میارجل ھالرسانی بُنجاہ ءِ گُزارش ءِ رِد ءَ؛ میر آباد ءِ مردم کہ ماں اے روچ ءَ سرکار وت ءَ آیانی لوگ واھُند کنگ ءِ اُگدہ دار سرپد بیگ ءَ اِنت، گُش اَنت کہ ما چہ واکدارانی اے جزم ءَ کہ اَبید چہ مئے مشورت ءَ بیگ ءَ اِنت، وشنود ءُ رَزامند نئیں ءُ لوٹیں کہ مئے جیڑہ چوش کہ بے برکی ءُ بے آپی ءَ ھلاس بکنت. 

یکے چہ جھ مننداں میارجل ءِ ھالکار ءَ گُش اِیت : ما چھبار ءِ شھر ءِ آتْراپ ءَ نشتگیں مردم ماں میر آباد ءَ گوں بدبھتی ءُ بازیں سکّی ءُ سوری ءَ گوں ھپت یا دَہ مردمی لوگمانے ءَ یا گیشتر ءَ ماں کَٹونگ ءُ کاپرانی تہ ءَ زند گْوازینگ ءَ اِیں ءُ دگہ راہ ءُ چارھے ھم مارا نیست، نَے زمین پہ بھا زُرت کنیں نہ لوگے باڑو کُرت کنیں پرچا کہ مارا کارے ھم نیست.

اِے گزارش ءِ رِد ءَ میرآباد ءِ دمگ ءِ زبھریں ءُ آتْراپ نشینیں مردم، گوں بھداشتی آسراتیانی کمّی، آپ، برک ءُ بازیں مشکلانی پپدیمپان اَنت؛ دیمتر ءَ ماں میارجل ءِ ویدئویی گزارش ءَ کاپَر نشینانی جاورال ءَ ماں میر آباد ءَ چمان ء وت گِنداِت.

   حنیفه دهقانی