چہ میارجل ءِ ھالرسانی بنجاہ ءِ نیمگ ءَ : ائید مھمد شھلی بر بلوچانی کوریں لچہ کار اِنت کہ ماں سال ءِ 1346 ءَ ماں بمپور ءِ شھر ءَ ودی بوتگ ، آ سداں  دستونک ، کلاسیک لچہ ، دوئی ، چاربند ءُ دو بیتی ءِ آشکی لچھانی واھند اِنت ۔

مئے مرچیگیں لچہ کار ءِ ھال کہ پولاتیں ارادہ ءِ واھند اِنت کہ ماں سال ءِ 1366 ءِ ویلے ءِ سر ءَ وتی چمانی روک ئِے چہ دست داتگ ءُ  انی سالانی سال اِنت کہ پہ رژنا دلیں لچہ کار ءَ نام کپتگ ءُ دور چہ دنیا ءِ جیڑگ ءُ جنجالاں ماں لوگ ءِ تہ ءَ وتی زندمان ءَ گوازینگ اِنت ءُ درستیں درد ءُ سکیانی ھمدم آئی ءِ گوشتگیں لچہ اَنت کہ گوشگ اِنت  سالانی سال پہ آیانی نبیسگ ءَ وھد ءُ جوانی ئِے داتگ اَنت ۔

 چہ اِے رژنا دلیں لچہ کار ءَ کتابے پہ چاپ رس اِتگ ءُ کرار اِنت کہ زوت ءَ زوت شِنگ ءُ تالان بہ بیت ءُ آئی ءِ لچھانی اندری گپ ، مھر ،ھاوند ءُ رسول ءِ یارانی دوستی ءُ ساڑا ءُ تپاکی اِنت ءُ اَبید چہ بلوچی زبان ءَ پارسی ءُ اردو ءُ اربی ءَ شَرّی ءِ سر ءَ سوھو ءُ زانتکار اِنت ۔

محمدیاسین جلال‌زهی