چہ میار جل ءِ ھالرسانی ءِ بنجاہ ءِ رد ءَ ; بانک آمنہ ھسین زھی دستی اِزم ءِ پڑ ءَ پہ کاربار ءَ ماں کنرک بلوچستان ءَ زانگ ءُ پجاہ آرگ بیت آئی ءَ بید چہ اے اِزم ءُ ھنر ءَ دگہ بازیں کاربار ءُ ورزش ءِ پڑءَ دگہ بازیں زالبول رھشونی کتگ اَنت دیمتر ءَ میارجل ءِ گلگدارءَ گوں اے پُر کاریں بانک ءَ بوان اِت ۔
بانک وتی پجارءَ بکن ءُ تو چون ءَ یک بلوچ زالبولے پہ اے بازیں سوبمندی ءَ رس اِتگ ئے ؟
من آمنہ ھسین زھی آں ءُ وانگ من چہ نھضت سواد آموزی ءَ بنگیج کتگ پہ اے ھاتر ءَ کہ منی سجل چہ منی جرند ءِ امر ءَ باز مزن تر بیتگ ۔
چہ وتی زندمان ءُ داں پہ اے جاہ ءِ رسگ ءِ بارو ءِ مارا سرپدی بدئِےاِت ؟
منی مات ءُ پت پیش چہ منی وانگ ءِ امرءِ رسگ ءَ وت چہ وت ءَ جتا بوتگ اَنت منی مات ءَ کہ بازیں اِلم ءُ سوادے نیست اَت منی دگہ پنچ برات ءِ مستری ءُ زمہ واری پہ وتی سرءَ زرت
البت منی مات پہ من ءَ چو کہ یک استادے بیتگ ھنوں کہ من پہ اے جاہ ءَ سر بوتگاں منی مات ءِ رھشونی ءُ دلبڈی گون بوتگ اَنت منی وانگ ءِ کار ھم مات ءَ رندگیری کت منی سجل ءِ توک ءَ بیتکی ءِ سال 55 اِنت (تچکیں امر 37سال اِنت )مات ءَ من ءَ برت نھضت سواد آموزی ءَ داں بلّے من چہ وتی ھمسروکاں پَشت مہ کپاں من ءَ شری ءَ یاد اِنت کہ من چار سال ءَ ماں یک کلاسے ءَ چکاس دیگ ءَ گون بوتگاں اے کلاس چارمی بوتگ بلے پہ وشی اے کلاس ءِ چکاس ءَ سوبین بوت آں گڑا انچو تچک ءَ پنچمی کلاس ءَ مدرسہ ءَ شت آں دیمترءَ من مدرسہ ءِ توک ءَ وانگ بنگیج کت پہ چوشیں درس ءِ وانگ ءَھم من بازیں سکی ءُ سوری یے دیستگ اے رد ءَ بازیں تژن ءُ پنام منی ھمسروکاں پہ من ءَ گوشت چو کہ (متفرقہ ) یا "غیر حضوری" پہ من ءَ گوشت اِش ءُ من ءَ کلاگ اِش زرت بلے مدرسہ ءِ مدیرءَ ءُ اے دگہ زمہ داراں من ءَ باز دلبڈی دات گڑا مدرسہ رھنمائی ءُ دبیرستان ءِ وھد ءَ وتی کلاس ءِ تھا شاگرد اول بوتگاں ۔
چِہ وھد ءَ گڑا تو اِزم ءُ ھنر دستی کارانی نیمگ ءَ روانگ بوت ئے ؟
چہ ھما وھد ءَ کہ راھنمائی ءَ وانگ ءَ اِت آں ءُ گوں بسیج ءِ کاراں ھور اِت آں من ءَ گوں اے کارءَ دوستی ھست اَت مدرسہ ءِ توک ءَ وھدے کہ دھہ پجر ءِ مراگاہ بوت اَنت گڑا نمایشگاہ اِش جوڑ کت ھما وھدی من وتی دستی ھنر ءِ کار برت اَنت ءُ پہ مردمانی پیش دارگ ءَ اِیر کت اَنت گڑا من چاراِت کہ باز مردم منی کاراں دوست دارگ اَنت ءُ کیمت ءِ جست ءَ کنگ ءَ اِنت لوٹ اَنت کہ پہ بھا بزیر اَنت اِش گڑا منی ھب پہ اے کار ءَ گیش بیان بیت ءُ من پگر کت کہ پہ چوشیں نمایشگاھاں گیشتریں کار جوڑ بکناں ءُ اگاں کسے لوٹ اِیت کہ منی کاراں پہ بھا بزیراِیت من وتی ھنری کاراں بھا کت بکناں اے باندات ءَ من ءَ چیزے زر ھم رس اِیت ۔
گڑا چو بیت کہ من راھنمائی وانگ ءِ وھد ءَ دگہ گیشتریں کار جوڑ کت ءُ بھا کت اَنت پد ءَ چیزے زر کہ من ءَ رس اِت منی شوک گیش بیان بیت گوں ھمے زراں من وتی کار دیم ءَ بران کت گڑا دگہ برے چہ وتی مات ءَ کمک نگپت پہ لھتے چیزانی زیرگ ءَ زر من وت دات اَنت ۔
پد ءَ بسیج ءِ تھا دگہ لھتے ھنری کلاس بیت اَنت گل سازی ءِ پیمیں کلاس ءُ من ءَ گوں اے کار ءَ چہ پیسر ءَ دوستی ھست اَت من ھم شت آن ءُ بھر زرت ۔
دیمتر ءَ گڑا چوں کہ ما تیاب دپ ءَ نشتگ اِیں من تیاب دپ ءِ گُر ءُ ھوردیں کرکینک ھم وتی کار ءِ تھا آورت اَنت ھمے داب ھمے دست ءِ اِزم پہ من ءَ شریں کارے جوڑ بوت ءُ من ءَ چیزے زر ھم رس اِت ۔
پد ءَ پوست (صنایع پوستی ) ءُ کاشی چینی ءُ بوچ (فوم) ھم گوں وتی کار ءَ ھور کت اَنت اے وھد ءَ یک نیمگے من درس وانگ ءَ اِت آں ءُ دگہ نیمگے من وتی اِزمی ءُ ھنری کاراں دیم ءَ برگ ءَ اِت آں ءُ روچ پہ روچ ءَ منی کار گھتر بیان بیت منی جوڑ کتگیں تابلوانی رنگ ءُ دروشم گھتر بیان بیت ۔
یک روچے بسیج ءِ کارمستر ءَ من ءَ گوشت کہ چہ وتی جوڑ کتگیں تابلواں یکے بزیر ءُ کنرک ءِ شھرستان کہ نوکی جوڑ بیتگ اَت پرماندار ءِ گور ءَ شت اِیں ءُ اے تابلو ما پہ آئی ءَ سوگاتی دات گڑا پرماندار ءَ منی کار باز پسند کت من ءَ باز دلبڈی دات ءُ گوشت ئِے کہ دگہ لھتے ھنچوشیں کار پہ مارا جوڑ بکن مئی گور ءَ وھدے کہ چہ دگہ جاھاں مھمان کاینت ما آیاں ھمے سوگاتی ءَ دئیں گڑا من ھنچوش کت ءُ منی بازیں کار آیاں پہ وتی مھماناں سوگات دات اَنت ۔
گڑا بزاں شما ھر جاھے ءَ کہ شتگ اِت شمارا شر دلبڈی اِش داتگ ؟
ھو من ءَ بازیں جاگاھاں ءُ باز دلبڈی اِش داتگ یکرندے من ءَ یکے ءَ سوج دات کہ پہ اے کار ءَ یک تاونی (تعاونی) یے جوڑ بکن اے رد ءَ من شت آں ادارہ کار ءَ ءُ گوں آیاں گپ ءُ تران کت من ءَ گوشت اِش کہ کنرک ءِ تھا چوشیں کارانی تاونی نیست اِنت من ءَ کمک اش کت داں کہ سال 92 ءَ من وتی تاونی جوڑ کت ءُ سَبت (ثبت) کت ۔
بانک گڑا شمئی وانگ پہ کجا رس اِت ؟
من دیپلم ءِ گرگ ءَ چہ رند یک اوشتے کت پہ اے ھاتر ءَ کہ من ءَ پہ دیمتر ءِ وانگ ءَ ھرچ درچ نیست اَت پد ءَ منی مات ءَ ھم من ءَ پہ دیمتر ءِ وانگ ءَ ءُ ءَ پہ کنکور ءِ چکاس دیگ ءَ مکن کت مات رازی نہ اَت کہ من پہ دیمتر ءِ وانگ ءَ دگہ شھر ءُ دگہ جاھے ءَ بہ رواں ھمے اوشت ءَ چہ رند من پد ءَ وتی وانگ ماں دانشگاہ آزاد ءَ کہ مئی نزیک ءُ گورءَ اَت بنگیج کت ءُ لیسانس آموزش ابتدائی گپت پد ءَ نھضت سوادآموزی ءِ کارباراں گوں ھورتور بوتگ آں بلے چوں کہ نھضت سوادآموزی ءِ کاراں پہ باید من دیریں کلگ ءُ دھاتاں بہ شتین آں منی مات ءَ پد ءَ پہ اے کار ءَ من ءَ مکن کت منی مات پہ اے ھاتر ءَ کہ ھم منی مات بیتگ ھم منی پت بیتگ بید چہ آئی ءِ رازی بیگ ءَ من ھچ کار وتسر ءَ نکتگ ءُ آئی ھبر ءِ گرگ پہ وت ءَ واجب زانتگ گڑا من نھضت سوادآموزی ھم دیم دات ءُ کانون پرورش پکری کودکان ءَ کارءَ لگ اِت آں کساس 3 سال چہ منی کارءَ گوستگ اَت کہ منی مات داں 4 سال ءَ کپت ءُ سک بیمار بوت من پہ وتی مات ءِ سمبالگ ءِ ھاتر ءَ اے کار ھم دیم دات بلے ھمے سئیں سالانی توک ءَ کہ من اوداں کارءَ بیتگ آں ھمے وھد ءَ استان ءِ تھا شرتریں لچہ کار ءُ شرتریں رھشون (مربی ) گچین کنگ بوت آں ءُ منی شاگرد شھرءَ چہ بگر داں استان ءَ ءُ ملی ھساب ءَ سوبین بوت اَنت ۔
شما وتی مات ءِ مرگ ءَ رند چونیں کار کت ؟
من ھوری ءَ کار کنگ ءِ یک بنگپے گوں سازمان ھلال اھمر ءَ پہ زالبولانی دیمروی ءِ باندات ءَ ءُ گوں کمیتہ امداد ءَ پہ کارباری سروکی ءُ کار ءِ درگیجگ پہ بے سروکیں ءُ بدسروکیں زالبولاں کمک ءُ رھشونی کنگ ءَ یاں پہ اے ھاتر ءَ کہ من ءَ وت ءَ ھمے کار ءِ کتہ کاری ءُ مدرک ھست اِنت ءُ ھنوں ادارہ ورزش ءَ زالبولانی شئبہ ءِ کارمستر آں ءُ ھمے ادارہ ءِ کرکِٹ ءِ زالبولانی رھشونی ھم گوں من ءَ اِنت ءُ یک مردم نھادیں مؤسسہے گوں پرمانداری ءِ ھوری ءَ من جوڑ کتگ چہ اے کارانی کنگ ءَ منی مول ءُ مراد ھمیش اِنت کہ زالبول چو کہ منیگ ءَ کارانی تھا بیا اَنت داں کہ وتی بھت ءُ کسمت ءَ وتی جرند ءِ دستاں بزیراَنت.
دگہ یکے اِیش اِنت کہ من وت پہ وام ءِ گرگ ءَ ماں بازیں بانکاں شتگ آں ءُ گوں اے کار ءِ سکی ءُ دلسیاھی ءَ زانتکاراں کہ چینچک تچ ءُ تاچ ءُ زامن لوٹ اَنت ھمے ھاتر ءَ من دو سَندوک (صندوق)جوڑ کتگ ءُ منی ھند ءِ جنین وتی زراں کاراَنت ھمے سندوک ءَ اِیر کن اَنت ءُ وھدے کہ باز بئے اَنت گڑا ھرکسے ءَ کہ پہ کارے ءَ زر لوٹ اِیت چہ ھمے زراں ما آئی ءَ کمک کن اِیں ءُ وام دئیں دیمترءَ من دلبنداناں کہ دگہ دو ھنچوشیں سندوک جوڑ بکن آں ۔
رجانکار ۔ ملا چمل
.png)
