میارجل بُنجاہ ءِ ھالکاری ءِ رد ءَ ; مھدی بلیدہ ورناتریں بکشدار کشور زانگ ءُ پجاہ آرگ بیت ورنایے کہ چہ 28 سالی ءَ شھرستان کسرکند ءِ بُنجاھی بکشداری ءِ سکانداراِنت / دیمترءَ میارجل ءِ گند ءُ نند ءَ گوں اے بلوچ کارکنوکیں بکشدار ءَ بگند اِت.
پہ مئی وانوک ءُ چاروکاں وتی پجارءَ بکن اِت ؟
من مھدی بلیدہ آں منی بیتک شھریور سال 1369 ءَ ماں کسرکند ءِ شھرستان ءَ اِنت منی وانگی مدرک مدیریت بازرگانی چہ پیام نور چھبار ءِ مزن شھدربرجاہ ءَ ءُ ھنوں من شھرستان کسرکند ءِ بُنجاھی بکشدارآں ءُ پہ اے ھند ءُ دمگ ءِ شریں مردماں ھزمت کنگ ءَ یاں.
شما وتی چاگردی کار چہ کدی بنگیج کتگ؟
من چہ وتی وانگ ءِ آسر کنگ ءَ رند پہ دلجمی وتی چاگردی کار بنگیج کت پرمانداری ءَ امریہ کارزانتی ءَ پیسری پرماندار بانک ھمیرا ریگی وھد ءَ مں کار بنگیج کت گوں آئی اوست ءُ بیسہ ءَ پد ءَ گوں رندتری پرماندار ءِ دلجمی ءُ اوست ءَ ماں بازیں پڑاں پہ کارزانتی ءَ چو کہ کوچگی ءُ شھری برنامہ ریزی ھنچوش مشاور جوان پرمانداری ءُ شنگکاری ءَ کار کتگ.
یک ورنایے پہ بکشداری زمہ ءَ آ ھم ماں بلوچستان ءَ کمے ھبکھی گپے نہ اِنت ؟
استان سیستان ءُ بلوچستان ءَ لھتیں ورناتریں جھگیر ماں کشور ءِ تہ ءَ پہ مجلس ءَ دیم داتگ اِشی ءِ مانا اِیش اِنت کہ مئی مردماں پہ ورنایانی باندات ءَ مزن اوست ءُ امیتے ھست اِنت مئی مڑاھداریں استاندار ءِ دلگوش گوں انگلابی پگریں ورناھان اِنت ما بایداِنت کہ اے ھبر ءَ دلءَ جاگاہ بدئیں کہ وھد ورناھانیگ اِنت اگاں ما ورنایاں یک کارے ءَ بہ پرمائیں گڑا آ وتی کار ءَ پہ دلجمی ءُ پہ سگ اوپار پہ آسرءَ رسین اَنت بزاں چاگردءِ تہءَ ورنایاں وت ءَ منینتگ ھرجاہ ءَ کہ پہ ورنایاں اوست اِش کتگ گڑا ھما کار ءِ آسر شر ءُ روژناہ بوتگ من ھم یک ورنایے استان سیستان ءُ بلوچستان ءَ پہ وتی کارانی شری ءَ کوششت کناں ءُ پہ دلجمی وتی مردمانی اَڑ ءُ جنجالاں گیش گیوار کنگ ءِ کوششت کناں پرچہ کہ مئی مردم اوپار کنوک اَنت بایداِنت کہ ما پہ آیاں شرتریں کارءَ بکن اِیں من اے وھدی چہ اے موہ ءَ بھر زیراں ءُ چہ پرماندار ءَ ءُ استاندار مھترم ءَ کہ پہ من ءَ بیسہ ءُ اوست اِش کتگ منتواری کناں.
کسرکند بُنجاھی بکش ءِ جاھمنندیں مردم چنت اَنت ءُ مزن تریں جنجال چی اَنت ؟
کسرکند بُنجاھی بکش دو دھستان ھست بزاں ھیت ءُ ھلنچکان 50 کلگ اَنت ءُ 15 ھزار نپر اَنت مستریں جنجال ءُ مشکل بُنکی کار اَنت چو کہ راہ پہ کاجو ءِ دزرس بیگ ءَ اداں وھدے کہ کور ھار کن اَنت 22 کلگ ءِ راہ چہ کورانی توک ءَ اَنت ھمے وھدءَ اے راہ بند بئے اَنت روگ ءُ آیگی راھانی بے گومی ءُ ورگی آپ ءِ نہ بیگ ماں بازیں کوچگاں جاندراھی ءُ وانگی جاھانی کمی مزن تریں جنجال اے بکش ءِ ھمیش اَنت اے وھدی بازیں کارے بیگ ءَ اِنت کہ اے مشکل ءُ جنجالاں کم بکن اِیں.
پہ اے بکش ءِ دارگ ءُ کارانی دیم ءَ برگ ءَ شما چہ کے ءَ کمک گرگ ءَ اِت ؟
منی نگاہ کہ من یک ورنایے آں چو کہ اے دگہ ورنایاں چہ گل ءُ ٹک ءَ جتا اِنت گوں درستیں زانتکاراں ھرکسے کہ ماراکمک کت کنت من شور سلاہ کناں گوں وانندہ ءُ سرپدیں مردماں من ھروھدءَ ھم تران ءُ ھم شور آں.
پہ کسرکند ءِ شھرستن ءَ شما وتی سکانداری ءِ وھد ءَ ھما کار کہ کتگ اَنت پہ مارا بگوش اِت اِش ؟
منی آیگ ماں بُنجاھی بکشداری ءَ ھمدپ اَت گوں ھور ءُ ھاراں ماں سال 98 ءَ بلے گوں ھاوند ءِ کمک ءَ ءُ گوں جھادی کوششت ءَ ءُ گوں ھیرواھانی کمک کنگ ءَ ءُ بنیاد الوی ءُ "ناحیہ مقاومت بسیج" سپاہ ءُ میتگی مردمانی کمک ءَ شریں ھمکوپگی ءُ کمکے پہ مردماں کنگ بوت ما کوششت کت کہ زیمیگے بہ بئیں پہ مردمانی درداں کہ ھار ءَ دردمند کتگ ات اَنت.
ھمے درمیان ءَ مارا شریں موھے رس اِت کہ پجاروک بہ بئیں گوں اے دگہ ھیرواھاں کہ رند چہ ھار ءِ کمک ءَ پہ جاندراھی ءِ بُنگپ ءَ ءُ وانگجاھانی ءُ ورگی آپ ءِ بُنگپ ءَ گوں آیاں داں روچ مروچی ھمکاری بیگ ءَ اِنت.
داں ھمے گوستگیں سال ءَ گوں ھمدلی ءُ ھمراھی ءَ درستیں دھیارانی ءُ شوراھانی درستیں ادارھانی زمہ داراں ءُ ھیرواھاں بنیاد الوی ءُ پرمانداری ءِ رندگیری ءُ مردمانی جھگیر ماں مجلس ءَ ھنچو مڑاھداریں استاندار ءَ بازیں شریں کار پہ اے بکش ءَ کتگ اَنت یکے چہ مزن تریں ھمے کاراں کاجو ءِ راھانی ءُ گٹ ءُ گرانی پچ کنگ گوں بنیاد الوی ءِ ھمکوپگی ءَ من وتی گپانی تہءَ گوشت اَنت کہ پیسرءَ ھور ءُ ھار ءِ وھد ءَ بازیں کلگ ءِ راہ ھار ءَ برتگ اَنت ءُ راہ بند بوتگ اَنت ھنوں مئی وش بھتی اِنت کہ پیمانکار آتکگ ءُ کار بیگ ءَ اِنت ھنچو.
کاجو ءِ تاب پیچیں گُٹ کہ ماں اے جاہ ءَ پیسر ءَ بازیں اولاک راہ ءَ چہ در کپتگ اَنت ءُ بازیں مردم پرشت پروش ءِ آماچ بوتگ اَنت باز مساپر نیم جان بوتگ اَنت اے کار ھم بنگیج بوتگ ءُ دیم ءَ روان اِنت ما امیت کن اِیں کہ اے کار ماں کمکیں وھدے ءَ آسر بہ بیت.
پہ وانگی جاھانی باوست ءَ اے وھدی ما پنچ وانگجاہ ھیری جوڑ کتگ ءُ درستیں مئی کلگ ءُ آبادیاں بنگیجی وانگجاہ ھست اِنت.ھنوں دیرتریں کلگ کہ ھشت کھول اوداں ھست اِنت ھموداں ھم بنگیجی وانگجاہ جوڑ بوتگ ما کوششت کنگ ءَ اِیں کہ مئی کلگ چوناھا دیر پہ دیر ءَ اَنت وانگی چُکاں چہ وانگ ءِ دیم دیگ ءَ مکن بکن اِیں بیرستان وانگجاہ ماں ھر کلگ ءَ جوڑ بکن اِیں ۔ھیری درمانجاہ ءُ چُکانی لیب جاہ ۔ ورگی آپ ءِ جنجال ماں کلگ ءُ آبادیاں گیش گیوار بکن اِیں ءُ گیش چہ 150 آپدان ماں کوچگاں بھر بانگ کتگ پنچ دکل مکابراتی جوڑ کنگ ءَ منگ بوتگ ماں ھما جاھاں کہ پیسرءَ نہ بوتگ "طرح ھادی" ءِ اجرا کنگ ماں دو کلگ ءَ ماں گوستگیں سال ءَ دمکانی روژنائی ءِ کار ماں بازیں کلگ ءَ ۔ شرکت نیرو گستر ءِ چاگردی زمہ داری پہ "خط انتقال" گاز ایرانشھر ۔ چھبارءَ کہ ھنوں راھاں پچ کنگ اِنت ماں کلگاں اے ھم درورے چہ مئی کتگیں کاراں ماں گوستگیں سال ءَ
یک وشیں ترانگ ءُ تھتالے پہ مارا بہ گوش ؟
سال 98 ءَ ما ھمراہ اَت اِیں گوں لھتے ھیرواھاں ءُ لھتے بکچہ ورگی سامان (بستہ معیشتی ) پہ ھار ءِ تاوان باریں مردماں دیگ ءَ اَت اِیں ماں اے بکچہ ءَ دان ۔روگن ۔ آرت ۔ شودگی چیز اَت اَنت ما لوٹ اِت کہ چہ ھار ءَ تاوان باریں مردماں ماں بُنجاھی بکش ءِ کلگاں بھر بانگ بکن اِیں گڑا ماں یک کڈکے ءَ یک پیریں بلُکے زند گوازینگ ءَ اَت یک بکچہے ما ھمے پیریں بلُک ءَ دات چیزے روچ ءَ رند ھمے بلُک آتک منی کارگس ءَ ماں بکشداری ءَ یک دست جوڑ کتگیں چیزے کہ چہ درچک داز ءِ پیش ءَ آئی ءَ وت جوڑ کتگ اَت آورت ءُ پہ من ءَ سوگات ئِے کت ءُ پہ من ءَ دوا ھیر ءَ لگ اِت چہ ھداءَ شگر کنگ ءَ اَت من چہ اے مھربانیں بلُک ءِ اے کارءَ سک ھبکہ ءُ منی دل سک باز وش بوت کہ اے بلُک یک مزنیں ءُ باز مھربانیں زردے ءِ واھنداَت اے کار منی وَ وزیپہ اَت کہ من کتگ اَت بلے آئی داتگیں سوگات ءَ پہ من مزنیں بستارے ھست اَت بلے کہ ما گوں اے کارانی سکی ءُ سوری ءَ ءُ برے گوں مردم ءِ کمی ءِ نیمون ءَ بلے وھدے کہ ماں بکشداری ءَ من ءَ موھے رس اِیت کہ من یک مردمے ءِ یا یک کلگے ءُ آبادی ءِ جنجالے گیش گیوار کناں ءُ مردم پہ من ءَ نیکیں دوا کن اَنت پہ من ءَ باز وش ءُ دوستاک اِنت.
وتی ھیال ءُ لیکھ ءَ بلوچ زالبولانی باروءَ بگش ؟
شریں جاگاہ ءُ شریں اِزتے ءِ واھند اَنت ھر وھد ءَ ھمکوپگ گوں مردیناں ھمک جاہ ءَ گون اَنت ءُ لھتے جاگاھاں چہ مردیناں ھم دیم ءَ تر اَنت ماں سکی ءُ سوری ءَ چو کہ کوھے ءَ مردینانی ءُ وتی چُکانی دیمپان اَنت بازیں سالاں جنک چہ بے وانگی ءَ گمیگ بوتگ اَنت بلے ھنوں جمھوری اسلامی ایران ءِ نزام برکت ءَ پہ وانگجاھاں روگ ءَ اَنت زانت ءُ زانگ ءِ راہ ءَ دیم ءَ روگ ءَ اَنت ھنچو کہ مروچی گوں ھاوند ءِ کمک ءَ نودربریں جنکانی شمار اگاں چہ بچکاں گیشتر نہ انت بلے کمتر ھم نہ انت بکشداریں بانُک ادارھانی کارمستر بانُک اَنت ماں مھمیں سربراھی جاگاھاں چو کہ استانداری ءِ کمک کارمستر ءُ پرماندار شھردار یک نوکیں دروشمے جنین چاگرد ءَ گندگ بیگ ءَ اِنت اے باندات ءَ زانگ بیت کہ زالبول ماں ھمک کارانی تہ ءَ سوبین اَنت من گوشاں کہ کارانی دیمروی ءِ تہ ءَ اِشتاپی ءُ شری ھما وھد ءَ بیت کنت کہ جنین ءُ مردین ھمکوپگ بہ بنت ءُ زمہ ءَ بزیراَنت
شمئی گڈی گپ پہ ورنایاں ءُ پہ میارجل ھالکاری بُنجاہ ءَ ؟
پہ یک شریں زندمانے ءَ پہ مارا یک شریں رھبندے ءِ دیم ءَ برگ بس نہ اِنت آ چیزے کہ باز مھم اِنت کوششت ۔ دلجمی ۔ امیت ءُ اوستءِ دارگ ءُ جاندراھی روچ ءِ ھمراھداری کنگ ۔ ھیرت چاری ءُ وتی زانت ءُ زانگ ءِ گیش کنگ اِنت -
رجانکار ۔ ملا چمل
.png)
