت کہ زوت ءَ پہ چاپ ءَ گامگیج چست بکنت ۔

اِے نامداریں لچہ کار ءَ اِے لیکہ ھست کہ بلوچی زبان ءُ لبزانک چو جھلیں زر ءُ ساوڑے ءَ اِنت کہ ھر چنت آئی ءَ پجار بکنیں آئی ءِ جھلی ءَ رس اِت نہ کنیں ءُ ھمے جیڑگ سوب بیت کہ اِے پاکیں دود ءُ ربیدگ ءِ پجار ءُ شنگ کنگ بلوچی ءِ درستیں پولکار ءُ زبان ءُ لبزانک ءِ واستو مند اِنت ۔

ابدلھکیم ملازھی ءِ لچھانی اندری گپ : مھر ءُ ھاوند ءِ ساڑا ءُ مچانکی ءُ مھرناکی جیڑگ اَنت کہ پہ بلوچی زبان ءَ نبیسگ بوتگ اَنت ۔ میارجل ءِ  بلوچستان ءِ رو ایرُشت ءِ ھالکاری ءِ ٹول اِے واجہ ءِ ھنکین ءُ بہ نندجاہ ءَ شتگ ءُ گپ ءُ رپے گوں اِے نامداریں لچہ کار ءَ کتگ اِش کہ آئی ءَ پہ شما ندر کنت اِنت۔