اسمائیل بلوچ کہ چراگ اُشتری ءِ نام ءَ، نام کَپتگ ماں پاکستان ءِ بلوچستان ءَ گوں اُشتر ءَ میتگ پہ میتگ ءَ کتاب ءُ کتاب وانی ءِ رواج دیگ ءَ جھد ءُ کوششت کنت،اے واجہ نوبندیان ءِ مردمانی مھمان بوتگ.

میارجل ھالرسانی بُنجاہ ءِ ھالانی ءِ رِد ءَ ؛ چراگ اُشتری کہ گوں اُشتر ءَ پہ چُکّ ءُ زھگاں کتاب بارت ءُ پرے کار ءَ ھم باز وش آتک کنگ بوتگ. گُش اِیت کہ : پہ بلوچستان ءِ راجمان ءِ دیمروی ءَ مردم باید کتاب بْوان اَنت تاں آیانی زانت ءُ سرپدی گیشتر بہ بیت.

آئی ءَ سید ھاشمی ءِ بابت ءَ گُشت : جھد ءُ جپایے  کہ آئی ءَ پہ بلوچی زبان ءِ ھاتر ءَ کشّ اِتگ من ھچ رنگ ءَ آئی ءِ ستا ءَ کُرت نکناں پرچا کہ آئی ءِ بِستار سک بُرز ءُ بلند اِنت.

چراگ اُشتری ءَ چہ مردماں دَزبندی کُت : چہ وتی مردماں ھمے لوٹ ءَ کناں کہ کتاب بْوان اِت ءُ پہ چاگرد ءِ دیمروی ءَ کتاب بْوانیں، منی چہ مردماں بس ھمے یکّیں لوٹ اِنت بس.